លោកអេម៉ានុយអែល ម៉ាក្រុង៖ការរុញច្រានប្រទេសរុស្ស៊ីឲ្យស្ថិតឆ្ងាយពីអឺរ៉ុបជាកំហុសមួយធ្ងន់ធ្ងរ
នៅថ្ងៃអង្គារ ទី២៧ សីហា ប្រធានាធិបតីបារាំងលោកអេម៉ានុយអែល ម៉ាក្រុងបានចូលរួមនៅក្នុងសន្និសីទលើកទី២៧នៃឯកអគ្គរដ្ឋទូត និងឯកអគ្គរាជទូតបរទេសប្រចាំប្រទេសបារាំង។ គឺជាឱកាសមួយដែលប្រមុខរដ្ឋបារាំងបានលើកឡើងពីទិសដៅនៃគោលនយោបាយការបរទេសរបស់លោកសម្រាប់ប៉ុន្មានខែខាងមុខ។ថ្លែងនៅចំពោះមុខមន្រ្តីការទូតប្រមាណជា ២០០នាក់នៅក្នុងវិមានអេលីហ្សេ លោកម៉ាក្រុងបានទាមទារសម្រាប់បារាំងនូវយុទ្ធសាស្រ្តការទូតប្រកបដោយភាពមោះមុត និងមិនអាចខ្វះបានដើម្បីបញ្ជៀសការលុបបំបាត់អឺរ៉ុបនៅចំពោះមុខភាពលេចធ្លោរបស់ចិននិង សហរដ្ឋអាមេរិក។ នៅក្នុងន័យនេះ ប្រមុខរដ្ឋបារាំងបានទទូចពីភាពចាំបាច់ក្នុងការរំកិលសហភាពអឺរ៉ុប និងប្រទេសរុស្ស៊ីឲ្យខិតចូលជិតគ្នា។ លោកម៉ាក្រុងបានយល់ឃើញថា ការរុញច្រានរុស្ស៊ីឲ្យស្ថិតឆ្ងាយពីសហភាពអឺរ៉ុបជាកំហុសមួយយ៉ាងធ្ងន់ធ្ងរ និងថា បំណងប្រាថ្នារបស់រុស្ស៊ីមិនមែនចង់ធ្វើជាសម្ព័ន្ធមិត្តភាគតិចម្នាក់របស់ចិនទេ។
ចុះផ្សាយនៅថ្ងៃ៖
ស្តាប់ - ០១:២៧
« តាំងពី ៥ឆ្នាំកន្លងមក ប្រទេសរុស្ស៊ីបានយកកន្លែងពិសេសមួយនៅក្នុងគ្រប់ជម្លោះធំៗក្នុងលោក។ រុស្ស៊ីយកកន្លែងពិសេសមួយនេះបាន ក៏ព្រោះតែសហរដ្ឋអាមេរិក អង់គ្លេស និងប្រទេសបារាំងបានចុះខ្សោយ។ នៅក្នុងបរិបទបច្ចុប្បន្ន ប្រទេសរុស្ស៊ីបានពង្រីកផលប្រយោជន៍ទាំងអស់របស់ខ្លួនជាអតិបរមា។ រុស្ស៊ីបានត្រឡប់ចូលអន្តរាគមន៍នៅក្នុងប្រទេសស៊ីរី នៅក្នុងប្រទេសលីប៊ី និងនៅទ្វីបអាហ្រ្វិក។ ប្រទេសរុស្ស៊ីបានចូលខ្លួននៅក្នុងគ្រប់ប្រធានបទនៃវិបត្តិទាំងអស់តាមរយៈការចុះខ្សោយ ឬតាមរយៈកំហុសរបស់យើង។
ប៉ុន្តែសួរថា តើស្ថានភាពរបៀបនេះអាចបន្តមានយូរអង្វែងដែរ ឬទេ?។ ខ្ញុំមិនជឿទេ។ មហាអំណាចរុស្ស៊ីមួយនេះដែលវិនិយោគយ៉ាងច្រើនទៅលើគ្រឿងសព្វាវុធរបស់ខ្លួន និងដែលធ្វើឱ្យយើងភ័យខ្លាចយ៉ាងខ្លាំងនោះមានផលិតផលសរុបក្នុងស្រុកដូចប្រទេសអេស្ប៉ាញ មានប្រជាសាស្រ្តមួយចុះខ្សោយ ជាប្រទេសដែលមានវ័យចំណាស់ និងមានភាពតានតឹងនយោបាយកើនឡើង។
តើអស់ លោកគិតថា គេអាចបន្តស្ថិតនៅបែបនេះតទៅមុខបានទៀតឬ?។ ខ្ញុំគិតថា បំណងប្រាថ្នារបស់ប្រទេសរុស្ស៊ីមិនមែនចង់ធ្វើជាសម្ព័ន្ធមិត្តភាគតិចម្នាក់របស់ចិនឡើយ។ ដូច្នេះ យើងក៏ត្រូវដឹងតាមរយៈកិច្ចពិភាក្សាដែលទាមទារនេះ និងលក្ខខណ្ឌដែលយើងនឹងដាក់ដើម្បីផ្តល់ជូននូវជម្រើសយុទ្ធសាស្ត្រមួយដល់ប្រទេសនេះដោយខានមិនបាន »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ