តុលាការបារំាង៖បំណែកស្លាបយន្តហោះរកឃើញនៅកោះរ៉េអ៊ុយញ៉ុងពិតជារបស់ MH៣៧០
នៅល្ងាចថ្ងៃព្រហស្បតិ៍ ទី៣ កញ្ញា តុលាការបារំាងបានបញ្ជាក់ដោយមានសុទិដ្ឋិនិយមថា បំណែកស្លាបយន្តហោះដែលបានរកឃើញនៅលើឆ្នេរកោះរ៉េអ៊ុយញ៉ុងកាលពីថ្ងៃទី២៩ កក្កដាកន្លងទៅពិតជារបស់យន្តហោះប៊ូអ៊ីង Malaysia Airline ដែលបានបាត់ខ្លួនកាលពីថ្ងៃទី៨ មីនា ឆ្នំា ២០១៤ ជាមួយនឹងអ្នកដំណើរចំនួន ២៣៩នាក់។ ការប្រកាសរបស់តុលាការបារំាងពេលនេះបានធ្វើឡើង ជិតមួយខែក្រោយពីការប្រកាសរបស់លោកនាយករដ្ឋមន្រ្តីម៉ាឡេស៊ី Najib Razak ក្នុងថ្ងៃព្រហស្បតិ៍ ទី៦ សីហាដែលថា បំណែកស្លាបយន្តហោះដែលបានរកឃើញនៅលើឆ្នេរកោះរ៉េអ៊ុយញ៉ុងទឹកដីបារំាងពិតជាស្លាបយន្តហោះប្រភេទប៊ូអ៊ីង ៧៧៧ របស់ Malaysia Airline មែន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៩
ការសន្និដ្ឋានប្រកបដោយសុទុដ្ឋិនិយមរបស់តុលាការបារំាងពេលនេះបានធ្វើឡើង ដោយសំអាងលើលទ្ធផលរបស់គណៈកម្មការចម្រុះអន្តរជាតិដែលមានតួនាទីជាអ្នកស៊ើបអង្កេត និងសិក្សាលើបំណែកស្លាបយន្តហោះដែលបានរកឃើញនៅលើឆ្នេរកោះរ៉េអ៊ុយញ៉ុងក្នុងទឹកដីបារំាងកាលពីថ្ងៃទី២៩ កក្កដាកន្លងទៅ។ គួររម្លឹកជូនថា បំណែកស្លាបយន្តហោះដែលបានរកឃើញនោះត្រូវបានគេយកទៅពិនិត្យពិច័យនៅក្នុងបន្ទប់ពិសោធន៍យោធាមួយដោយមានជំនួយពីក្រុមហ៊ុន Airbus Defense and Space ដែលជាក្រុមហ៊ុនផលិតគ្រឿងយន្តហោះជាច្រើនប្រភេទសម្រាប់ក្រុមហ៊ុនប៊ូអ៊ីង។ តុលាការបារំាងបានពន្យល់បកស្រាយនៅក្នុងសេចក្តីប្រកាសព័ត៌មានមួយថា មានលេខមួយក្នុងចំណោមលេខទំាងបីដែលអ្នកបច្ចេកទេសរបស់ក្រុមហ៊ុន Airbus Defense and Space បានរកឃើញនៅលើបំណែកស្លាបយន្តហោះ ពិតជាលេខរបស់ស្លាបយន្តហោះប៊ូអ៊ីង ៧៧៧ ដែលមានជើងហោះហើរលេខ MH៣៧០។
គឺតាមរយៈលទ្ធផលរបស់ក្រុមហ៊ុន Airbus Defense and Space នេះហើយដែលរដ្ឋអាជ្ញាបារំាងលោកហ្វ្រង់ស័រ ម៉ូឡាំងហ៊ានសន្និដ្ឋានច្បាស់ៗថា ចាប់ពីថ្ងៃនេះតទៅ គេអាចបញ្ជាក់ដោយសុទិដ្ឋិនិយមថា បំណែកស្លាបយន្តហោះដែលបានរកឃើញនៅលើឆ្នេរកោះរ៉េអ៊ុយញ៉ុងកាលពីថ្ងៃទី២៩ កក្កដាកន្លងទៅពិតជារបស់យន្តហោះប៊ូអ៊ីង Malaysia Airline មានជើងហោះហើរលេខ MH៣៧០ មែន។ គួររម្លឹកជូនថា កាលពីថ្ងៃទី៥ សីហាកន្លងទៅ រដ្ឋអាជ្ញារងបារំាងធ្លាប់បានប្រកាសឲ្យដឹងពីព័ត៌មានជាក់ច្បាស់ម្តងហើយ និងដែលរដ្ឋអំណាចម៉ាឡេស៊ីក៏ធ្លាប់បានសន្និដ្ឋានយ៉ាងដូចនេះដែរកាលពីជិត ១ខែមុន។
សូមជម្រាបជូនថា តំាងពីយន្តហោះម៉ាឡេស៊ីជើងហោះហើរលេខ MH៣៧០ បានបាត់ខ្លួនជាង ១ឆ្នំាមក បំណែកស្លាបយន្តហោះដែលបានរកឃើញនៅកោះរ៉េអ៊ុយញ៉ុងក្នុងខែកក្កដាកន្លងទៅ គឺជាបំណែកទី១ របស់ប៊ូអ៊ីង ៧៧៧ មានពាក់ស្លាកលេខ ៩M-MRO។ យន្តហោះនេះត្រូវបានក្រុមហ៊ុនប៊ូអ៊ីងប្រគល់ទៅឲ្យក្រុមហ៊ុន Malaysia Airline ក្នុងឆ្នំា ២០០២៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ