រដ្ឋមន្ត្រីមហាផ្ទៃG7 បារម្ភខ្លាំងពីភេរវកម្ម ក្រោយការបែកសំបុក របស់ក្រុមជីហាតអង្គការរដ្ឋអ៊ីស្លាម នៅស៊ីរី និងអ៊ីរ៉ាក់
រដ្ឋមន្ត្រីក្រសួងមហាផ្ទៃ នៃប្រទេសមានសេដ្ឋកិច្ចនាំមុខទាំង៧ កំពុងជួបប្រជុំគ្នា នៅកោះភាគខាងត្បូងប្រទេសអ៊ីតាលី ដើម្បីនិយាយពីការសហការ ក្នុងការការពារសន្តិសុខផ្ទៃក្នុង។ ក្នុងនោះ បញ្ហាដ៏រសើប និងបន្ទាន់បំផុត គឺការសហការគ្នា ទប់ស្កាត់សកម្មភាពភេរវកម្ម របស់ក្រុមជីហាតអង្គការរដ្ឋអ៊ីស្លាម ដែលមាននៅពាសពេញពិភពលោក។ ជាងនេះ ទៅទៀត ក្រោយការវាយបំបែកសំបុកធំៗ របស់ក្រុមនេះ នៅស៊ីរី និងនៅអ៊ីរ៉ាក់ ក្រុមជីហាតរាប់ម៉ឺននាក់ អាចនឹងរត់ត្រលប់ ទៅធ្វើសកម្មភាពនៅតាមប្រទេសដើមរបស់ពួកគេ ឬប្រទេសផ្សេងទៀត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៤
ការទប់ស្កាត់អំពើភេរវកម្ម គឺជាការព្រួយបារម្ភធំបំផុត របស់រដ្ឋមន្ត្រីក្រសួងមហាផ្ទៃ នៃប្រទេសសេដ្ឋកិច្ចនាំមុខទាំង៧ ដែលកំពុងតែជួយប្រជុំគ្នា នៅលើកោះ Ischia ខាងមុខទីក្រុងNaples ប្រទេសអ៊ីតាលី។ នៅព្រឹក ថ្ងៃសុក្រនេះ រដ្ឋមន្ត្រីមហាផ្ទៃប្រទេសទាំង៧ មានបារាំង អាល្លឺម៉ង់ អង់គ្លេស អ៊ីតាលី សហរដ្ឋអាមេរិក ជប៉ុន កាណាដា និងដោយមានការចូលរួម ពីមន្ត្រីទទួលបន្ទុកកិច្ចការសន្តិសុខរបស់សហភាពអឺរ៉ុប និងតំណាង Interpol ផងនោះ នឹងពិភាក្សាគ្នា លើសំណុំរឿងទីមួយ ស្តីពីក្រុមបណ្តាញជីហាតអ៊ីស្លាមភេរវកម្ម ដែលអាចនឹងធ្វើសកម្មភាព គ្រប់ពេលវេលា និងគ្រប់ទីកន្លែង។
ទីក្រុងរ៉ាខា ក្នុងទឹកដីស៊ីរី ទើបតែត្រូវបានរំដោះមកវិញ ពីដៃក្រុមជីហាតអង្គការរដ្ឋអ៊ីស្លាម។ យ៉ាងហោចណាស់ មានជនជីហាត ប្រមាណពី ២៥០០០ ទៅ ៣០០០០នាក់ ដែលសុទ្ធតែជាជនជីហាត មកពីបរទេស ដែលបានរត់គេចចេញពីទីក្រុងនេះ។ ហើយក្នុងចំណោមនោះ មានយ៉ាងហោចណាស់ ៥០០០នាក់ ដែលមកពីទ្វីបអឺរ៉ុប។ ក្រុមជីហាតទាំងនេះ អាចនឹងត្រលប់ បញ្ច្រៀតខ្លួនទៅកាន់ប្រទេសដើម ឬប្រទេសផ្សេងទៀត ដើម្បីបន្តធ្វើសកម្មភាពភេរវកម្ម។
សំណុំរឿងទីពីរ គឺ ទាក់ទិនទៅនឹង សកម្មភាពភេរវកម្មម្យ៉ាងទៀត ដោយប្រើបច្ចេកវិទ្យាព័ត៌មានវិទ្យា ពោលគឺតាមប្រព័ន្ធអ៊ីនធើនែត។ កិច្ចប្រជុំនេះ ក៏បានទទួលការចូលរួម ពីតំណាង ក្រុមហ៊ុនបច្ចេកវិទ្យាធំៗ ដែលគ្រប់គ្រងវិស័យអ៊ីនធើនែត ដូចជាក្រុមហ៊ុន Google Facebook Microsoft និង Twetter ជាដើម។ លោករដ្ឋមន្ត្រីក្រសួងមហាផ្ទៃអ៊ីតាលី បានលើកឡើងថា គេត្រូវតែរកវិធី ដើម្បីធ្វើអន្តរាគមន៍ ទប់ស្កាត់ សកម្មភាពភេរវកម្ម គ្រប់រូបភាព ដោយលៃលកយ៉ាងណា មិនត្រូវឲ្យប៉ះពាល់ ដល់សិទ្ធិជាមូលដ្ឋាន របស់អ្នកប្រើប្រាស់ បណ្តាញសង្គមនានាឡើយ។
ទាក់ទិនទៅនឹង ការទប់ស្កាត់ភេរវកម្មជីហាតអ៊ីស្លាម ក្រុមរដ្ឋមន្ត្រីទាំង៧ប្រទេស សង្ឃឹមថា នឹងអាចឈានទៅដល់ការព្រមព្រៀងសហការគ្នា ផ្តល់ដំណឹងឲ្យគ្នា ឲ្យបានច្បាស់លាស់ និងទាន់ពេលវេលា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ