តុលាការរុស្ស៊ីបានកាត់ទោសពលរដ្ឋអេស្តូនីម្នាក់ ឲ្យជាប់គុក១៥ឆ្នាំពីបទចារកិច្ច
សាលក្រមកាត់ទោសលោក Eston Kohver ដែលជាមន្ត្រីនៃប៉ូលីសសន្តិសុខអេស្តូនីត្រូវបានប្រកាស ថ្ងៃ១៩សីហា ដោយតុលាការខេត្តរុស្ស៊ី Pskov នៅជាប់នឹងព្រំដែន អេស្តូនីផ្ទាល់។ ពិតជានៅត្រង់ព្រំដែននេះឯង ដែលកាលពីថ្ងៃ ៥កញ្ញាឆ្នាំមុន រូបគាត់ ត្រូវបាន អាជ្ញាធររុស្ស៊ីឃាត់ខ្លួនតាមបទចារកិច្ច ទល់នឹងរដ្ឋរុស្ស៊ី។ ប៉ុន្តែ រដ្ឋាភិបាលអេស្តូនីបានបញ្ចេញ ប្រតិកម្មតវ៉ាយ៉ាងខ្លាំងក្លាភ្លាមភ្លែត។ ចំណែក សហភាពអឺរ៉ុបដែលមានអេស្តូនីចូលជាសមាជិក តាំងពីឆ្នាំ ២០០៤មក បានទាមទារពីក្រុងម៉ូស្គូ ឲ្យ ដោះលែងជាបន្ទាន់ រូបពលរដ្ឋអេស្តូនី នោះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៧
តាមការបកស្រាយរបស់ស្ថាប័នសន្តិសុខរុស្ស៊ី FSB រូបលោក Eston Kohver ដែល ជាមន្ត្រីនៃប៉ូលីសសន្តិសុខអេស្តូនីត្រូវបានឃាត់ខ្លួន គឺនៅលើដែនដីរុស្ស៊ី ក្រោយពីគាត់បានឆ្លងកាត់ព្រំដែនអេស្តូនី-រុស្ស៊ី មកបំពេញប្រតិបត្តិការឈ្លបយកការណ៍។ នៅពេលទប់ស្កាត់ ប្រតិបត្តិការនោះ អាជ្ញាធររុស្ស៊ី រឹបអូសយកបាន ពីខ្លួនគាត់ គឺ កាំភ្លើងខ្លីមួយដើម លុយ ៥.០០០ អឺរ៉ូ គ្រឿងប្រដាប់ពិសេសសម្រាប់លួចថតសម្លេង ព្រមទាំងវត្ថុផ្សេងទៀតក្នុងគោលដៅ លួច យកការណ៍ពីរុស្ស៊ី។ ម៉្លោះហើយ បានជារូបគាត់ត្រូវបានកាត់ទោស តាមបទចារកិច្ច មានអាវុធ ខុសច្បាប់ ឆ្លងកាត់ព្រំដែនរុស្ស៊ីខុសច្បាប់។
ទោសគាត់ គិតជាសរុប គឺជាប់ពន្ធនាគារ១៥ឆ្នាំ និងថែមទាំងតម្រូវឲ្យគាត់បង់ប្រាក់ពិន័យ ១០០.០០០រូប្លទៅផង ដែលគិតតាមអត្រាបច្ចុប្បន្ន តែម្តុំ ១.៥០០ដុល្លារប៉ុណ្ណោះ។ ពេលតុលាការរុស្ស៊ី ប្រកាសសាលក្រមនោះ គេសង្កតឃើញមានវត្តមានជាសញ្ញាប្រឆាំង គឺ ទាំងតំណាងស្ថានទូតអេស្តូនីនៅម៉ូស្គូ ទាំងតំណាងរបស់សហភាពអឺរ៉ុបនៅរុស្ស៊ី។ ប៉ុន្តែតាមការបកស្រាយរបស់ភាគីអេស្តូនី រូបលោក Eston Kohver ត្រូវបានពួកជនប្រដាប់អាវុធ ចាប់ពង្រត់គឺនៅលើដែនដីអេស្តូនី នៅជិតប៉ុស្តព្រំដែន Luhamaa ពេលគាត់កំពុងចូលរួម ក្នុងប្រតិបត្តិការកំចាត់ឧក្រិដ្ឋកម្ម នៅជិតព្រំដែននោះ។
បន្ទាប់មក ពួកជនមិនស្គាល់ឈ្មោះ បានប្រើកម្លាំងទៅលើរូបគាត់ ហើយដោយកំញើញប្រើអាវុធ ទល់នឹងរូបគាត់ ក៏ បានដឹករូបគាត់ ទាំងបង្ខំ ចូលមកក្នុងដែនដីរុស្ស៊ីតែម្តង។ រដ្ឋាភិបាលអេស្តូនីក្នុងសេចក្តីថ្លែងការណ៍ខ្លួន មិនទទួលស្គាល់សោះឡើយសាលក្រមនោះ ហើយ ចាត់ទុកការឃុំឃាំងពលរដ្ឋអេស្តូនីក្នុងពន្ធនាគាររុស្ស៊ីថា ខុសច្បាប់ដោយទាមទារពី ក្រុងម៉ូស្គូ ឲ្យគោរពតាមបទដ្ឋាននៃច្បាប់អន្តរជាតិ និងទាមទារឲ្យដោះលែងជាបន្ទាន់ រូបលោក Eston Kohver ហើយធានាឲ្យគាត់បានត្រឡប់ទៅអេស្តូនីវិញ ប្រកបដោយសុវត្ថិភាព។ ការទាមទារយ៉ាងទទូចបែបនេះ ពីរុស្ស៊ី ក៏ត្រូវបានបន្លឺឡើង ដោយប្រមុខការទូតសហភាពអឺរ៉ុប លោកស្រី Federica Mogherini ដែលនៅថ្ងៃចន្ទទី២៤សីហាខាងមុខ នឹងអញ្ជើញទៅបំពេញ ទស្សនកិច្ច នៅប្រទេសអេស្តូនី ដូចដែលមានគ្រោងទុកយូរមកហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ