ប្រទេស Guatemala ចេញមុខគាំទ្រលោកត្រាំ រឿង Jerusalem
ដើម្បីបង្ហាញពីភក្តីភាពរបស់ខ្លួនចំពោះលោកប្រធានាធិបតីអាមេរិក ដូណាល់ ត្រាំ កាលពីថ្ងៃអាទិត្យ ប្រធានាធិបតីនៃប្រទេសហ្កាតេម៉ាឡា (Guatemala) លោក Jimmy Morales បានប្រកាសផ្លាស់ប្តូរស្ថានទូតរបស់ខ្លួនប្រចាំប្រទេសអ៊ីស្រាអែល ទៅកាន់ទីក្រុងហ្សេរុយសាឡឹម ដែរ។ ហ្កាតេម៉ាឡា ជាប្រទេសដំបូង ដែលចេញមុខចេញមាត់គាំទ្រលោកត្រាំ ខណៈប្រទេស ១២៨ទៀត បានទាត់ចោលការសម្រេចចិត្តរបស់អាមេរិក ដែលទទួលស្គាល់ហេ្សរុយសាឡឹម ជាទីក្រុងផ្តាច់មុខរបស់អ៊ីស្រាអែលនេះ។
ចុះផ្សាយនៅថ្ងៃ៖
ស្តាប់ - ០១:៣៦
បន្ទាប់ពីបាននិយាយស្រុះស្រួលគ្នាជាមួយនាយករដ្ឋមន្ត្រីអ៊ីស្រាអែល លោក ប៊ិនយ៉ាមីន នេតានយ៉ាហូ រួចហើយ លោក Jimmy Morales ប្រធានាធិបតីប្រទេសហ្កាតេម៉ាឡា បានសរសេរក្នុងទំព័រហ្វេសប៊ុករបស់លោកថា កម្មវត្ថុដ៏សំខាន់នាពេលនេះ គឺការផ្លាស់ប្តូរស្ថានទូតហ្កាតេម៉ាឡា ពីទីក្រុងតេល អាវីវ ទៅកាន់ទីក្រុងហ្សេរុយសាឡឹមវិញ។ តាមលោក Morales ការផ្លាស់ប្តូរនេះ គឺជាការចាប់ផ្តើមក្នុងការសម្របសម្រួលស្ថានការណ៍តានតឹង ដែលកំពុងតែកើតមានឡើង។
គួរកត់សម្គាល់ថា ការប្រកាសរបស់មេដឹកនាំប្រទេសហ្កាតេម៉ាឡា នាពេលនេះ បានធ្វើឡើងក្នុងឱកាសបុណ្យណូអែល ដែលជាបុណ្យសាសនាគ្រិស្តដ៏ធំ និងដ៏សំខាន់របស់ប្រជាជនប៉ាឡេស្ទីន។ ការប្រកាសនេះ ក៏ធ្វើឡើងតែប្រមាណ ៣ថ្ងៃ បន្ទាប់ពីសមាជិករបស់អង្គការសហប្រជាតិចំនួន ២ភាគ៣ បានបោះឆ្នោតជំទាស់ទៅនឹងការសម្រេចចិត្តរបស់លោកត្រាំ ដែលឲ្យអាមេរិកទទួលស្គាល់ហ្សេរុយសាឡឹម ជារដ្ឋធានីរបស់ប្រទេសអ៊ីស្រាអែល។
នៅក្នុងមហាសន្និបាតអង្គការសហប្រជាជាតិ កាលពីសប្តាហ៍មុន មានប្រទេសសរុបចំនួន ១២៨ប្រទេស បានបោះឆ្នោតប្រឆាំងនឹងការសម្រេចចិត្តរបស់លោកត្រាំ ដោយគេយល់ថា ការសម្រេចនេះ មិនស្ថិតនៅក្នុងក្របខណ្ឌនៃកិច្ចចរចាសន្តិភាព រវាងអ៊ីស្រាអែល និងប៉ាឡេស្ទីន នោះទេ។ យ៉ាងណាក៏ដោយ មានប្រទេសចំនួន ៨ បានបោះឆ្នោតគាំទ្រសហរដ្ឋអាមេរិក ដោយក្នុងនោះមានសុទ្ធសឹងតែប្រទេសដែលស្ថិតនៅតំបន់អាមេរិកកណ្តាល ដូចជាប្រទេសហ្កាតេម៉ាឡានេះ និងហុងដុយរ៉ា ជាដើម។
យ៉ាងណាក៏ដោយ ការបោះឆ្នោតនេះ ត្រូវបានគេមើលគេថា ដោយសារតែអាមេរិក គឺជាប្រទេសដៃគូផ្តល់ជំនួយដ៏ធំ ដល់ប្រទេសទាំងនោះ។ មិនត្រឹមតែប៉ុណ្ណោះ អាមេរិកក៏ជាប្រទេសជើងកាងមួយក្នុងតំបន់ ចំពោះដែនអាធិបតេយ្យរបស់ប្រទេសទាំងនោះផងដែរ។ មុនមហាសន្និបាតអង្គការសហប្រជាជាតិ លោកដូណាល់ ត្រាំ ធ្លាប់បានគម្រាមថា នឹងកាត់ផ្តាច់ជំនួយដល់ប្រទេសទាំងឡាយណា ដែលហ៊ានប្រឆាំងនឹងលោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ