សន្និសីទអាកាសធាតុCOP25 ៖ ចង់បង្កើនមហិច្ឆតា និងរំពឹងលើសហភាពអឺរ៉ុប
ចុះផ្សាយនៅថ្ងៃ៖
ស្តាប់ - ០៦:១៨
មនុស្សជាតិដែលកំពុងរងឥទ្ធិពលនៃការប្រែប្រួលអាកាសធាតុ បន្តសកម្មភាពបំផ្លាញផែនដី ជិតដល់កំរិតស្តារលែងរួចហើយ។ សន្និសីទអង្គការសហប្រជាជាតិស្តីអំពីអាកាសធាតុ លើកទី២៥(COP25) ដែលត្រូវចាប់បើកនៅថ្ងៃចន្ទទី ២ធ្នូនេះ សម្រាប់រយៈពេលពីរសប្តាហ៍ នៅទីក្រុងម៉ាឌ្រីដ ក៏ទំនងជាមិនអាចរកចម្លើយឃើញសម្រាប់ឆ្លើយតបទៅនឹងសេចក្តីទទូចអំពាវនាវឱ្យពិភពលោកបញ្ចេញសកម្មភាពភ្លាមនិងយ៉ាងបន្ទាន់ ដើម្បីស្រោចស្រង់ភពផែនដីទេ។
គួរសរសើរអេស្ប៉ាញដែលសុខចិត្តធ្វើជាម្ចាស់ផ្ទះរៀបចំសន្និសីទអង្គការសហប្រជាជាតិស្តីពីអាកាសធាតុលើកទី២៥នេះ បើទោះបីជាមានពេលតែ៤សប្តាហ៍ សម្រាប់ត្រៀមខ្លួនទទួលភ្ញៀវ ២៩០០០នាក់ មកពី១៩៦ប្រទេស ផ្ទេរពីក្រុងសង់ត្យាហ្គោមក ក៏ដោយ។ សន្និសីទប្តូរកន្លែង តែ មិនបានប្តូរផ្លាស់កម្មវត្ថុ ទេ ៖ សន្និសីទត្រូវពិភាក្សាអំពីការបង្កើតមូលនិធិថ្មីដើម្បីជួយប្រទេសរងគ្រោះ ព្រោះមូលនិធិចាស់លែងគ្រប់គ្រាន់ហើយ បើយោលទៅគ្រោះមហន្តរាយដែលកាន់តែធ្ងន់ធ្ងរជាលំដាប់ និងអំពីសកម្មភាពដោះស្រាយ។
តាំងពីមួយឆ្នាំមកនេះ ក្រុមប្រទេសហត្ថលេខីនៃកិច្ចព្រមព្រៀងអាកាសធាតុក្រុងប៉ារីស រងសម្ពាធខ្លាំងជាងពេលណាៗទាំងអស់ របាយការណ៍វិទ្យាសាស្ត្របង្ហាញពីលទ្ធផលដ៏អាសន្ននៃអាកាសធាតុ ពលរដ្ឋបើកយុទ្ធនាការស៊ីវិលមិនស្តាប់បង្គាប់អាជ្ញាធរដើម្បីអាកាសធាតុ ក្មេងៗកូនសិស្សនាំគ្នាគេចសាលាដើម្បីដើរដង្ហែក្បួនទាមទារឱ្យរដ្ឋាភិបាល ថ្នាក់ដឹកនាំគិតគូរអំពីអាកាសធាតុ ... គំនាបសង្គមមិនធ្លាប់មាននេះ បានរុញច្រាននៅទីបំផុតពួកគេមកចូលរួមក្នុងសន្និសីទ២សប្តាហ៍ ក្នុងស្មារតីតែមួយ គឺ ដល់វេលាត្រូវធ្វើ #TimeforAction។
ភាពបន្ទាន់អាកាសធាតុមានកាន់តែខ្លាំងមែន រហូតដល់ថ្នាក់គ្រប់ប្រតិភូ គ្រប់អ្នកសង្កេតការណ៍ និងអគ្គលេខាធិការអង្គការសហប្រជាជាតិផ្ទាល់តែម្តង ចេះនិយាយតែពាក្យមួយឃ្លា ថា « ត្រូវបង្កើនមហិច្ឆតា បង្កើនកិច្ចខំប្រឹងប្រែងស្វែងរកការព្រមព្រៀងគ្នា សម្រេចកម្មវត្ថុបញ្ចេញសកម្មភាពសម្រាប់អនាគតខ្លី ត្រឹមឆ្នាំ២០៣០ និងវែងនៅឆ្នាំ ២០៥០។ ពីពេលនេះដល់ចុងឆ្នាំ២០២០ រដ្ឋជាសមាជិកអង្គការសហប្រជាជាតិត្រូវតែលើផែនការថ្មីប្រកបដោយមហិច្ឆតា ជាងអ្វីដែលចែងក្នុងកិច្ចព្រមព្រៀមអាកាសធាតុក្រុងប៉ារីស ឱ្យបាននៅCOP26។” នៅមួយឆ្នាំមុនឱសានវាទ មានតែប្រទេសមួយគត់ ដែលបានលើកផែនការថ្មីមកបង្ហាញនោះគឺប្រទេសកូនកោះMarshall។ ៨០ប្រទេសដែលតំណាង៧%នៃការបញ្ចេញឧស្ម័នផ្ទះកញ្ចក់សន្យាប្រគល់ផែនការឱ្យមុនដំណាច់ឆ្នាំក្រោយ។ ចំណែកក្រុមមហាអំណាចអ្នកបំពុលនិងបញ្ចេញឧស្ម័នកាបូនិកដល់ទៅ៨០% អត់ធ្វើឮសោះ។ ខ្លះទៀតបានបដិសេធតែម្តង ឧទាហរណ៍ជប៉ុន។
ប្រធានាធិបតីបារាំងក៏អវត្តមានជាលើកទីពីរ
ការបញ្ចេញសកម្មភាពដើម្បីអាកាសធាតុត្រូវការការចូលរួមជាលក្ខណៈពហុជាតិ។ ប៉ុន្តែបរិបទភូមិសាស្ត្រនយោបាយកំពុងរារាំងសកម្មភាពនេះយ៉ាងខ្លាំង។ សហរដ្ឋអាមេរិករបស់លោកដូណាល់ត្រាំ បានផ្តើមនីតិវិធីដកខ្លួនចេញកិច្ចព្រមព្រៀងអាកាសធាតុក្រុងប៉ារីសជាផ្លូវការ។ ប្រេស៊ីលមានប្រធានាធិបតីប្រឆាំងអាកាសធាតុបដិសេធមិនព្រមរៀបចំCOP25 តែម្តង។ ហើយជាមួយ អូស្ត្រាលី ក្រោមការដឹកនាំរបស់នាយករដ្ឋមន្ត្រីអភិរក្សនិយម ទាំងពីរប្រទេសនេះមិនមកចូលរួមក្នុងជំនួបប្រជុំអាកាសធាតុនៅអង្គការសហប្រជាជាតិទេកាលពីខែកញ្ញា។
នៅថ្ងៃនេះ ថ្ងៃបើកសន្និសីទអន្តរជាតិ មានប្រមុខរដ្ឋ-រដ្ឋាភិបាល តែជាងសែសិបប្រទេសប៉ុណ្ណោះមកចូលរួម។ លោកម៉ាក្រុង ជាប្រធានាធិបតីបារាំង ដែលអវត្តមានម្តងកាលពីCOP24 អវត្តមានទៀតនៅលើកនេះ។ ប៉ុន្តែគេទំនងជាអាចរំពឹងលើសហភាពអឺរ៉ុប។ ឥលូវនេះគ្រប់ចក្ខុកំពុងបង្វិលទៅរកសហភាពអឺរ៉ុប ដែលក៏ជាអ្នកបញ្ចេញឧស្ម័នផ្ទះកញ្ចក់លំដាប់ទីបីពិភពលោក បន្ទាប់ពីចិននិងសហរដ្ឋអាមេរិក។ សភាថ្មីរបស់អឺរ៉ុប ទើបនឹងបោះឆ្នោតអនុម័តទទួលស្គាល់អំពីភាពបន្ទាន់អាកាសធាតុកាលពីថ្ងៃទី២៨វិច្ឆិកាផង។
ក្តីរំពឹងលើសហភាពអឺរ៉ុប
សហភាពអឺរ៉ុបដែលទើបមានគណៈកម្មការនិងមេដឹកនាំថ្មី ចូលកាន់តំណែងជាផ្លូវការនៅថ្ងៃ ទី ១ធ្នូម្សិលមិញ គឺជាសេចក្តីសង្ឃឹមថ្មីរបស់ក្រុមអ្នកការពារបរិស្ថាននិងអាកាសធាតុ។ ប្រធានគណៈកម្មការអឺរ៉ុបថ្មីលោកស្រី Ursula von der Leyen បានសន្យាលុបបំបាត់ការបញ្ចេញឧស្ម័នពុលកាបូន ឱ្យដល់កំរិតសូន្យនៅឆ្នាំ ២០៥០។ លោកស្រីបានគាំទ្រផែនការកាត់បន្ថយ៥០ទៅ៥៥% ការបញ្ចេញឧស្ម័នផ្ទះកញ្ចក់ក្នុងសហភាពអឺរ៉ុប ពីពេលនេះដល់ឆ្នាំ២០៣០ ទល់នឹង៤០%ក្នុងផែនការបច្ចុប្បន្ន។ កម្មវត្ថុមានចែងក្នុងផែនការអាកាសធាតុអឺរ៉ុប Green deal Européen ដែលនឹងក្លាយជាទៅច្បាប់អាកាសធាតុដំបូងរបស់អឺរ៉ុប។ តែផែនការនេះនឹងត្រូវលើកបង្ហាញនៅថ្ងៃទី ១១ធ្នូ ត្រូវជាពីរថ្ងៃមុនជំនួបក្រុមប្រឹក្សាអឺរ៉ុប និងត្រូវជាពីរថ្ងៃមុនការបិទបញ្ចប់សន្និសីទ និងផ្សព្វផ្សាយជាសាធារណៈនៅចុងខែតុលាឆ្នាំ២០២០។ គិតមកទល់ពេលនេះ មានសមាជិកសហភាពអឺរ៉ុប ២៤ប្រទេសបានគាំទ្រ បីប្រឆាំង (ប៉ូឡូញ ឆែក និងហុងគ្រី)។
ប្រសិនបើច្បាប់អាកាសធាតុអឺរ៉ុបសម្រេចជារូបរាងបាន នោះចិនទំនងជាអាចសម្រេចបោះជំហានថ្មីទៅមុខក្នុងវិស័យអាកាសធាតុនេះដែរ។ ជំនួបកំពូលចិន-អឺរ៉ុប គ្រោងនឹងប្រព្រឹត្តទៅខែតុលាឆ្នាំ២០២០ ដើម្បីចរចាររកកិច្ចព្រមព្រៀងអាកាសធាតុ ចិន-អឺរ៉ុប។ ការចរចាដែលបារាំងចង់ជំរុញបន្ថែមចាប់ពីខែខាងមុនតែម្តង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ