បារំាង៖ក្រុមអ្នកជំនាញផ្តើមវិភាគលើបំណែកស្លាបយន្តហោះដែលរកឃើញនៅរ៉េអ៊ុយញ៉ុង
នៅរសៀលថ្ងៃពុធ ទី៥ សីហា ក្រុមអ្នកស៊ើបអង្កេត និងក្រុមអ្នកជំនាញបារំាង រួមទំាងប្រទេសមួយចំនួនផងបានផ្តើមការងារវិភាគលើបំណែកស្លាបយន្តហោះប្រភេទប៊ូអ៊ីង ៧៧៧ ដែលបានរកឃើញនៅឆ្នេរសមុទ្រនៃកោះរ៉េអ៊ុយញ៉ុងក្នុងទឹកដីបារំាងកាលពី ១សប្តាហ៍កន្លងទៅ។ ការងារវិភាគលើបំណែកយន្តហោះនោះបានរៀបចំធ្វើនៅក្នុងបន្ទប់ពិសោធន៍យោធាមួយក្នុងខេត្តទូលូ ប្រទេសបារំាង។ កម្មវត្ថុគឺដើម្បីចង់ដឹងថា តើជាស្លាបយន្តហោះរបស់ Malaysia Airline ដែលបានបាត់ខ្លួនតំាងពីខែមីនា ឆ្នំា ២០១៤ ឬអត់?
ចុះផ្សាយនៅថ្ងៃ៖
ស្តាប់ - ០១:៥០
គឺនៅវេលាម៉ោង ២រសៀលម៉ោងក្នុងប្រទេសបារំាងនាថ្ងៃពុធ ទី៥ សីហាដែលក្រុមអ្នកស៊ើបអង្កេត និងក្រុមអ្នកជំនាញបារំាងរួមសហការណ៍ជាមួយប្រទេសម៉ាឡេស៊ី ចិន និងអាមេរិកំាងបានផ្តើមការងារវិភាគលើបំណែកយន្តហោះដែលបានរកឃើញលើឆ្នេរសមុទ្រកោះរ៉េអ៊ុយញ៉ុងក្នុងទឹកដីបារំាងកាលពី១សប្តាហ៍កន្លងទៅ។ ការងារវិភាគនឹងត្រូវធ្វើឡើងជា ៣ដំណាក់កាលខុសគ្នា។ នៅក្នុងជំហានទី១ ក្រុមអ្នកជំនាញនឹងធ្វើការផ្ទៀងផ្ទាត់ពីធម្មជាតិពិតរបស់បំណែកស្លាបយន្តហោះនោះដើម្បីបញ្ជាក់ថា គឺពិតជាបំណែកស្លាបយន្តហោះរបស់ប៊ូអ៊ីង ៧៧៧ មែន។ នៅក្នុងជំហានទី២ និងបន្ទាប់ពីមានការបញ្ជាក់ថាជាបំណែកស្លាបយន្តហោះរបស់ប៊ូអ៊ីង ៧៧៧ មក ក្រុមអ្នកជំនាញនឹងបន្តព្យាយាមចង់ដឹងថា តើវាជារបស់ក្រុមហ៊ុនអាកាសចរណ៍ Malaysia Airline ឬអត់។
គួរជម្រាបជូនថា ស្លាកស្នាមដែលបានធ្វើឲ្យក្រុមអ្នកជំនាញផ្តោតអារម្មណ៍ខ្លំាងជាងគេនៅលើបំណែកស្លាបយន្តហោះនោះ គឺថ្នំាលាប ព្រោះក្រុមហ៊ុនអាកាសចរណ៍របស់ប្រទេសនីមួយៗបានកម្ម៉ង់ឲ្យក្រុមហ៊ុនផលិតយន្តហោះលាបថ្នំាពណ៌ខុសៗគ្នាទៅតាមការចង់បានរបស់ខ្លួន។ ទន្ទឹមគ្នានេះ ក្រុមអ្នកជំនាញក៏ចាប់អារម្មណ៍លើចំណារ និងអក្សរដែលមានសរសេរលើបំណែកស្លាបយន្តហោះនោះ។ រូបមន្ត និងប្រភេទអក្សរដែលចារ និងសរសេរលើបំណែកស្លាបយន្តហោះនោះអាចឲ្យគេដឹងពីប្រភពដើមរបស់យន្តហោះ ពិសេសថាតើបំណែកស្លាបយន្តហោះនោះ ពិតជារបស់យន្តហោះ Malaysia Airline ជើងហោះហើរលេខ MH៣៧០ ដែលបានបាត់ខ្លួនកាលពីខែមីនា ឆ្នំា ២០១៤ ឬអត់។
ចំណែកនៅក្នុងជំហានទី៣ ក្រុមអ្នកជំនាញនឹងផ្តើមសិក្សា វិភាគដើម្បីចង់ដឹងពីមូលហេតុពិតនៃគ្រោះថ្នាក់របស់យន្តហោះនោះ ពោលចង់ថា តើយន្តហោះនោះបានជួបគ្រោះថ្នាក់ផ្ទុះឆេះនៅពេលកំពុងហោះហើរ ឬមួយក៏បានផ្ទុះឆេះនៅពេលធ្លាក់ទៅប៉ះនឹងផ្ទៃទឹកសមុទ្រ។ យ៉ាងណាក៏ដោយ លទ្ធផលនៃការសិក្សា វិភាគនឹងត្រូវគេប្រកាសឲ្យដឹងនៅប៉ុន្មានថ្ងៃខាងមុខនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ