rfi

កំពុងផ្សាយ
  • ផ្សាយផ្ទាល់
  • នាទីព័ត៌មាន
  • RFI ជាភាសាបារាំង
ព្រឹត្តិការណ៍អន្តរជាតិប្រចាំថ្ងៃ
rss itunes

អ៊ីរ៉ង់ប្រាប់​អង់គ្លេសឲ្យ​​ដោះលែង​ កប៉ាល់ដឹកប្រេង​របស់ខ្លួន ជាប្រញាប់

ដោយ ឈាង បុប្ផា

អ៊ីរ៉ង់ និង​អង់គ្លេស បាន​កើតមានភាពតានតឹង​ការទូត​នឹង​គ្នា នៅក្រោយ​អង់គ្លេស​ចាប់រឹបអូស​កប៉ាល់​ដឹកប្រេង​អ៊ីរ៉ង់ នៅ​ច្រកសមុទ្រ Gibraltar ដែល​ជា​ដែនដី នាយសមុទ្រ​របស់​អង់គ្លេស នៅ​សមុទ្រ​មេឌីទែរ៉ាណេ។ កាល​ពី​ព្រឹក​ថ្ងៃ​ព្រហស្បតិ៍ ប៉ូលិស និង​គយ​អង់គ្លេស ប្រចាំនៅ​ទឹកដី Gibraltar​បានឡើង​ទៅ​រឹបអូស​កប៉ាល់ដឹកប្រេង​របស់​អ៊ីរ៉ង់។ ហេតុការណ៍​នេះ​កើតឡើង​នៅ​ខណៈពេល​ដែល​អាមេរិក​ប្រកាស​ដាក់ទណ្ឌកម្ម​បន្ថែម​លើអ៊ីរ៉ង់ នៅក្រោយ​អ៊ីរ៉ង់​បាញ់​ទម្លាក់​យន្តហោះដ្រូនរបស់​អាមេរិក នៅ​ច្រកសមុទ្រ Omuz កាលពី​ខែ​មិថុនា​កន្លងទៅ។ នៅ​ថ្ងៃ​សុក្រនេះ អ៊ីរ៉ង់​បាន​ថ្កោលទោស និង​បានទាមទារ​ឲ្យ​អង់គ្លេស ដោះលែង កប៉ាល់​ដឹកប្រេង​របស់​ខ្លួន​ជា​បន្ទាន់។

 

អ៊ីរ៉ង់ តាមរយៈ សេចក្តីថ្លែងការណ៍​ផ្លូវការ​នៅថ្ងៃ​សុក្រនេះ បានទាមទារ​ឲ្យ​អង់គ្លេស លែង​ជា​ប្រញាប់​កប៉ាល់​ដឹកប្រេង​ឆៅ​របស់​អ៊ីរ៉ង់ ដែល​ទាហាន និង​ប៉ូលិស​អង់គ្លេស បាន​ចូល​ចាប់​រឹបអូស កាលពី​ព្រឹកថ្ងៃ​ព្រហស្បតិ៍​ទី ៤​កក្កដា។ នៅក្នុង​ជំនួប​កោះហៅ ឯកអគ្គរាជទូត​អង់គ្លេស​ប្រចាំ​ក្រុង​តេហេរ៉ង់ អ៊ីរ៉ង់​នៅ​បាន​ប្រៀប​ប្រដូច​ការចូលចាប់​កប៉ាល់ដឹកប្រេង​អ៊ីរ៉ង់ ទៅ​នឹង​សកម្មភាព​របស់​ចោរសមុទ្រ។

រូបភាព​ចេញផ្សាយ​ដោយ​ទូរទស្សន៍​អង់គ្លេស BBC បាន​បង្ហាញ​ក្រុម​ទាហាន​អង់គ្លេសសម្រូត​ទម្លាក់​ខ្លួន​ពី​ឧទ្ធម្ភាគចក្រ ទៅក្នុង​កប៉ាល់​ដឹកប្រេង​អ៊ីរ៉ង់ ដែល​មាន​ឈ្មោះ ថា Grace 1 ដែល​ស្ថិតនៅ ចម្ងាយ ៤គីឡូម៉ែត្រ​ពីឆ្នេរ Gibraltar។ Gibraltar​ជាដែនដី​ឯ​នាយសមុទ្រ មួយដុំតូច របស់​អង់គ្លេស ប៉ុន្តែ ស្ថិតនៅ​ជ្រោយ​ភាគខាងត្បូង ប្រទេស​អេស្ប៉ាញ នៅសមុទ្រ​មេឌីទែរ៉ាណេ។

បើតាម​អ៊ីរ៉ង់ ទាហាន​អង់គ្លេស​បាន​សម្រុកចូល​ខុសច្បាប់ ទៅ​រឹបអូសកប៉ាល់​ដឹកប្រេង​អ៊ីរ៉ង់ ដែល​កំពុង​ស្ថិតនៅ​ក្នុង​ដែនទឹកសមុទ្រ​អន្តរជាតិ ប៉ុន្តែ មិនមែន​ស្ថិតនៅ​ក្នុង​ដែនទឹក​Gibraltar ដែល​អង់គ្លេស​អះអាង​នោះទេ។

អង់គ្លេស​វិញ បាន​ទាត់ចោល​ការលើកឡើង​របស់​អ៊ីរ៉ង់។ ក្រសួងការបរទេស​អង់គ្លេស នៅ បាន​កោតសរសើរ​ចំណាត់ការ​របស់​អាជ្ញាធរ​អង់គ្លេស​នៅ​ទីក្រុង​Gibraltar ដែល​បាន​អនុវត្ត​យ៉ាងខ្ជាប់ខ្ជួន វិធានការ​ដាក់ទណ្ឌកម្ម​របស់អឺរ៉ុប​ទៅលើ​ប្រទេស​ស៊ីរី។

អភិបាល​ក្រុង​Gibraltar លោក​Fabian Picardo បាននិយាយ​ថា លោក​បានចេញ​បញ្ជារ​ឲ្យ​គេ​ចាប់ស្ទាក់ កប៉ាល់ ដឹកប្រេងឆៅ​៣សែនតោន​របស់​អ៊ីរ៉ង់ ក្នុង​ហេតុផលថា កប៉ាល់ដឹកប្រេងអ៊ីរ៉ង់ រំលោភ​ការដាក់ទណ្ឌកម្ម របស់​សហភាពអឺរ៉ុប ទៅលើ​ប្រទេស​ស៊ីរី។ សម្រាប់​អភិបាល​ក្រុង​Gibraltar គេ​មាន​ភស្តុតាង រឹងមាំ​ដែល​បញ្ជាក់​ថា កប៉ាល់​អ៊ីរ៉ង់​ដែល​មាន​ទង់ជាតិ​ប្រទេស​ប៉ាណាម៉ា ដឹកប្រេង​ឆៅ យក​ទៅ​ចម្រាញ់ ទៅ​រោងចក្រ​ចម្រាញ់​ប្រេង​មួយកន្លែង ក្នុង​ទឹកដី​ស៊ីរី។

នៅ​ឆ្នាំ ២០១៤ ដើម្បី​ថ្កោលទោស រដ្ឋាភិបាល​ស៊ីរី ក្នុង​រឿង​បង្រ្កាប សម្លាប់​ហិង្សា ទៅលើ​ប្រជាជន​ស៊ីវិល តាំង​ពី​ឆ្នាំ ២០១១ សហភាព​អឺរ៉ុប​បាន​ដាក់ទណ្ឌកម្ម​សេដ្ឋកិច្ច បិទខ្ទប់ ថាមពល​ប្រេង ដែល​ជា​ប្រភព​ចំណូល របស់​រដ្ឋាភិបាល របស់​លោក​បាស្ហា អាល់អាសាដ។ អាជ្ញាធរ​អង់គ្លេស នៅGibraltar  ជឿ​ថា កប៉ាល់​ដឹកប្រេង អ៊ីរ៉ង់ ដែល​អង់គ្លេស​ស្ទាក់ចាប់​នៅថ្ងៃ​ព្រហស្បតិ៍​ម្សិលមិញ មាន​ទិសដៅ ច្បាស់ណាស់ សំដៅ រោងចក្រ​ចម្រាញ់​ប្រេង Banyas នៅ​ឆ្នេរស៊ីរី ក្នុង​សមុទ្រ​មេឌីទែរ៉ាណេ ដែល​កំពុង​ស្ថិតនៅ​ក្នុង​បញ្ជីរខ្មៅ​របស់​សហភាពអឺរ៉ុប។អភិបាល​ក្រុង​Gilbraltar អះអាងថា លោក​បាន​ដាក់ពាក្យ​ទៅប្រធាន​គណៈកម្មការអឺរ៉ុប ស្តីពី​ការអនុវត្ត​ការដាក់ទណ្ឌកម្ម​សេដ្ឋកិច្ច ទៅលើ​កប៉ាល់​ដឹកប្រេង​អ៊ីរ៉ង់​លើកនេះ។ ប៉ុន្តែ ការិយាល័យ គណៈកម្មការ​អឺរ៉ុប​វិញ បាន​បដិសេធ​មិនធ្វើ​អត្ថាធិប្បាយ​អ្វីនោះទេ។

រដ្ឋមន្រ្តីការបរទេស​អេស្ប៉ាញ៖ អង់គ្លេស ចាប់កប៉ាល់​ដឹកប្រេង​ឆៅ​របស់អ៊ីរ៉ង់ ទៅតាម​ការចង់បាន​របស់អាមេរិក

ទោះជា​សហភាពអឺរ៉ុប​ដាក់ទណ្ឌកម្ម​សេដ្ឋកិច្ច ហាម​មិនឲ្យ​មានការដឹកប្រេង​ទៅ​ផ្គត់ផ្គង់ រដ្ឋាភិបាល​ស៊ីរី តាំង​ពី​ឆ្នាំ ២០១៤ ប៉ុន្តែ សហភាពអឺរ៉ុប​មិនដែល​ចាប់​កប៉ាល់ប្រេង​អ៊ីរ៉ង់ ទៅ​ប្រទេស​ស៊ីរី​ម្តងណាទេ ដោយសារ​ថា អ៊ីរ៉ង់ ​មិន​ស្ថិតក្នុង​បញ្ជី​ទណ្ឌកម្ម​សេដ្ឋកិច្ច​របស់សហភាពអឺរ៉ុប។

នេះ​ជា​លើក​ទី​១​ដែល​ប្រទេស​សមាជិក​មួយ របស់​សហភាពអឺរ៉ុប ស្ទាក់ចាប់​កប៉ាល់ដឹកប្រេង​អ៊ីរ៉ង់ នៅ​ក្នុង​សមុទ្រ​មេឌីទែរ៉ាណេ។ នៅក្នុង​សេចក្តីថ្លែងការណ៍​របស់​ក្រសួង​ការបរទេស​អ៊ីរ៉ង់ កាលពី​ថ្ងៃ​ព្រហស្បតិ៍ អ៊ីរ៉ង់​បាន​ចោទអង់គ្លេស​ថា បាន​ធ្វើតាម​ការបញ្ជារ​របស់​អាមេរិក ដែល​កំពុង​ដាក់សម្ពាធ ចង់​ឲ្យ​ការនាំចេញប្រេង​របស់​អ៊ីរ៉ង់ធ្លាក់ចុះ​ដល់​កំរិតសូន្យ។

មិនមែន​តែ​អ៊ីរ៉ង់​ទេ ដែល​ថា អង់គ្លេស​ចាប់​កប៉ាល់ដឹកប្រេង​អ៊ីរ៉ង់​ ទៅតាម​បញ្ជារ​របស់អាមេរិក។ រដ្ឋមន្រ្តីការបរទេស​អេស្ប៉ាញ​ផ្ទាល់​លោក Josep Borrell បាននិយាយ​ប្រាប់​អ្នកកាសែត​ថា អង់គ្លេស ចាប់កប៉ាល់ ដឹកប្រេង​អ៊ីរ៉ង់ ទៅតាម​ការចង់បាន​របស់​អាមេរិក។ អេស្ប៉ាញ​ដែល​កំពុង​មានជម្លោះដណ្តើម​ដែនទឹក Gibraltar ជាមួយ​អង់គ្លេស បញ្ជាក់ថា ខ្លួន​នឹង​សិក្សា​ពិនិត្យដើម្បី​ដឹង​ថា តើ​ចំណាត់ការ​របស់​អង់គ្លេស ដើម្បី​ចូលចាប់ កប៉ាល់​ដឹកប្រេង​របស់អ៊ីរ៉ង់ មាន​ប៉ះពាល់ រំលោភ​ដល់​ដែន​អធិបតេយ្យ​ភាព​របស់​អេស្ប៉ាញដែរឬទេ។

អង់គ្លេស​បាន​ចូល​ទៅ​ចាប់ស្ទាក់​កប៉ាល់​ដឹកប្រេង​អ៊ីរ៉ង់ នៅ​ក្នុង​តំបន់​ទឹក ដែល​កប៉ាល់​ភាគច្រើន​ឈប់សំចត ដើម្បី​ចូលទិញ គ្រឿងផ្គត់ផ្គង់​បរិភោគ​សម្រាប់​មនុស្ស​លើ​កប៉ាល់។ ប៉ុន្តែ សម្រាប់​អង់គ្លេស កប៉ាល់ដឹកប្រេង​អ៊ីរ៉ង់ ស្ថិតនៅ​ក្នុង​តំបន់ទឹក​របស់​អង់គ្លេស។

នៅថ្ងៃ​ម្សិលមិញ លោក​John Bolton ទីប្រឹក្សាសន្តិសុខ​ជាតិ របស់​លោកដូណាល់​ត្រាំ បាន​ចេញមុខ ស្វាគម​អង់គ្លេស ដែល​បាន​ចាប់ស្ទាក់​កប៉ាល់​ដឹកប្រេង អ៊ីរ៉ង់។ សម្រាប់លោក វាជាដំណឹង​ល្អ​ក្រៃលែង ដែល​អង់គ្លេស​ស្ទាក់ចាប់កប៉ាល់ដឹកប្រេង​អ៊ីរ៉ង់ ដែល​បាន​រំលោភ​ការដាក់ទណ្ឌកម្ម​របស់​សហភាពអឺរ៉ុប។

សម្រាប់អ្នកជំនាញ ទោះជាអាមេរិក​លើកឡើងថា ការស្ទាក់ចាប់កប៉ាល់​ប្រេង​អ៊ីរ៉ង់ ជា​ស្នាដៃ​របស់​សហភាពអឺរ៉ុប ប៉ុន្តែ គេអាច​ប៉ាន់ស្មាន​បាន​ថា ការស្ទាក់ចាប់​កប៉ាល់ប្រេង​អ៊ីរ៉ង់​លើកនេះ ធ្វើឡើង​ដោយ​ការជំរុញ ពី​អាមេរិក។ មួយវិញទៀត វាអាច​ជាសារ​ទៅ​ដល់​រដ្ឋាភិបាល​ស៊ីរី អ៊ីរ៉ង់ និង​រួមទាំងអាមេរិក​ផងដែរថា សហភាព​អឺរ៉ុប អនុវត្ត​យ៉ាងតឹងរ៉ឹង​ច្បាប់​ដាក់ទណ្ឌកម្ម​របស់ខ្លួន ទៅលើ​ស៊ីរី ហើយ​អឺរ៉ុប ក៏​អាច​ចាត់វិធានការ​ណាមួយ ដើម្បី ប្រឆាំង​តបត​នឹង​អ៊ីរ៉ង់ ដែលចង់​ដកខ្លួន​ពីកិច្ចព្រមព្រៀង​ស្តីពី​នុយក្លេអ៊ែរ ឆ្នាំ ២០១៥។ ថ្មីៗនេះ អ៊ីរ៉ង់ ​ទើប​ប្រកាស ថា ខ្លួន​លែង​អាច​គោរព​តាម​កិច្ចព្រមព្រៀង​នុយក្លេអ៊ែរ​អន្តរជាតិ ស្តីពីនុយក្លេអ៊ែរ ទៀតហើយ នៅក្រោយ ប្រទេស​ហត្ថលេខី ផ្សេងទៀត ដូចជា​អង់គ្លេស បារាំង អាល្លឺម៉ង់ និង​សហភាពអឺរ៉ុប គ្មាន​សមត្ថភាព​រារាំង មិន​ឲ្យ​អាមេរិក ដាក់ទណ្ឌកម្មសេដ្ឋកិច្ច​លើ​អ៊ីរ៉ង់​នោះ។ នៅ​ថ្ងៃ​ពុធ ម្សិលម្ង៉ៃ អ៊ីរ៉ង់​នៅបាន​ប្រកាស​​ប្តេជ្ញា​ចម្រើន​សារធាតុ​អ៊ុយរ៉ាញ៉ូម ឲ្យ​ហួស​កម្រិត ដែល​មាន​ចែង​ក្នុង​កិច្ចព្រមព្រៀង នោះបើជាមានការ​ប្រឆាំង​ពី​អាមេរិក និង​សហភាពអឺរ៉ុប​ក្តី៕

OMS ប្រកាស​កម្រិត​អាសន្ន​នៃ​ការ​​ឆ្លង​​មេរោគ​​អេបូឡា នៅ​​សាធារណរដ្ឋ​ប្រជាធិបតេយ្យ​កុងហ្គោ

សហភាពអឺរ៉ុប​ដាក់​ទណ្ឌកម្ម​តួកគីដែល​ចូល​ទៅ​ជីកខួង​បូមឧស្ម័ន​​នៅ​សមុទ្រ​ស្ហ៊ីប

បារាំង៖ បុណ្យជាតិ​១៤កក្កដា​២០១៩ ក្នុង​ន័យ​សហប្រតិបត្តិការ​កងទ័ព​អឺរ៉ុប

ទិន្នន័យ​ឯកជន​របស់អ្នកប្រើប្រាស់៖ ហ្វេសប៊ុក​ត្រូវ​ពិន័យ​ឲ្យ​បង់ប្រាក់ ៥ពាន់លាន​ដុល្លារ

បារាំង​សម្ពោធ​នាវាមុជទឹក​ទំនើបថ្មី ដែល​ស្ងាត់ខ្លាំង និងមាន​សមត្ថភាព​បាញ់មីស៊ីល​ចម្ងាយមធ្យម

អ៊ីរ៉ង់​រករឿង​ចង់​ចាប់​នាវា​ដឹក​ប្រេង​អង់គ្លេស នៅ​ច្រក​សមុទ្ទ Ormuz

អ៊ីរ៉ង់-អាមេរិក៖ ទីប្រឹក្សា​កិច្ចការ​បរទេស​បារាំង​ទៅ​អ៊ីរ៉ង់ ដើម្បី​បើកផ្លូវ​សម្របសម្រួល

ក្រសួងការបរទេសអាមេរិក បើកភ្លើងខៀវ​លក់​សព្វាវុធ​ឲ្យតៃវ៉ាន់ ចំនួន​២២០០លាន​ដុល្លារ

Amnesty International៖ អាជ្ញាធរ​ហ្វីលីពីន កំពុង​ប្រហារ​ជីវិត​មនុស្ស​ក្រៅ​ផ្លូវច្បាប់ យ៉ាង​ចំហ

អ៊ីរ៉ង់បន្តប្រើអ៊ុយរ៉ាញ៉ូមជាអាវុធដើម្បីសងសឹកនឹងទណ្ឌកម្មសេដ្ឋកិច្ចរបស់អាមេរិក

​ហេតុអ្វី​ធនាគារ​កណ្តាល​អាមេរិកឈឺក្បាល នៅពេលចំនួន​ការងារ​កើនឡើងខ្លាំង?

អ៊ីរ៉ង់​ប្តេជ្ញាបង្កើន​ការ​ចម្រាញ់​សារធាតុ​អ៊ុយរ៉ាញ៉ូម​ថ្វីបើ​មាន​ការព្រមាន​ពី​អាមេរិក​

បារាំង និងអាល្លឺម៉ង់ជាប្រទេសទទួលបានតំណែងសំខាន់នៅក្នុងសហភាពអឺរ៉ុប

តើ​អ្វីជា​ជំហរ​របស់​ចិន នៅក្រោយ​បាតុកម្ម​ហិង្សា​របស់​បាតុករ​ហុងកុង ?

ហុងកុងប្រារព្ធខួប២២ឆ្នាំនៃការផ្ទេរដែនដីពីអង់គ្លេសមកឱ្យចិនវិញ យ៉ាងហិង្សា

លោក ត្រាំ ជាប្រធានាធិបតី​អាមេរិក​ដំបូង​គេ​បំផុត​ដែល​បាន​ឆ្លង​ព្រំដែន ទៅ​កូរ៉េ​ខាង​ជើង

G20៖ ជំនួបកំពូល​​បាន​បញ្ចៀស​រឿង​អាក្រក់ៗ ខណៈ​ភាព​តានតឹង​មាន​សឹង​​គ្រប់​វិស័យ

G២០៖ លោកដូណាល់ ត្រាំ​ដើរតួ​ជាអ្នកចង់​ផ្សះផ្សា

កូរ៉េខាងជើងជំរុញកូរ៉េខាងត្បូងកុំឲ្យជ្រៀតជ្រែក និងទាមទារឲ្យអាមេរិកពិនិត្យមើលយុទ្ធសាស្រ្តឡើងវិញ