បុរីវ៉ាទីកង់៖ប្រមុខសង្ឃកាតូលិកសម្តែងក្តីសង្ឃឹមសន្តិភាពចំពោះប្រទេសស៊ីរី
នៅថ្ងៃទី២៧ មីនាដែលជាថ្ងៃបុណ្យសម្រាប់អ្នកកាន់សាសនាគ្រិស្ត ប្រមុខសង្ឃកាតូលិកសម្តេចប៉ាបហ្រ្វង់ស័របានថ្លែងសារទៅតាមទំនៀមទម្លាប់ប្រពៃណីនៅទីលានសាំងព្ជែរ បុរីវ៉ាទីកង់ក្នុងប្រទេសអ៊ីតាលី។ នៅក្នុងសារនោះ សម្តេចប៉ាបបានបន់ស្រន់ឲ្យកិច្ចចរចាសន្តិភាពស្តីពីស៊ីរីទទួលបានជោគជ័យ ព្រមទាំងលើកឡើងពីស្ថានភាពរបស់ជនភៀសខ្លួន និងអំពើភេរវកម្ម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៩
គឺជាទំនៀមទម្លាប់ប្រពៃណីមួយដែលប្រមុខសង្ឃកាតូលិកសម្តេចប៉ាបហ្រ្វង់ស័របានថ្លែងសារនៅក្នុងថ្ងៃបុណ្យសាសនារបស់អ្នកកាន់សាសនាគ្រិស្ត។ តែអ្វីជាការកត់សម្គាល់សម្រាប់បុណ្យសាសនាគ្រិស្តឆ្នាំនេះ សាររបស់សម្តេចប៉ាបបានផ្តោតសំខាន់លើប្រធានរឿងដែលកំពុងកើតមាននៅក្នុងលោកសព្វថ្ងៃ ពិសេសគឺស្ថានការណ៍នៅក្នុងប្រទេសស៊ីរីដែលបានធ្លាក់ក្នុងសង្រ្គាមស៊ីវិលហែកហួរគ្នាអស់រយៈពេលជាច្រើនឆ្នាំ។ ការបន់ស្រន់របស់ប្រមុខសង្ឃកាតូលិក គឺចង់ឃើញកិច្ចខិតខំប្រឹងប្រែងតាមផ្លូវទូតរបស់សហគមន៍អន្តរជាតិសព្វថ្ងៃទទួលបានផ្លែផ្កាសន្តិភាពឲ្យប្រទេស និងប្រជាជនស៊ីរី។
ក្រៅពីបន់ស្រន់ឲ្យមានសន្តិភាពនៅក្នុងប្រទេសស៊ីរី សារចង់បានសន្តិភាពរបស់សម្តេចប៉ាបក៏បានផ្តោតលើប្រទេសអ៊ុយក្រែន អ៊ីរ៉ាក់ យេម៉ែន ប៊ូរុនឌី និងប្រទេសស៊ូដង់ខាងត្បូងដែរ។ ទន្ទឹមគ្នានេះ និងអ្វីដែលប្រមុខសង្ឃកាតូលិកមិនអាចបំភ្លេចបាននោះ គឺកំណើនអំពើភេរវកម្មសម្លាប់ជនស្លូតត្រង់នៅក្នុងពិភពលោក។ ត្រង់ចំណុចនេះ សម្តេចប៉ាបបានលើកឡើងពីអំពើភេរវកម្មថ្មីៗនៅក្នុងទីក្រុងព្រុចសែល ប្រទេសបែលហ្ស៊ិក នៅក្នុងប្រទេសតួកគី ប្រទេសឆាដ ប្រទេសកាមេរូន ឬមួយក៏ប្រទេសកូដឌីវ័រជាដើម។ សម្តេចប៉ាបបានចាត់ទុកទង្វើភេរវកម្មទាំងអស់នោះថា ជាទង្វើដ៏ងងឹតងងុលដែលបង្ហូរឈាមអ្នកស្លូតត្រង់ គ្មានកំហុស។
ដោយឡែក សំណុំរឿងមួយដែលប្រមុខសង្ឃកាតូលិកមិនអាចបំភ្លេចបាននោះ គឺជនភៀសខ្លួនដែលបាន និងកំពុងបន្តមកកាន់ទ្វីបអឺរ៉ុបដើម្បីគេចពីសង្រ្គាម ពីភាពអត់ឃ្លាន ពីភាពក្រីក្រតោកយ៉ាក និងពីភាពអយុត្តិធម៌នៅក្នុងសង្គម។ នៅក្នុងន័យនេះ សម្តេចប៉ាបហ្រ្វង់ស័រមិនញញើតនឹងបរិហារប្រទេសអឺរ៉ុបខ្លះដែលបានបដិសេធក្នុងការទទួល និងជួយសង្រ្គោះជនភៀសខ្លួនទាំងនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ