ស្វែងយល់ពីការបោះឆ្នោតសភាអឺរ៉ុបឆ្នាំ ២០១៩
ចុះផ្សាយនៅថ្ងៃ៖
ស្តាប់ - ០៧:២១
ការរៀបចំបោះឆ្នោតជ្រើសរើសសមាជិកសភាអឺរ៉ុបបានចាប់ផ្តើមពីថ្ងៃព្រហស្បតិ៍ ទី២៣ ដល់ថ្ងៃអាទិត្យ ទី២៦ ឧសភា។ ក្នុងចំណោមប្រទេសសមាជិកអឺរ៉ុបទាំង ២៨ប្រទេស នៅសល់ ២១ប្រទេសបានរៀបចំបោះឆ្នោតក្នុងថ្ងៃអាទិត្យ ទី២៦ ឧសភាដូចគ្នា ក្នុងនោះមានបារាំង អាល្លឺម៉ង់ ឬប្រទេសអ៊ីតាលី។ ក្នុងចំនួនប្រជាជនអឺរ៉ុបទាំង ៥១៣លាននាក់ មានអ្នកបោះឆ្នោតចំនួន ៤២៧លាននាក់ដែលចូលរួមបោះឆ្នោតជ្រើសរើសសមាជិកសភាអឺរ៉ុបចំនួន ៧៥១រូបសម្រាប់អាណត្តិ ៥ឆ្នាំ។ អ្វីដែលគ្រប់គ្នាកំពុងរងចាំមើលជាមួយនឹងក្តីបារម្ភ គឺកំណើនអត្រាអ្នកមិនទៅបោះឆ្នោត និងកំណើនក្រុមប្រជានិយម រួមទាំងក្រុមជ្រុលនិយមនៅក្នុងសភាអឺរ៉ុប។
ប្រទេសសមាជិកនីមួយៗត្រូវរៀបចំការបោះឆ្នោតដាច់ដោយឡែកពីគ្នាជាមួយនឹងបញ្ជីឈ្មោះគណបក្សចូលរួមនៅក្នុងប្រទេសសមាជិកនីមួយៗ មានន័យថា ពលរដ្ឋបារាំងត្រូវចូលរួមបោះឆ្នោតជ្រើសរើសបញ្ជីឈ្មោះគណបក្ស ឬចលនានយោបាយបារាំងក្នុងប្រទេសបារាំង ពោលមិនអាចឆ្លងទៅបោះឆ្នោតជ្រើសរើសបញ្ជីឈ្មោះគណបក្ស ឬចលនានយោបាយនៅក្នុងប្រទេសសមាជិកអឺរ៉ុបផ្សេងបានទេ។ ជាមួយនឹងពលរដ្ឋសរុប ៥១៣លាននាក់ អឺរ៉ុបជាតំបន់ដែលមានពលរដ្ឋច្រើនលំដាប់ទី៣ក្នុងលោកស្ថិតនៅមុខអាមេរិក តែនៅក្រោយចិន និងប្រទេសឥណ្ឌា។
អឺរ៉ុបបានប្រើប្រព័ន្ធបោះឆ្នោតបែបសមាមាត្រ មានន័យថា ពលរដ្ឋបោះឆ្នោតឲ្យបញ្ជីឈ្មោះគណបក្ស ឬចលនានយោបាយ ពោលមិនមែនបោះឆ្នោតឲ្យបេក្ខជន ឬបេក្ខនារីណាដោយផ្ទាល់ទេ ទោះបីជានៅក្នុងបញ្ជីនីមួយៗមានសរសេរឈ្មោះបេក្ខជន ឬបេក្ខនារីក៏ដោយ។ ជាក់ស្តែងក្នុងប្រទេសបារាំង មានបញ្ជីឈ្មោះគណបក្ស ឬចលនានយោបាយចំនួន ៣៣ខុសគ្នា ហើយក្នុងបញ្ជីនីមួយៗមានសរសេរឈ្មោះបេក្ខជនចំនួន ៧៩រូប។ ពលរដ្ឋអឺរ៉ុបទាំង ២៨ប្រទេសសមាជិកត្រូវជ្រើសរើសតំណាងរាស្រ្តអឺរ៉ុបថ្មីចំនួន ៧៥១រូប។ តែចំនួនតំណាងរាស្រ្តអឺរ៉ុបមកពីប្រទេសសមាជិកនីមួយៗមានតិច ឬច្រើន គឺផ្អែកលើចំនួនពលរដ្ឋរបស់ប្រទេសសមាជិកនោះ មានន័យថា ប្រទេសសមាជិកដែលមានពលរដ្ឋច្រើននឹងទទួលបានអសនៈសភាអឺរ៉ុបច្រើន។
ជាក់ស្តែង អាល្លឺម៉ង់ត្រូវជ្រើសរើសតំណាងរាស្រ្តអឺរ៉ុបចំនួន ៩៦នាក់ បារាំងចំនួន ៧៤នាក់ ចំណែកប្រទេសម៉ាល់មានតែ ៦នាក់ប៉ុណ្ណោះ។ ទាក់ទងនឹងលទ្ធផលវិញ ទោះបីជាមាន ៧ប្រទេសបានបោះមុន និង ២១ប្រទេសទើបបោះឆ្នោតក្នុងថ្ងៃអាទិត្យ ទី២៦ ឧសភានេះក៏ដោយ ក៏លទ្ធផលនឹងត្រូវប្រកាសសរុបនាយប់ថ្ងៃអាទិត្យ ទី២៦ ឧសភានេះទាំងអស់គ្នា។ ករណីប្រទេសបារាំងដែលមានបញ្ជីឈ្មោះគណបក្ស ឬចលនានយោបាយចំនួន ៣៣ បើគណបក្ស ឬចលនាណាទទួលបានសំឡេងគាំទ្រតិចជាង ៥% គណបក្ស ឬចលនានោះនឹងត្រូវផាត់ចោល ពោលមិនអាចចូលរួមនៅក្នុងការចែកអសនៈចំនួន ៧៤អសនៈរបស់បារាំងនៅសភាអឺរ៉ុបបានទេ។
ប្រទេសសមាជិកនីមួយៗជាអ្នកកំណត់ច្បាប់បោះឆ្នោតរៀងៗខ្លួន
ប្រទេសសមាជិកនីមួយៗជាអ្នកកំណត់ច្បាប់បោះឆ្នោតរៀងៗខ្លួន ដោយប្រទេសសមាជិកខ្លះចាត់ទុកការបោះឆ្នោតជាកាតព្វកិច្ចរបស់ពលរដ្ឋម្នាក់ៗដោយមិនអាចខ្វះបាន ហើយប្រទេសសមាជិកខ្លះទៀតមិនបានកំណត់យកច្បាប់មួយនេះទេ។ ក្នុងឆ្នាំ ១៩៧៩ ការបោះឆ្នោតជាកាតព្វកិច្ចនៅក្នុងប្រទេសសមាជិកអឺរ៉ុបចំនួន ៣ ក្នុងចំណោម ៩ប្រទេសសមាជិកនៅក្នុងសហគមន៍សេដ្ឋកិច្ចអឺរ៉ុប គឺអ៊ីតាលី បែលហ្ស៊ិក និងប្រទេសលុចសំបួ។ តែប្រទេសអ៊ីតាលីបានទម្លាក់ចោលកាតព្វកិច្ចមួយនេះវិញក្នុងឆ្នាំ ១៩៩០។ សម្រាប់ការបោះឆ្នោតសភាអឺរ៉ុបឆ្នាំ ២០១៩ មានប្រទេសសមាជិកចំនួន ៥ បានអនុវត្តលើកាតព្វកិច្ចបោះឆ្នោត គឺបែលហ្ស៊ិក ក្រិច ប៊ុលហ្ការី ស្ហ៊ីប និងប្រទេសលុចសំបួ។
និយាយពីអាយុដែលអាចចូលរួមបោះឆ្នោតបានវិញក៏វាអាស្រ័យលើការកំណត់របស់ប្រទេសសមាជិកនីមួយៗដែរ។ តែប្រទេសសមាជិកអឺរ៉ុបភាគច្រើនបានកំណត់អាយុចាប់ពី ១៨ឆ្នាំឡើងទៅទើបអាចចូលរួមបោះឆ្នោតបាន។ លើកលែងតែ ៣ប្រទេស គឺក្រិចចាប់ពីអាយុ ១៧ឆ្នាំទៅ ហើយម៉ាល់ និងអូទ្រីសចាប់ពីអាយុ ១៦ឆ្នាំ។ ទាក់ទងនឹងអាយុបេក្ខជនដែលអាចឈរឈ្មោះបាន គឺមាន ១៥ប្រទេសសមាជិក ក្នុងនោះមានបារាំង និងអាល្លឺម៉ង់បានកំណត់អាយុចាប់ពី ១៨ឆ្នាំ។ មាន ១០ប្រទេសក្នុងនោះមានប៉ូឡូញ និងសាធារណរដ្ឋឆែកបានកំណត់អាយុចាប់ពី ២១ឆ្នាំទៅ។ ចំណែក៣ប្រទេសសមាជិក គឺរូម៉ានីបានកំណត់អាយុចាប់ពី ២៣ឆ្នាំទៅ ហើយអ៊ីតាលី និងក្រិចចាប់ពី ២៥ឆ្នាំទៅទើបអាចឈរឈ្មោះជាបេក្ខជនបាន។
ក្រុមអ្នកតំណាងរាស្រ្តអឺរ៉ុបបែងចែកជា ៨ក្រុមតាមពណ៌សម្បុរនយោបាយ
បច្ចុប្បន្ននេះ ក្រុមអ្នកតំណាងរាស្រ្តអឺរ៉ុបទាំង ៧៥១នាក់ត្រូវបានបែងចែកជា ៨ក្រុមខុសគ្នានៅក្នុងសភាអឺរ៉ុបដោយផ្អែកលើមនោគមវិជ្ជា និងពណ៌សម្បុរនយោបាយរបស់ពួកគេ ពោលមិនមែនផ្អែកលើសញ្ជាតិរបស់ពួកគេទេ។ ៨ក្រុមនោះមានទី១ គឺក្រុមស្តាំនិយមគាំទ្រអឺរ៉ុបដែលជាកម្លាំងខ្លាំងជាងគេនៅក្នុងសភាអឺរ៉ុបមានសមាជិកចំនួន ២១៧នាក់ ទី២ គឺក្រុមសង្គម ប្រជាធិបតេយ្យដែលមានសមាជិកចំនួន ១៨៦នាក់ ទី៣ គឺក្រុមស្តាំនិយមប្រឆាំងអឺរ៉ុបដែលមានសមាជិកចំនួន ៧៦នាក់ ទី៤ គឺក្រុមសេរីនិយមដែលមានសមាជិកចំនួន ៦៨នាក់ ទី៥ គឺក្រុមបៃតងដែលមានសមាជិកចំនួន ៥២នាក់ ទី៦ គឺក្រុមឆ្វេងនិយមដាច់ខាតដែលរួមកម្លាំងជាមួយក្រុមបៃតង ទី៧ គឺក្រុមស្អប់ខ្ពើមអឺរ៉ុប និងក្រុមប្រជានិយមដែលមានសមាជិកចំនួន ៤១នាក់ និងក្រុមទី៨ គឺក្រុមស្តាំនិយមជ្រុលដែលមានសមាជិកចំនួន ៣៧នាក់។
ទន្ទឹមនឹងការបែងចែកជា ៨ក្រុម នៅសល់តំណាងរាស្រ្តចំនួន ២១រូបទៀតដែលគ្មានស្ថិតក្នុងក្រុមណាមួយឡើយ។ និយាយពីក្រុមដែលមានអំណាច និងសម្លេងភាគច្រើននៅក្នុងសភាអឺរ៉ុបវិញក៏មិនសូវខុសគ្នានៅក្នុងសភារបស់ប្រទេសសមាជិកមួយចំនួនទេ ពោលជាការចែកអំណាចគ្នាកាន់រវាងក្រុមស្តាំនិយម និងក្រុមឆ្វេងនិយមតាំងពីឆ្នាំ ១៩៧៩។ តែក្នុងរយៈពេលចុងក្រោយនេះ និងអ្វីដែលគ្រប់គ្នាកំពុងបារម្ភខ្លាំងនៅក្នុងការបោះឆ្នោតសភាអឺរ៉ុបពេលនេះ គឺកំណើនសម្លេងរបស់ក្រុមប្រជានិយម និងក្រុមស្តាំនិយមជ្រុល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ