Brexit ៖ អឺរ៉ុបព្រមពន្យារពេលឱ្យអង់គ្លេស យ៉ាងយូរបីខែ
សមាជិកសហភាពអឺរ៉ុបទាំង២៧ ប្រទេសបានផ្តល់ការយល់ព្រមទាំងអស់គ្នា លើកពេលBrexit ជាលើកទីបី រហូតត្រឹមថ្ងៃទី ៣១មករា ២០២០។ ចំណែកខាងអង់គ្លេសវិញ លោកនាយករដ្ឋមន្ត្រី Boris Johnson កំពុងសាកល្បងទាមទារឱ្យមានការបោះឆ្នោតសភាមុនអាណត្តិ ដើម្បីស្តារBrexit។
ចុះផ្សាយនៅថ្ងៃ៖
នៅបីថ្ងៃមុនកាលកំណត់Brexit ថ្ងៃទី៣១តុលា សមាជិកសហភាពអឺរ៉ុបបានព្រមព្រៀងគ្នាទទួលយកសំណើរបស់អង់គ្លេស លើកថ្ងៃចាកចេញពីអឺរ៉ុបជាលើកទីបី។ ជាការពន្យារពេល ដែលអាចបត់បែន តែកំណត់យ៉ាងយូរបំផុតត្រឹមថ្ងៃទី៣១មករា ២០២០។ មានន័យ នៅចន្លោះពេលបីខែនេះ បើសភាអង់គ្លេសព្រមអនុម័តទទួលយកកិច្ចព្រមព្រៀងសម្រេចដោយនាយករដ្ឋមន្ត្រីបូរីស ចនសុន និងសហភាពអឺរ៉ុបភ្លាម អង់គ្លេសអាចបំបែកចេញភ្លាមអឺរ៉ុប នៅថ្ងៃ៣០វិច្ឆិកា ឬថ្ងៃ៣១ធ្នូ ២០១៩ ដោយមិនបាច់រង់ចាំដល់ថ្ងៃកំណត់ចុងក្រោយទេ។
បារាំងជាប្រទេសដែលមានជំហររឹងប្រឆាំងនឹងការលើកពេលនេះជាងគេ បានសុខចិត្តព្រមពន្យារពេលឱ្យអង់គ្លេស ជាមួយលក្ខខណ្ឌមួយចំនួន។ សេចក្តីសម្រេចព្រមលើកនេះ ត្រូវអមដោយសេចក្តីថ្លែងការណ៍នយោបាយ ប្រកាសដាច់ខាតថាអឺរ៉ុបមិនទទួលឱ្យមានការចរចាសាជាថ្មីជាមួយនាយករដ្ឋមន្ត្រីអង់គ្លេសឡើយ ហើយអង់គ្លេស ត្រូវតែងតាំងស្នងការម្នាក់ទទួលបន្ទុកកិច្ចការអឺរ៉ុប។ លក្ខខណ្ឌនិងការពន្យារពេលBrexit នឹងត្រូវសរសេរជាលាយលក្ខណ៍អក្សរ ចេញជាផ្លូវការនៅថ្ងៃអង្គារឬពុធស្អែក។
សហភាពអឺរ៉ុបទាំង២៧ បានផ្តល់ការយល់ព្រម ដោយមិនរង់ចាំសេចក្តីសម្រេចរបស់សភាអង់គ្លេស ដែលត្រូវអនុម័តនៅរសៀលថ្ងៃចន្ទសំណើសុំរៀបចំបោះឆ្នោតមុនអាណត្តិទេ។ លោក បូរីស ចនសុន ចង់រៀបចំការបោះឆ្នោតសភាជាថ្មីមុនអាណត្តិនៅថ្ងៃទី ១២ ធ្នូខាងមុខ ក្រែងអាចឈ្នះឆ្នោតទទួលបានសំឡេងភាគច្រើនដាច់ខាតក្នុងសភា សម្រាប់អនុម័តកិច្ចព្រមព្រៀងBrexit បំបែកចេញពីអឺរ៉ុបបាន។ ប៉ុន្តែដើម្បីអាចបោះឆ្នោតថ្មីបាន គេត្រូវមានការយល់ព្រមពីសមាជិកសភាពីរភាគបី។ សំណើបែបនេះធ្លាប់ជួបបរាជ័យពីរដងមកហើយកាលពីខែកញ្ញា។ គណបក្សប្រឆាំងដ៏ចំបងរបស់អង់គ្លេស ធ្លាប់បានអះអាងជាញយដងហើយថានឹងគាំទ្រឱ្យមានការបោះឆ្នោតសភាមុនអាណត្តិដរាបណាតែគ្រោះដើរចេញពីអឺរ៉ុបដោយគ្មានកិច្ចព្រមព្រៀង ត្រូវបានជម្រះអស់តែប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ