អង់គ្លេស ៖ លោកស្រីតេរ៉េហ្សា មេ បញ្ចប់តំណែងដោយបន្សល់ទុកនូវស្នាដៃដ៏ស្តួចស្តើង
ចុះផ្សាយនៅថ្ងៃ៖
ស្តាប់ - ០៤:២៧
លោកស្រីបានដឹកនាំប្រទេស ជាមួយការបំបែកឯកទត្តកម្ម ជាច្រើន ៖ ក្នុងរយៈពេលបីឆ្នាំផង មានសមាជិករដ្ឋាភិបាល ជាង៥០នាក់ បានលាលែងចេញពីតំណែង ឬទម្លាក់ពីតំណែង បរាជ័យបីដងធំៗ និងមិនធ្លាប់មាននៅសភា ជាក់ស្តែងគឺការបោះឆ្នោតលើកិច្ចព្រមព្រៀងBrexit។ លោកស្រីមេ បានត្រដររស់គេចរួចពីការបោះឆ្នោតឆ្នោតដកទំនុកពីសំណាក់បក្សរបស់ខ្លួន និងពីសំណាក់បក្សប្រឆាំង... ដើម្បីសម្រេចមហិច្ឆតាBrexit និងប្រយុទ្ធប្រឆាំងនឹងវិសមភាពសង្គម ប៉ុន្តែនៅទីបំផុត គិតត្រឹមថ្ងៃ ពុធទី ២៤កក្កដា២០១៩ ថ្ងៃបិទបញ្ចប់អាណត្តិថ្ងៃ លោកស្រី តេរ៉េហ្សា មេ បានបន្សល់ទុកនូវការចងចាំ និងស្នាដៃដ៏តិចតួចបំផុត។
ក្លាយជាស្ត្រីទីពីរ ដែលឡើងមកកាន់តំណែងជាប្រមុខរដ្ឋាភិបាលអង់គ្លេស និងបានចូលកាន់តំណែងជានាយករដ្ឋមន្ត្រីអង់គ្លេស ជាផ្លូវការ នៅថ្ងៃទី ១៣ កក្កដា ២០១៦ ក្រោយការបោះឆ្នោតប្រជាមតិសម្រេចដើរចេញពីសហភាពអឺរ៉ុប លោកស្រី តេរ៉េហ្សា មេ គឺជាតំណាងនៃក្តីសង្ឃឹម និងមនុស្សគួរជាទីទុកចិត្ត ប្រកបដោយរូបភាពវិជ្ជមានជាច្រើន។
គ្មានទេពកោសល្យមែន តែល្បីខាងហ្មត់ចត់ ពូកែធ្វើការខ្លាំង និងធ្លាប់ជារដ្ឋមន្ត្រីក្រសួងមហាផ្ទៃរយៈពេល៦ឆ្នាំ សម្រាប់ក្រសែភ្នែកពលរដ្ឋអង់គ្លេសពេលនោះ លោកស្រីមេ គឺជាមេដឹកនាំប្រទេសដ៏សក្តិសមជាងគេបំផុត។ ប្រទេសដែលកំពុងពុះចែកជាចំរៀកៗដោយយុទ្ធនាការឃោសនាប្រជាមតិBrexit និងដែលកំពុងឆ្លងកាត់ដំណាក់កាលដ៏ផុយស្រួយបំផុតនៃប្រវត្តិសាស្ត្រ។
នៅក្នុងសុន្ទរកថាលើកដំបូង លោកស្រី បានធ្វើការប្តេជ្ញាជាឱឡាឬក សម្រេចមហិច្ឆតាធំពីរគឺ នាំអង់គ្លេសដើរចេញពីអឺរ៉ុប ស្របតាមលទ្ធផលប្រជាមតិ និងពុះពារកាត់បន្ថយវិសមភាព ដើម្បីការពារយុត្តិធម៌សង្គម។ ប៉ុន្តែបីឆ្នាំក្រោយ អង់គ្លេសនៅតែជាសមាជិកសហភាពអឺរ៉ុប។ Brexit ថ្ងៃទី ២៩មីនា មិនអាចសម្រេចបាន។ ចំណែកវិសមភាពសង្គម មានគម្លាតកាន់តែខ្លាំង និងច្បាស់ជាងពេលណាៗទាំងអស់ បើទោះបីជាអត្រាអ្នកអត់ការងារធ្វើបានចុះទាបមែនទែនយ៉ាងណាក៏ដោយ។
ក្រោមគំនាបរបស់គណបក្ស និងការងើបបះបោររបស់រដ្ឋមន្ត្រីក្រោមបង្គាប់ជាច្រើនរូប នៅទីបំផុតលោកស្រីមេ ព្រមចុះចាញ់ ប្រកាសសុខចិត្តដើរចេញពីតំណែង ក្នុង សំឡេងដ៏ក្តុកក្តួលអួលណែនដើមក នៅថ្ងៃទី ២៤ឧសភា។ លោកស្រីអរគុណអង់គ្លេសដែលបានផ្តល់ឱកាសឱ្យលោកស្រីបំរើប្រទេស។ ប៉ុន្តែប្រវត្តិសាស្ត្រប្រទេសប្រហែលជាកត់ត្រាភាពជូរចត់របស់លោកស្រីច្រើនជាង។ អ្នកសង្កេតការណ៍នយោបាយជាច្រើនបានចាត់ទុកលោកស្រីវ័យ ៦២ឆ្នាំ ថាជានាយករដ្ឋមន្ត្រីដ៏អន់ជាងគេបំផុតរបស់អង់គ្លេស គិតចាប់តាំងពីសម័យសង្គ្រាមលោកលើកទីពីរ មកទល់នឹងពេលនេះ។
ហេតុអ្វីបានជាដល់ថ្នាក់នេះ ? កំហុសដ៏ធ្ងន់មួយរបស់លោកស្រីមេ គឺមកពីភាពរឹងប៉ឹងជ្រុលរបស់លោកស្រី។ មានចរិតហ្មត់ចត់រឹងប៉ឹងខ្លាំង លោកស្រីមិនងាយទុកនរណាផ្សេងឡើយ។ គុណសម្បត្តិបែបនេះក៏ជាគុណវិបត្តិដែរ ព្រោះវាបានជំរុញឱ្យលោកស្រីភ្លេចខ្លួន មិនចង់ពិគ្រោះយោបល់ការងារជាមួយអ្នកផ្សេងក្រៅពីស្វាមី និងមានទីប្រឹក្សាជំនិតពីរនាក់។
ស្នើឱ្យសភាបោះឆ្នោតអនុម័តលើកិច្ចព្រមព្រៀងBrexit ទៅបីលើក តែលោកស្រីនៅតែមិនអាចបង្រួបបង្រួម និងប្រមូលសំឡេងភាគច្រើនដាច់ខាតមកគាំទ្រកិច្ចព្រមព្រៀងដែលលោកស្រីខំសម្រេចបានជាមួយសហភាពអឺរ៉ុបកាលពីខែវិច្ឆិកា២០១៨ទៀត។ គណបក្សអភិរក្សរបស់លោកស្រី និងប្រជាពលរដ្ឋអង់គ្លេស នៅតែបន្តហែកហួរទស្សនៈគ្នាជុំវិញចំណងទំនាក់ទំនងរវាងអង់គ្លេសនិងសហភាពអឺរ៉ុប ក្រោយការលែងលះគ្នាដដែល។
អង់គ្លេសនិងអឺរ៉ុបមានចំណងវេញជាប់គ្នាជាង៤០ឆ្នាំមកហើយ។ ហើយត្រូវប្រលេះពីគ្នាវិញ ពិតជាមិនងាយស្រួលឡើយ ប៉ុន្តែបញ្ហានៅត្រង់ថាលោកស្រីមេ ជ្រើសរើសផ្លូវស្រាយដោយរំពឹងតែលើគណបក្សរបស់ខ្លួនឯងតែមួយ និងពិសេសលើតែក្រុមអ្នកមាននិន្នាការដាច់ចេញពីអឺរ៉ុបជាដាច់ខាតទៀត។ សម្រាប់អ្នកវិភាគនយោបាយ លោកស្រីប្រាកដនិយមពេក រហូតលែងគិតដល់ច្រកចរចាអន្តរបក្ស។ ក្រោយបរាជ័យនៅក្នុងការបើឆ្នោតសភាមុនអាណត្តិ ឆ្នាំ២០១៧ ដែលបានធ្វើឱ្យបក្សលោកស្រីបាត់បង់សំឡេងភាគច្រើនដាច់ខាត ហើយលោកស្រីបែរជាចង់សម្ព័ន្ធជាមួយបក្សមហាអភិរក្សអៀរឡង់ខាងជើង ទាល់តែជាប់អន្ទាក់ខ្លាំង ទើបងាកមកបក្សប្រឆាំង តែការចរចាក៏ត្រូវបរាជ័យទៀត។ គ្មានជម្រើសអង់គ្លេសបានរៀបចំបោះឆ្នោតសភា ដែលគួរឱ្យអស្ចារ្យទៅនោះគឺគណបក្សBrexit ជាអ្នកឈ្នះទៀត។
អង់គ្លេសបានបញ្ជាក់ចេតនាចង់ចេញពីអឺរ៉ុបជាថ្មី ចុះហេតុអ្វីមិនព្រមទទួលកិច្ចព្រមព្រៀងរបស់លោកស្រីមេ តើនេះមកពីអង់គ្លេសប្រឆាំងនឹងវិធីដឹកនាំរបស់លោកស្រីមេទេឬ ?! ប្រវត្តិសាស្ត្រអង់គ្លេសនឹងមិនចងចាំរូបភាពល្អរបស់លោកស្រីទេ។ លោកស្រី ជានាយករដ្ឋមន្ត្រីដែលឈរកាន់តំណែងរយៈពេលខ្លីជាងគេបំផុតក្នុងប្រវត្តិអង់គ្លេស។ ហើយក្រៅអំពីតុល្យការការងារដ៏ស្តួចស្តើង លោកស្រីមេ ត្រូវបានគេបន្ទោសថាមានចរិកសោះអង្គើយ និងដឹកនាំប្រទេសដូចដឹកគ្រឿងយន្ត រហូតជាប់ងារថា Maybot ដែលចង់សំដៅថា លោកស្រីរ៉ូប៉ូ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ