ការស៊ើបអង្កេតគ្មានពន្លឺ ៣ឆ្នាំក្រោយឃាតកម្មលើអ្នកកាសែតបារាំងRFI នៅម៉ាលី
ថ្ងៃទី២ វិច្ឆិកា គឺជាទិវាសកលលោកប្រឆាំងនឹងនិទណ្ឌភាព នៃអំពើឧក្រិដ្ឋ ទៅលើអ្នកសារព័ត៌មាន។ អ្នកសារព័ត៌មាន ដែលមានតួនាទីសរសេរពាំនាំការពិត តែងតែយកអាយុជីវិតទៅប្តូរ ជាពិសេសនៅតាមប្រទេសដែលដឹកនាំដោយរបបផ្តាច់ការ រឺតំបន់ដែលមានសង្រ្គាម។ ថ្ងៃទី២វិច្ឆិកានេះដែរ កាលពី៣ឆ្នាំមុន អ្នកកាសែតវិទ្យុបារាំងអន្តរជាតិRFI ពីររូប ត្រូវបានគេសម្លាប់នៅប្រទេសម៉ាលី ក្នុងពេលដែលអ្នកទាំងពីរកំពុងចុះយកព័ត៌មាន ក្នុងពេលបោះឆ្នោតសភា។ រហូតមកដល់ពេលនេះ ការស៊ើបអង្កេតស្តីពីឃាតកម្មនេះ ហាក់គ្មានពន្លឺអ្វីទាល់តែសោះ ហើយគេកំពុងអស់ជំនឿចិត្តលើរដ្ឋាភិបាលបារាំង ដែលហាក់កំពុងលាក់លៀមការពិត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៤
ថ្ងៃទី២ វិច្ឆិកា ឆ្នាំ២០១៣ នៅតំបន់Kidal ប្រទេសម៉ាលី អ្នកកាសែតបារាំងពីររូប ដែលជាបុគ្គលិកនៃវិទ្យុបារាំងអន្តរជាតិRFI គឺលោកស្រី Ghislaine Dupont និងលោក Claude Verlon ត្រូវបានគេធ្វើឃាត។ អ្នកកាសែតទាំងពីរ បានធ្វើដំណើរទៅប្រទេសម៉ាលី ដើម្បីចុះធ្វើព័ត៌មានជាក់ស្តែង ស្តីពីការបោះឆ្នោតសភា។ រហូតមកដល់ពេលនេះ គេគ្រាន់តែដឹងថា អ្នកកាសែតទាំងពីររូប ត្រូវបានសម្លាប់ដោយក្រុមជីហាដអ៊ីស្លាម អាល់កាយដា នៅតំបន់ម៉ាហ្រ្គេប(Amiq)។ ក៏ប៉ុន្តែ គេគ្មានបានដឹងដំណឹងអ្វីទាំងអស់ ទាក់ទិននឹងដំណើរនៃការចាប់អ្នកកាសែតទាំងពីរ មុននឹងឈានទៅដល់ការសម្លាប់។ ជាងនេះទៅទៀត ការស៊ើបអង្កេត ហាក់នៅនឹងមួយកន្លែង ហើយរហូតមកទល់ពេលនេះ គ្មានជនដៃដល់ រឺជនសង្ស័យណាម្នាក់ត្រូវបានចាប់ខ្លួនឡើយ។
សមាគមមិត្តអ្នកកាសែតទាំងពីររូប បានបញ្ជាក់ថាពួកគេអស់សង្ឃឹមណាស់ ដោយឃើញរដ្ឋាភិបាល បិទមាត់ជិតលែងនិយាយស្តីអ្វីទាំងអស់។ ពួកគេយល់ថា រដ្ឋាភិបាលបារាំង ហាក់កំពុងលាក់លៀមអ្វីម្យ៉ាង មិនចង់ឲ្យគេដឹងស្តីពីហេតុការណ៍ឃាតកម្មនេះ។ ពេលវេលាដើរទៅមុខ រដ្ឋាភិបាលហាក់បានភ្លេចការសន្យារបស់ខ្លួន ទុកឲ្យក្រុមគ្រួសារជនរងគ្រោះ នៅតែមានចម្ងល់ មិនអាចកាត់ចិត្តធ្វើអហោសិកម្មបាន។
លោកស្រីMarie Solange Poinsot អាយុ៨៩ឆ្នាំ ត្រូវជាម្តាយរបស់លោកស្រី Ghislaine Dupont ដែលត្រូវគេសម្លាប់នោះ បានប្រាប់ឲ្យដឹងថា ៣ឆ្នាំមកនេះ គ្មាននរណាម្នាក់អាចប្រាប់លោកស្រីបានទេ ថានរណាជាអ្នកសម្លាប់កូនស្រីគាត់ ហើយសម្លាប់ដោយរបៀបណា។ ពេលខ្លះគាត់សឹងតែគិតថា គឺទាហានបារាំង ដែលបំពេញបេសកកម្មនៅម៉ាលីទេ ដែលជាអ្នកបាញ់សម្លាប់កូនស្រីគាត់ ដោយអចេតនា។ លោកស្រីយល់ថា ក្រសួងការពារជាតិបារាំង ហាក់កំពុងលាក់បាំងការពិតអ្វីមួយ បណ្តោយឲ្យពេលវេលាដើរទៅមុខ ដើម្បីឲ្យអ្នកពាក់ព័ន្ធបំភ្លេចចោល។ តែលោកស្រីមិនអាចភ្លេចបានទេ ព្រោះលោកស្រីត្រូវការដឹងការពិត មុននឹងបិទភ្នែកស្លាប់។
សូមបញ្ជាក់ថា ក្នុងពេលកើតហេតុក្នុងឆ្នាំ២០១៣ ទាហានបារាំងកំពុងមានវត្តមាននៅក្នុងប្រទេសម៉ាលី ដើម្បីបោសសម្អាតបណ្តាញឧទ្ទាមជីហាតអ៊ីស្លាម។ ក្នុងពេលនោះ ចំណាប់ខ្មាំងជនជាតិបារាំង៥រូប កំពុងស្ថិតក្នុងកណ្តាប់ដៃរបស់ក្រុមជីហាតអាល់កាយដាម៉ាហ្រ្គេប។ ទាហានបារាំងបានធ្វើបេសកកម្មរំដោះចំណាប់ខ្មាំងបាន៤នាក់ នៅថ្ងៃទី២៩ តុលា ឆ្នាំ២០១៣ ពោលគឺ៤ថ្ងៃមុនការធ្វើឃាតអ្នកកាសែតទាំងពីរ។ គេមិនទាន់ដឹងថាការរំដោះចំណាប់ខ្មាំងទាំង៤នេះ រដ្ឋាភិបាលបារាំង បានចំណាយប្រាក់ថ្នូរប៉ុន្មាននោះទេ ហើយគេក៏មិនដឹងថាអ្នកណាជាអ្នកដើរតួចរចា រវាងទាហានបារាំង និងក្រុមជីហាតដែរ។ ថ្ងៃទី៧វិច្ឆិកា ២០១៣ លោកហ្រ្វង់ស័រ ហូឡង់ខ្លួនឯងជាអ្នកនិយាយថា ក្រុមជីហាតដែលចាប់ចំណាប់ខ្មាំង គឺជាក្រុមតែមួយដែលសម្លាប់អ្នកកាសែតទាំងពីរ។
មានចំងល់ជាច្រើន ស្តីពីទំនាក់ទំនងរវាងហេតុការណ៍ទាំងពីរនេះ ព្រោះវាបានកើតឡើងនៅតំបន់តែមួយ ហើយខុសគ្នាតែ៤ថ្ងៃប៉ុណ្ណោះ។ តើអាចដែររឺទេ ដែរថាក្រុមជីហាតមិនបានទទួលប្រាក់ថ្នូរពីទាហានបារាំង ហើយបានធ្វើការសងសឹក ដោយសម្លាប់អ្នកកាសែតទាំងពីរ? ការពិតយ៉ាងណា មានតែក្រសួងការពារជាតិបារាំងតែប៉ុណ្ណោះ ដែលអាចប្រាប់បាន ព្រោះទាហានបារាំង ជាអ្នកមានវត្តមាននៅទីនោះ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ