សង្រ្គាមពាណិជ្ជកម្ម៖ពន្ធថ្មីលើទំនិញអឺរ៉ុបនាំចូលអាមេរិកចូលជាធរមាន
ក្រៅពីកំពុងមានសង្រ្គាមពាណិជ្ជកម្មជាមួយចិន រដ្ឋបាលអាមេរិករបស់ប្រធានាធិបតីលោកដូណាល់ ត្រាំក៏កំពុងប្រើច្បាប់ពន្ធគយដាក់លើអឺរ៉ុបដែរ។ ពន្ធថ្មីលើទំនិញអឺរ៉ុបនាំចូលអាមេរិកចាប់ចូលជាធរមាននៅថ្ងៃសុក្រ ទី១៨ តុលានេះដែលមានទឹកប្រាក់សរុបចំនួន ៧ ៥០០លានដុល្លារ។ ទំនិញអឺរ៉ុបនាំចូលអាមេរិកដែលត្រូវអាមេរិកដំឡើងពន្ធបន្ថែមមានដូចជាយន្តហោះ Airbus ស្រាបារាំង ឈីសអ៊ីតាលី ឬស្រាវីស្គ៊ីរបស់ស្កុតឡេន។ ការចូលជាធរមាននូវពន្ធថ្មីលើទំនិញអឺរ៉ុបនាំចូលអាមេរិកពេលនេះធ្វើឡើង ៤ថ្ងៃក្រោយពីអង្គការពាណិជ្ជកម្មពិភពលោកបានផ្តល់ភ្លៀវខៀវឲ្យអាមេរិកដាក់ទណ្ឌកម្មប្រឆាំងអឺរ៉ុបដែលជាការសងសឹកលើអឺរ៉ុបក្នុងទង្វើបានផ្តល់ប្រាក់ឧបត្ថម្ភធនឲ្យក្រុមហ៊ុនផលិតយន្តហោះ Airbus។
ចុះផ្សាយនៅថ្ងៃ៖
ស្តាប់ - ០២:២៥
ចាប់ពីថ្ងៃសុក្រ ទី១៨ តុលា ឆ្នាំ ២០១៩ នេះទៅ យន្តហោះ Airbus ផលិតក្នុងប្រទេសអង់គ្លេស បារាំង អេស្ប៉ាញ និងអាល្លឺម៉ង់នឹងមានតម្លៃលើស ១០% បន្ថែមនៅពេលនាំចូលអាមេរិក។ ចំណែកស្រាអឺរ៉ុបត្រូវបានរដ្ឋបាលអាមេរិករបស់លោកត្រាំដំឡើងពន្ធបន្ថែមចំនួន ២៥%។ ក្នុងថ្ងៃសុក្រ ទី១៨ តុលាដដែលនេះ រដ្ឋមន្រ្តីក្រសួងសេដ្ឋកិច្ចបារាំងលោក Bruno Le Maire ជួបលោក Robert Lighthizer ដែលជាអ្នកតំណាងពាណិជ្ជកម្ម និងជាអ្នកចរចាអាមេរិកាំង។ គេនៅមិនទាន់ដឹងថា តើលោក Le Maire និយាយអ្វីជាមួយលោក Lighthizer ទេ។ អ្វីដែលគេដឹង រដ្ឋមន្រ្តីសេដ្ឋកិច្ចបារាំងដែលបានចូលរួមនៅក្នុងកិច្ចប្រជុំប្រចាំឆ្នាំរបស់អង្គការមូលនិធិរូបិយវត្ថុអន្តរជាតិក្នុងទីក្រុងញូយ៉កបានព្រមានក្នុងថ្ងៃព្រហស្បតិ៍ ទី១៧ តុលាថា ការសម្រេចដំឡើងពន្ធលើទំនិញអឺរ៉ុបនាំចូលអាមេរិកនឹងមានផលវិបាកទាំងផ្នែកសេដ្ឋកិច្ច និងនយោបាយ រួចថា អឺរ៉ុបត្រៀមខ្លួនដើម្បីសងសឹកវិញ។
អឺរ៉ុបសង្ឃឹមថានៅឆ្នាំ ២០២០ អង្គការពាណិជ្ជកម្មពិភពលោក OMC នឹងផ្តល់ភ្លៀវខៀវឲ្យអឺរ៉ុបដាក់ទណ្ឌកម្មប្រឆាំងអាមេរិកវិញក្នុងការផ្តល់ប្រាក់ឧបត្ថម្ភធនឲ្យក្រុមហ៊ុនផលិតយន្តហោះប៊ូអ៊ីងដូចដែល OMC បានផ្តល់ភ្លៀវខៀវឲ្យអាមេរិកដាក់ទណ្ឌកម្មប្រឆាំងអឺរ៉ុបក្នុងរឿងផ្តល់ប្រាក់ឧបត្ថម្ភធនឲ្យក្រុមហ៊ុនផលិតយន្តហោះ Airbus។ តែទន្ទឹមគ្នានេះ អឺរ៉ុបក៏កំពុងបារម្ភខ្លាចលោកត្រាំបន្តដំឡើងពន្ធលើរថយន្តអឺរ៉ុបនាំចូលអាមេរិកចាប់ពីពាក់ណ្តាលខែវិច្ឆិកាខាងមុខ។ លោកត្រាំធ្លាប់បានបញ្ជាក់ពីការលំបាករបស់អាមេរិកក្នុងការលក់ផលិតផលរបស់ខ្លួននៅទីផ្សារអឺរ៉ុប ពិសេសរថយន្ត។ ចំណែកអឺរ៉ុបវិញអាចលក់ផលិផលរបស់ខ្លួនដោយស្រួលនៅទីផ្សារអាមេរិក ពិសេសរថយន្ត។
គួររម្លឹកថា អស់រយៈពេលជាយូរដែលអឺរ៉ុបចង់មានកិច្ចចរចាជាមួយអាមេរិកជាជាងសង្រ្គាមពាណិជ្ជកម្ម។ ជាក់ស្តែងក្នុងខែកក្កដា ឆ្នាំ ២០១៨ លោកត្រាំ និងប្រធានគណៈកម្មការអឺរ៉ុបលោក Jean-Claude Juncker បានព្រមព្រៀងព្យួរសង្រ្គាមពាណិជ្ជកម្ម និងសន្យាបន្តការចរចាដែលគ្មានទទួលបានលទ្ធផលអ្វីទាំងអស់មកទល់ពេលនេះ។ ចូរកុំភ្លេចថាកន្លងមក អាមេរិកបានដំឡើងពន្ធលើផលិផលដែកថែប និងអាលុយមីញ៉ូមមកពីអឺរ៉ុប រួមទាំងមកពីប្រទេសសម្ព័ន្ធមិត្តផ្សេងទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ