សំណុំរឿងបំពុលអតីតចារកិច្ចរុស្ស៊ី ៖ ក្រុមអង្កេតឯករាជ្យអង់គ្លេសរកឃើញមុខអ្នកបញ្ជា
ហេតុការណ៍បំពុលអតីតចារកិច្ចរុស្ស៊ី ដោយប្រើសារធាតុគីមី នៅភាគខាងត្បូងប្រទេសអង់គ្លេស កាលពីឆ្នាំទៅ គឺជាសា្នដៃរបស់មន្ត្រីជាន់ខ្ពស់នៃភ្នាក់ងារចារកិច្ចយោធារុស្ស៊ី ដែលបានមកចាត់ចែងបញ្ជាដល់ទីក្រុងឡុងដ៍។ នេះបើតាមរបាយការណ៍របស់ក្រុមអង្កេតឯករាជ្យអង់គ្លេស ចេញផ្សាយនៅសៅរ៍ទី ២៩ មិថុនា ២០១៩។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៧
វិបសៃត៍ Bellingcat សហការ ជាមួយទូរទស្សន៍ BBC បានអង្កេតរកឃើញថា ប្រតិបត្តិការបំពុលសារធាតុគីមីលើអតីតចារកិច្ចរុស្ស៊ី លោក សែកហ្គៃ ស្គ្រីប៉ាល់ និងកូនស្រី ដឹកនាំដោយនាយឧត្តមសេនីយ៍នៃភ្នាក់ងារចារកិច្ចយោធារុស្ស៊ី ហៅកាត់ថា GRU ឈ្មោះ Denis Sergueïev។
បើតាមក្រុមអ្នកអង្កេតឯករាជ្យនេះ ឧត្តមសេនីយ៍រូបនេះ បានមកដល់អង់គ្លេស ចំពេលមានការបំពុលលោក ស្គ្រីប៉ាល់ និងធ្លាប់មានវត្តមាននៅប៊ុលហ្ការី ក្នុងពេលមានករណីបំពុលឈ្មួញលក់អាវុធម្នាក់ កាលពីឆ្នាំ២០១៥ដូចគ្នា។
BBC និង Bellingcat អាចសង្កេតឃើញ អំពីចលនានិងការឆ្លើយឆ្លងតាមទូរស័ព្ទ របស់ សែកហ្គឺយ៉េវ ពេលស្នាក់នៅក្រុងឡុងដ៍ ជាមួយនឹងទូរស័ព្ទមួយទៀត ដែលប្រើកាតស៊ីមគ្មានចុះបញ្ជី ដើម្បីកុំឱ្យមានបន្សល់ទុកដាន។ សែកហ្គឺយ៉េវ បានប្រើប្រព័ន្ធសង្គមដូចជា Whatsapp Telegram ដើម្បីទាក់ទងជាមួយភ្នាក់ងាររុស្ស៊ីពីរនាក់នៅភូមិសាលីប៊ូរី ដែលប៉ូលិសអង់គ្លេសចាប់ខ្លួនបានភ្លាមក្រោយហេតុការណ៍ផង និងជាមួយមេបញ្ជាការនៅក្រុងម៉ូស្គូផង។ នេះបើតាមការបញ្ជាក់របស់BBC ដោយអះអាងទៀតថា សែកហ្គឺយ៉េវ និងភរិយា មានអស័យដ្ឋានស្នាក់នៅ ជាផ្លូវការ ក្នុងបណ្ឌិតសភាយោធា របស់ភ្នាក់ងារចារកិច្ចយោធារុស្ស៊ីផង។
ការអង្កេតនេះ បានបញ្ជាក់ឱ្យឃើញកាន់តែច្បាស់អំពីគំរូប្រតិបត្តិការរបស់ក្រុមGRU នៅបរទេស ៖ “ភ្នាក់ងារថ្នាក់លើ ដែលទាក់ទងជាមួយម៉ូស្គូ ទាក់ទងយ៉ាងតិចតួចបំផុត ឬគ្មានសោះជាមួយជនដៃដល់ដែលបានទទួលបញ្ជារួចហើយ”។ នេះបើតាមការលម្អិតរបស់Bellingcat ជាមួយនឹងសេចក្តីសន្និដ្ឋានថា ការចូលរួមចំណែករបស់នាយឧត្តមសេនីយ៍ សែហ្គឺយ៉េវ បញ្ជាក់ថាប្រតិបត្តិការបំពុលអតីតចារកិច្ចរុស្ស៊ីពិតជាសំខាន់កំរិតណា។
Bellingcat ក៏មានភស្តុតាងនៃប្រតិបត្តិការអន្តរជាតិដឹកនាំដោយភ្នាក់ងារGRUនេះជាច្រើនផ្សេងទៀត។ ឡុងដ៍និងវ៉ាស៊ីនតោន ចាត់ទុកភ្នាក់ងារចារកិច្ចយោធារុស្ស៊ី គឺជាតំណាងនៃការគំរាមកំហែងសន្តិសុខនិងផលប្រយោជន៍ ផ្ទៃក្នុងរបស់បស្ចឹមលោកយ៉ាងចំបង។
សូមបញ្ជាក់ថា អតីតចារកិច្ចរុស្ស៊ី លោក សែកហ្គៃ ស្គ្រីប៉ាល់ និងកូនស្រី បានរួចពីជីវិតអំពីការប៉ុនប៉ងដាក់ថ្នាំបំពុលសម្លាប់ កាលពីដើមខែមីនាឆ្នាំ២០១៨ តែកំពុងរស់នៅដោយលាក់កំបាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ