ម៉ូដែលគណនាថ្មីបង្ហាញថា ការកើនឡើងកំដៅផែនដីមានសភាពធ្ងន់ធ្ងរជាងការគិតទុក
អ្នកវិទ្យាសាស្រ្តបារាំង បានរកឃើញម៉ូដែលគណនា ថ្មី ដែលធ្វើឲ្យគេដឹងថា ការកើនឡើងកំដៅនៅលើផែនដី មានសភាពធ្ងន់ធ្ងរ ជាងការគិតទុកពីមុន ទៅទៀត។ ម៉ូដែលថ្មីពីរដែលអ្នកវិទ្យាសាស្រ្តបារាំងបង្ហាញ នៅថ្ងៃអង្គារនេះ ត្រូវបានគេប្រើរួចហើយ សម្រាប់របាយការណ៍ទី៦ របស់អង្គការសហប្រជាជាតិ ស្តីពីអាកាសធាតុ ដែលនឹងត្រូវចេញផ្សាយជាផ្លូវការ នៅឆ្នាំ ២០២១ខាងមុខ។
ចុះផ្សាយនៅថ្ងៃ៖
ស្តាប់ - ០២:៤៣
ជាមួយ ម៉ូដែលគណនាថ្មី ដែលសុក្រិតជាងម៉ូដែលចាស់ អ្នកវិទ្យាសាស្រ្តបារាំងបានព្រមានពីការឡើងកំដៅផែនដី ក្នុងកំរិតមួយខ្ពស់ជាងការប៉ាន់ស្មានទុកមុន ពោល គឺនៅឆ្នាំ ២១០០ កំដៅលើផែនដី នឹងអាចកើនឡើង ពី៦.៥ ទៅ ៧អង្សា បន្ថែមទៀត បើសិន ជាគ្មានវិធានការកាត់បន្ថយ ការបញ្ចេញឧស្ម័នកាបូនិក។
ការគណនារបស់ម៉ូដែលចាស់ ដែលគេធ្លាប់ប្រើកន្លងមកសម្រាប់ របាយការណ៍អាកាសធាតុ ឆ្នាំ ២០១៤ បានបង្ហាញថា បើប្រៀបធៀបនឹងសម័យបុរេឧស្សាហកម្ម កំដៅ លើភពផែនដី នឹងកើនឡើងប្រមាណ ៤,៥អង្សា បន្ថែមទៀត នៅឆ្នាំ ២១០០។ អាចនិយាយបានថា ជាមួយនឹងម៉ូដែលថ្មី អ្នកវិទ្យាសាស្រ្តរកឃើញថា កំដៅលើផែនដី នឹងអាចកើនឡើង បន្ថែមទៀត ក្នុងកម្រិតមួយខ្ពស់ ជាងការប៉ាន់ស្មានកន្លងមក ដែលមានត្រឹមតែ ៤.៥អង្សា ប៉ុណ្ណោះ។
ការគណនា ដោយប្រើម៉ូដែលថ្មី បានជួយឲ្យគេដឹងដែរថា នៅពេល បរិមាណឧស្ម័នកាបូនិកកើនឡើង កាន់តែច្រើន នៅក្នុងបរិយាកាស នោះ ផែនដី ក៏ងាយនឹងឆាប់ក្តៅ ទៅដែរ។ ផែនដីឡើងកំដៅ ក្នុងល្បឿនដ៏លឿនបែបនេះ នឹងធ្វើឲ្យគេមានពេលវេលាតិច ដើម្បីសម្របខ្លួន និងគំរាមកំហែងដល់អាយុជីវិត អណ្តូងស្តុកឧស្ម័នផ្ទះកញ្ចក់។ អ្នកវិទ្យាសាស្រ្តធ្លាប់វាយតម្លៃថា ដោយសារការកើនឡើងកំដៅលើផែនដី ផ្ទាំងទឹកកក នៅតំបន់ប៉ូល នឹងអាចរលាយ ពី ៣០ ទៅ ៩០ភាគរយ នៅឆ្នាំ ២១០០។ ជាលទ្ធផល ឧស្ម័នផ្ទះកញ្ចក់ រាប់ពាន់លានតោន ដែលធ្លាប់ ជាប់គាំងក្រោមផ្ទាំងទឹកកក នឹងអាចហើរទៅក្នុងបរិយាកាស ដែលរឹតតែធ្វើឲ្យកំដៅលើផែនដី មានសភាពកាន់តែធ្ងន់ធ្ងរ។
ការរកឃើញថ្មី របស់អ្នកវិទ្យាសាស្រ្តបារាំង មិនមែនជាដំណឹងល្អ និងគួរឲ្យលើកទឹកចិត្តនោះទេ។ ការគណនា តាមម៉ូដែលថ្មី បានធ្វើឲ្យគេគិតថា ការប្រឹងប្រែង ដើម្បីទប់ស្កាត់កុំឲ្យផែនដី ឡើងកំដៅបន្ថែម ទៀត ២អង្សា ដែលមានចែងនៅក្នុង កិច្ចព្រមព្រៀង អន្តរជាតិស្តីពីអាកាសធាតុ នោះ គឺជារឿងដែលគេពិបាកនឹង ធ្វើទៅបាន។ ជាមួយនឹងនយោបាយកាត់បន្ថយការបញ្ចេញឧស្ម័នកាបូនិកដែលប្រទេសហត្ថលេខីបានសន្យា នាពេលសព្វថ្ងៃនេះ គេអាចត្រឹមជួយទប់កំដៅ លើផែនដី កើនឡើង ប្រមាណ ៣អង្សា បន្ថែមទៀត ប៉ុន្តែ មិនមែន ២អង្សា តាមការចែងរបស់កិច្ចព្រមព្រៀងនោះទេ។
តើជីវិតនៅលើផែនដី នឹងទៅជាយ៉ាងណា? រហូតមកដល់ថ្ងៃនេះ កំដៅ លើផែនដី បានកើនឡើងប្រមាណ ១អង្សាប៉ុណ្ណោះ បើប្រៀបធៀបនឹងសម័យបុរេឧស្សាហកម្ម។ កើនឡើងកំដៅ ត្រឹម១អង្សា ប៉ុន្តែ ផែនដីបានជួបប្រទះនឹងគ្រោះមហន្តរាយធម្មជាតិ ដែលកាន់តែច្រើន និងសាហាវ។ គ្រោះរាំងស្ងួត ទឹកជំនន់ ព្យុះសង្ឃរា រលកកំដៅ ដែលមានកាន់តែច្រើន និងរយៈពេលវែង បូកផ្សំនឹងការឡើងកំពស់ទឹកសមុទ្រ គឺជាអ្វីដែលអ្នកជំនាញខាងអាកាសធាតុបានព្រមានថា នឹងអាចកើតឡើង កាន់តែច្រើន និងធ្ងន់ធ្ងរ នៅទសវត្សរ៍ខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ