នៅក្នុងខួបគម្រប់ ៧០ឆ្នាំ អង្គការអូតង់ព្យាយាមស្តារឯកភាពដែលបានបាត់បង់
ចុះផ្សាយនៅថ្ងៃ៖
ស្តាប់ - ០៦:៣៩
ថ្ងៃពុធ ទី៤ ធ្នូនេះជាថ្ងៃទី២ និងជាថ្ងៃចុងក្រោយនៃជំនួបកំពូលអង្គការអូតង់ ឬណាតូ។ មានការកត់សម្គាល់ចំនួនពីរនៅក្នុងជំនួបកំពូលអូតង់ឆ្នាំ ២០១៩ ទី១ គឺដើម្បីឧទ្ទិសដល់ខួបកំណើត ៧០ឆ្នាំ និងទី២ ចំពេលដែលអូតង់កំពុងជួបការបែកបាក់ និងការប្រទាញប្រទង់ផ្ទៃក្នុងយ៉ាងខ្លាំង ពិសេសតាំងពីលោកដូណាល់ ត្រាំបានឡើងកាន់តំណែងប្រធានាធិបតីអាមេរិក។ ទោះជាយ៉ាងនេះក្តី អង្គការដែលទទួលមរតកពីសង្រ្គាមត្រជាក់មួយនេះព្យាយាមបង្ហាញជំហរសាមគ្គី និងព្យាយាមស្តារឯកភាពដែលបានបាត់បង់។ តើ ៧០ឆ្នាំក្រោយមក អង្គការអូតង់នៅបន្តមានទឹកមាត់ប្រៃ និងឥទ្ធិពលទៀតដែរ ឬទេ?។
អង្គការអូតង់ ឬណាតូបានប្រសូត្រចេញក្នុងថ្ងៃទី៤ មេសា ឆ្នាំ ១៩៤៩ ហើយបានប្រារព្ធពិធីនេះកាលពីថ្ងៃទី៤ មេសា ឆ្នាំ ២០១៩ នៅលើទឹកដីអាមេរិកាំងដោយមានការចូលរួមត្រឹមថ្នាក់រដ្ឋមន្រ្តីការបរទេសរបស់សមាជិកទាំង ២៩ប្រទេស។ អូតង់ ឬណាតូបានប្រសូត្រឡើងនៅក្រោយការបិទបញ្ចប់សង្រ្គាមលោកលើកទី២ ដោយមានកម្មវត្ថុការពារសន្តិសុខ និងសុវត្ថិភាពបស្ចិមលោកប្រឈមនឹងការឈ្លានពានរបស់ចក្រព័ទ្ធអាឡឺម៉ង់ និងមហិច្ឆតារបស់សហភាពសូវៀត។ តែតំាងពីជញ្ជាំងក្រុងប៊ែរឡាំងដួលរលំក្នុងឆ្នាំ ១៩៨៩ និងតាំងពីការដួលរលំសហភាពសូវៀតក្នុងឆ្នំា ១៩៩១មក អង្គការពុហុជាតិដែលទទួលមរតកពីសង្រ្គាមត្រជាក់មួយនេះបាន និងកំពុងប្រឈមមុខនឹងនឹងការគំរាមកំហែងថ្មីៗទៀតនៅក្នុងលោកនាសតវត្សទី២១។
ការគំរាមកំហែងថ្មីទាំងនោះ រួមមាន ការគំរាមកំហែងភេរវនិយមតាមប្រព័ន្ធព័ត៌មានវិទ្យា ការវាយប្រហារពីចោរសមុទ្រ ការគំរាមកំហែងរបស់ពួកជីហាតអង្គការរដ្ឋអ៊ីស្លាម។ លើសពីនេះ អូតង់ដែលបច្ចុប្បន្នមានសមាជិកដល់ទៅ ២៩ប្រទេសដែលខ្លះជាប្រទេសមហាអំណាចគ្រាក់ៗក៏កំពុងប្រឈមនឹងឥទ្ធិពលរបស់រុស្ស៊ី និងចិនដែលមិនមែនជាប្រទេសសមាជិក។ រុស្ស៊ីដែលសព្វថ្ងៃបានចូលប្រឡូកកាន់តែខ្លាំងនៅលើឆាកអន្តរជាតិ ហើយចិនជាប្រទេសដែលមានថវិកាយោធាលំដាប់ទី២ ក្នុងលោក បន្ទាប់ពីសហរដ្ឋអាមេរិក។ សមាជិកអូតង់ភាគច្រើនយល់ថា វាល្មមដល់ពេលដែលអូតង់ត្រូវធ្វើកំណែទម្រង់ដើម្បីឆ្លើយតបនឹងបរិបទពិភពលោកសព្វថ្ងៃ។
អង្គការអូតង់យល់ព្រមកាត់បន្ថយការចូលវិភាគទានរបស់អាមេរិក
កំណែទម្រង់របស់អង្គការចំណាស់ ៧០ឆ្នាំមួយនេះមានតាំងពីការសើរើពិនិត្យមើលឡើងវិញលើយុទ្ធសាស្រ្ត និងចំណែកវិភាគទានដែលប្រទេសសមាជិកនីមួយៗត្រូវបង់។ វិភាគទានដែលប្រទេសសមាជិកនីមួយៗត្រូវបង់ជាវិភាគទានប្រចាំឆ្នាំ ហើយចំនួនទឹកប្រាក់ដែលត្រូវបង់ គឺគិតគូរទៅតាមទំហំសេដ្ឋកិច្ចរបស់ប្រទេសសមាជិកនីមួយៗ។ គោលការណ៍នេះមានចែងច្បាស់នៅក្នុងច្បាប់ផ្ទៃក្នុងរបស់អង្គការអូតង់។ បច្ចុប្បន្ន អាមេរិកម្នាក់ឯងបានផ្តល់ ២២,១% នៃថវិកាសរុបរបស់អង្គការអូតង់ ហើយសមត្ថភាពយោធាក្នុងកម្លាំងអូតង់ដល់ទៅ ៧៥% ត្រូវបានធានារ៉ាប់រងដោយទាហានអាមេរិក។ តែតាំងពីលោកដូណាល់ ត្រាំក្លាយជាប្រធានាធិបតីអាមេរិក លោកត្រាំបានទាមទារឲ្យប្រទេសសមាជិកផ្សេងបង់វិភាគបន្ថែមដោយលោកចោទជាសំណួរថា តើវាសក្តិសមឬទេដែលអាមេរិកត្រូវចេញលុយច្រើនជាងអ្នកផ្សេងដើម្បីការពារអ្នកផ្សេង?។
ក្នុងថ្ងៃទី២៨ វិច្ឆិកាថ្មីៗនេះ សមាជិកទាំង ២៩ប្រទេសបានព្រមព្រៀងគ្នាកាត់បន្ថយការបង់វិភាគទានរបស់អាមេរិកពី ២២,១% មកនៅត្រឹម ១៦,៣៥%។ ចំណែកអាល្លឺម៉ង់នឹងដំឡើងឲ្យដល់កម្រិតដូចអាមេរិក ហើយប្រទេសសមាជិកផ្សេងបានយល់ព្រមចូលរួមបន្ថែមទៀត។ គួររម្លឹកថានៅក្នុងជំនួបកំពូលកាលពីឆ្នាំ ២០១៤ ប្រទេសសមាជិកអូតង់បានឯកភាពដំឡើងថវិកាយោធារបស់ខ្លួនឲ្យបាន ២% នៃផលិតផលសរុបក្នុងស្រុកពីពេលនេះដល់ឆ្នាំ ២០២៤។ តែគិតត្រឹមឆ្នាំ ២០១៩ នេះ ទើបមាន ៨ប្រទេសប៉ុណ្ណោះដែលសម្រេចបានកម្មវត្ថុមួយនេះ គឺអាមេរិក ក្រិច អេស្តូនី លីទុយអានី ឡេតូនី អង់គ្លេស រូម៉ានី និងប្រទេសប៉ូឡូញ។
ឯកភាពជាអាទិភាពរបស់អង្គការអូតង់
អ្វីដែលគ្រប់គ្នាចង់បាននៅក្នុងជំនួបកំពូលអូតង់ពឹលនេះ គឺឯកភាពផ្ទែក្នុង បន្ទាប់ពីផ្ទុះសង្រ្គាមពាក្យសម្តីយ៉ាងផុសផុលរវាងតួអង្គ ៣ រូប គឺប្រធានាធិបតីបារាំងលោកម៉ាក្រុង សមភាគីអាមេរិកលោកដូណាល់ ត្រាំ និងសមភាគីតួកគីលោកអ៊ែរដូហ្កាន។ អ្វីៗបានផ្តើមដំបូងពីលោកម៉ាក្រុងដែលបានចាត់ទុកអង្គការអូតង់ជាស្ថាប័នស្លាប់ និងដែលលោកត្រាំបានវាយបកវិញដោយចាត់ទុកសម្តីរបស់លោកម៉ាក្រុងថាជាការជេរប្រមាថលើអង្គការអូតង់។ តែនៅក្នុងជំនួបជាមួយលោកត្រាំ លោកម៉ាក្រុងមិនសោកស្តាយនូវអ្វីដែលលោកបាននិយាយ និងនៅតែប្រកាន់សំដីដើមរបស់លោកដដែល។ បន្ទាប់មក លោកម៉ាក្រុងក៏បានលើកឡើងពីករណីតួកគីដែលជាសមាជិកអូតង់ម្នាក់ដែលលោកសង្កេតឃើញថា បានធ្វើអ្វីស្រេចនឹងចិត្តដោយមិនបានពិគ្រោះយោបល់ជាមួយអ្នកផ្សេង។
លោកម៉ាក្រុងបានលើកឡើងពីអន្តរាគមន៍យោធារបស់តួកគីលើពួកគួដឌីស្ថានស៊ីរីដែលជាសម្ព័ន្ធមិត្តរបស់បស្ចិមលោកនៅក្នុងយុទ្ធនាការប្រឆាំងអង្គការរដ្ឋអ៊ីស្លាម និងបានចោទតួកគីពីបទរួមសហការណ៍ជាមួយក្រុមជ្រុលនិយមដែលស្និទ្ធនឹងពួកជីហាតអង្គការរដ្ឋអ៊ីស្លាម។ ជាប្រតិកម្មតបវិញ ប្រធានាធិបតីតួកគីលោកអ៊ែរដូហ្កានបានបញ្ជាក់ថា គឺលោកម៉ាក្រុងដែលមានស្ថានភាពដូចមនុស្សស្លាប់ ពោលមិនមែនអង្គការអូតង់ទេ។ អ្វីដែលគ្រប់គ្នាបារម្ភពេលនេះ គឺការដែលលោកអ៊ែរដូហ្កានរារាំងមិនឲ្យអូតង់អនុម័តលើផែនការ ការពារក្រុមប្រទេសបាល់ទិច និងប្រទេសប៉ូឡូញ រួមទាំងការបិទខ្ទប់មិនឲ្យអូតង់អាចចេញសេចក្តីថ្លែងការណ៍រួមមួយ។ តែប្រមុខអង្គការអូតង់លោក Jens Stoltenberg ហាក់មិនបានភ្ញាក់ផ្អើលនឹងសង្រ្គាមពាក្យសម្តីពេលនេះទេលោកយល់ថា នេះមិនមែនជាលើកទី១ ដែលអូតង់បានប្រឈមនឹងភាពមិនចុះសម្រុងគ្នា និងការយល់ឃើញមិនដូចគ្នា។
លោក Stoltenberg មានជំនឿថា អូតង់អាចនឹងឯកភាពគ្នាលើផែនការស្តីពីការការពារ និងយុទ្ធសាស្រ្តថ្មី។ ចំណែកនាយករដ្ឋមន្រ្តីអង់គ្លេសលោកបូរីស ចនសុនបានថ្លែងថា វាពិតជាសំខាន់ខ្លាំងណាស់ដែលអូតង់ត្រូវបន្តរួមសាមគ្គីគ្នាដោយលោកសម្លឹងឃើញថា សំណុំរឿងដែលធ្វើឲ្យអូតង់រួបរួមគ្នាមានច្រើនជាងសំណុំរឿងដែលធ្វើឲ្យអូតង់បែកបាក់គ្នាទៅទៀត។ តាមលោកចនសុន សមាជិកអូតង់ម្នាក់ៗសុទ្ធតែទទួលស្គាល់ដូចគ្នាពីសារៈសំខាន់របស់អូតង់ដើម្បីការពារសន្តិសុខរួមទាំងអស់គ្នា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ