អ៊ុយក្រែន និងអាមេរិកផ្តើមលំហាត់សឹកនៅតំបន់សមុទ្រខ្មៅជិតគ្រីមេ
ដោយផ្សាយរូបភាពស្តីអំពីការចាប់ផ្តើមថ្ងៃទី៣១សីហានេះ នៃសមយុទ្ធ កងកម្លាំង អ៊ុយក្រែន ស.រ.អា. និង ប្រទេសឯទៀត របស់បក្សសម្ព័ន្ធអូតង់ នៅតំបន់សមុទ្រខ្មៅ ជិតគ្រីមេ ជាទៀបកោះ ដែលឆ្នាំមុនត្រូវបានម៉ូស្គូ ផ្តាច់ចេញពីអ៊ុយក្រែន ភ្ជាប់ជាដែនដីឧបសម្ព័ន្ធរបស់រុស្ស៊ីទូរទស្សន៍រុស្ស៊ី សង្កត់ធ្ងន់ថា គោលដៅលំហាត់សឹកនេះ គឺព្រមានក្រុងម៉ូស្គូត្រង់ៗ។ លំហាត់នេះ ដែលនឹងពន្យារទៅដល់ថ្ងៃ១២កញ្ញា មានឈ្មោះថា Sea Breeze-2015។
ចុះផ្សាយនៅថ្ងៃ៖
ស្តាប់ - ០១:៥៦
បាវចនាជាផ្លូវការ ប្រកាសដោយលំហាត់សឹក Sea Breeze-2015 គឺ” សមជើងបំពេញ ប្រតិបត្តិការ ខាងធានាសន្តិសុខ នៅត្រង់តំបន់ដែលមានវិបត្តិ”។ សមយុទ្ធនេះប្រព្រឹត្តទៅ ក្នុងលំហសមុទ្រខ្មៅ ប្រវែង ៤០០គ.ម. តាមបណ្តោយឆ្នេរអ៊ុយក្រេន មិនឆ្ងាយប៉ុន្មានពី ទៀបកោះគ្រីមេ។ តាមដែលប្រព័ន្ធផ្សព្វផ្សាយនៅម៉ូស្គូកត់សម្គាល់ សមយុទ្ធ Sea Breeze លើកនេះ គឺធំជាងពេលមុនៗទាំងអស់ ដោយមានការចូលរួមនៃ យោធាដល់ទៅ ២.៥០០នាក់ ពីក្នុងនោះ ១.០០០នាក់មកពីស.រ.អា. ១.០០០នាក់ដែរ តំណាងឲ្យអ៊ុយក្រែន ហើយ ៥០០នាក់ តំណាងឲ្យ ប្រទេសឯទៀត សមាជិកបក្សសម្ព័ន្ធអូតង់ បែបយ៉ាង អាល្លឺម៉ង់ ប៊ុលហ្ការី ក្រិក អ៊ីតាលី រូម៉ានី អង់គ្លេស តួកគី និងប្រទេសដៃគូ បែបយ៉ាង ស៊ុយអែត និងម៉ុលដាវី។
ចំណែកសព្វាវុធ ដែលដាក់ឲ្យសកម្មក្នុងសមយុទ្ធ សរុបទៅមានជាង ១៥០គ្រឿង ក្នុងនោះ គឺ នាវាលើទឹក នាវាមុជទឹក ឧទ្ធមា្ភគចក្រ យន្តហោះ ព្រមទាំង យានយន្តចម្បាំងប្លែកៗ។ អ្វីដែលគួរឲ្យចាប់អារម្មណ៍ គឺ ស.រ.អា. បានបញ្ជូនទៅ សកម្មក្នុងលំហាត់សឹកនេះគឺ នាវាពិឃាដ Donald Cook និង យន្តហោះ Lockheed P -3 C Orion ដែលអាចពាំផ្ទុកអាវុធនុយក្លេអ៊ែរ។ នាវាពិឃាដ Donald Cook បំពាក់ដោយមីស្ស៊ីលធុន Aegis ដែលអាចស្កាត់ចាប់ រាល់កាំជ្រួច យុទ្ធសាស្ត្រ និងកាំជ្រួចបណ្តែតហៅថា Cruise ធុន Tomahawk ដែលជួនកាលបំពាក់ដោយ ក្បាលនុយក្លេអ៊ែរទៅផង។
រីឯយន្តហោះ Lockheed P -3 C Orion គឺ ទុកសម្រាប់បំពេញ ប្រតិបត្តិការឈ្លបការណ៍ ហើយ ក៏អាចផ្ទុកទៅដោយ គ្រាប់បែកនុយក្លេអ៊ែរដែរ។ សមយុទ្ធក្នុង១២ថ្ងៃទៅមុខ គឺឧទ្ទិសដល់បេសកកម្មខាងស្កាត់ចាប់ ខាងប្រយុទ្ធទល់នឹង នាវាមុជទឹក និងនាវាលើផ្ទៃទឹក ព្រមទាំងសម្រាប់ ស្វែងរកនិងសង្គ្រោះអ្នកដែលធ្លាក់ក្នុង អាសន្នអន្ធក្រ ក្នុងសមុទ្រ។ លំហាត់សឹក Sea Breeze-2015 តាំងគោលដៅ កែឲ្យប្រសើរឡើង កិច្ចសហប្រតិបត្តិការរវាង កងម៉ារីនអ៊ុយក្រែន និង កងនាវាបក្សសម្ព័ន្ធអូតង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ