តួកគី៖ឧត្តមក្រុមប្រឹក្សាបោះឆ្នោតលុបចោលលទ្ធផល និងសម្រេចឲ្យបោះឆ្នោតក្នុងក្រុងអ៊ីស្តង់ប៊ុលឡើងវិញ
នៅក្នុងប្រទេសតួកគី ឧត្តមក្រុមប្រឹក្សាបោះឆ្នោតបានលុបចោលលទ្ធផល និងសម្រេចនាថ្ងៃចន្ទ ទី៦ ឧសភាឲ្យមានការរៀបចំបោះឆ្នោតជ្រើសរើសចៅហ្វាយក្រុងអ៊ីស្តង់ប៊ុលឡើងវិញ។ សេចក្តីសម្រេចនេះបានធ្វើឡើង បន្ទាប់ពីគណបក្ស AKP របស់លោកប្រធានាធិបតីអ៊ែរដូហ្កានបានបដិសេធមិនទទួលស្គាល់លទ្ធផលបោះឆ្នោតជ្រើសរើសក្រុមប្រឹក្សាឃុំ សង្កាត់កាលពីថ្ងៃទី៣១ មីនាដែលជោគជ័យបានធ្លាក់ក្នុងដៃគណបក្សប្រឆាំងសម្រាប់តំណែងចៅហ្វាយក្រុងអង់ការ៉ា និងអ៊ីស្តង់ប៊ុល។ លោកអ៊ែរដូហ្កានបានសាទរដោយចាត់ទុកការសម្រេចរបស់ឧត្តមក្រុមប្រឹក្សាបោះឆ្នោតថាជាសេចក្តីសម្រេចដ៏ប្រសើរ។ តែគណបក្សប្រឆាំងបានបរិហារដោយចាត់ទុកជាអំពើក្បត់ និងសន្យាមិនបោះបង់ចោលទេ។
ចុះផ្សាយនៅថ្ងៃ៖
ស្តាប់ - ០២:១៨
ទោះបីជាឧត្តមក្រុមប្រឹក្សាបោះឆ្នោតបានលើកយកហេតុផលណាមួយទៅពន្យល់ពីការសម្រេចចិត្តរបស់ខ្លួនក៏ដោយក៏គេហ៊ាននិយាយថា វាជាការបំពេញចិត្តតាមការទាមទារ ចង់បានរបស់មនុស្សខ្លាំងតួកគីលោកអ៊ែរដូហ្កាន។ លោកអ៊ែរដូហ្កាន និងគណបក្ស AKP របស់លោកហាក់បន្តមិនសុខចិត្ត និងមិនអាចទទួលយកការបាត់បង់ក្រុងអ៊ីស្តង់ប៊ុលដែលបានស្ថិតក្នុងដៃ AKP តាំងពី ២៥ឆ្នាំបានឡើយ។ គួររម្លឹកថាក្នុងថ្ងៃទី៣១ មីនាកន្លងទៅ តួកគីបានរៀបចំបោះឆ្នោតជ្រើសរើសក្រុមប្រឹក្សាឃុំ សង្កាត់ និងដែលគណបក្ស AKP របស់លោកអ៊ែរដូហ្កានបានបាត់បង់ទីក្រុងធំចំនួនពីរ គឺអង់ការ៉ា និងអ៊ីស្តង់ប៊ុល។ តែការបាត់បង់ទីក្រុងអ៊ីស្តង់ប៊ុលត្រូវបានលោកអ៊ែរដូហ្កានបរិហារពីការបន្លំសន្លឹកឆ្នោត និងបានទាមទារយ៉ាងទទូចឲ្យមានការរៀបចំបោះឆ្នោតឡើងវិញ។
ទីបំផុត និងដោយមិនអាចបន្តទ្រាំទ្រនឹងគំនាបរបស់លោកអ៊ែរដូហ្កានបាន ឧត្តមក្រុមប្រឹក្សាបោះឆ្នោតគ្មានជម្រើសអ្វីផ្សេងក្រៅពីលុបចោលលទ្ធផល និងតម្រូវឲ្យមានការរៀបចំបោះឆ្នោតនៅក្រុងអ៊ីស្តង់ប៊ុលឡើងវិញនាថ្ងៃទី២៣ មិថុនាខាងមុខ។ លោកអ៊ែរដូហ្កានបានសាទរដោយបានចាត់ទុកជាសេចក្តីសម្រេចដ៏ប្រសើរ។ តែលោក Ekrem Imamoglu ចៅហ្វាយក្រុងថ្មីអ៊ីស្តង់ប៊ុលមកពីគណបក្សប្រឆាំងដែលទើបកាន់តំណែងបានប៉ុន្មានសប្តាហ៍បានបរិហារដោយចាត់ទុកជាអំពើក្បត់ និងសន្យាមិនបោះបង់ចោលទេ។ ចំណែកគណបក្សប្រឆាំងរបស់លោក Imamoglu បានចោទលោកអ៊ែរដូហ្កានថាជាអ្នកចាញ់អាក្រក់ និងបានប្រើគ្រប់មធ្យោបាយដើម្បីគ្រប់គ្រងក្រុងអ៊ីស្តង់ប៊ុល។
ប្រតិកម្មបរិហារក៏មានពីអន្តរជាតិដោយប្រមុខការទូតអាល្លឺម៉ង់មិនយល់ពីការសម្រេចចិត្តរបស់ឧត្តមក្រុមប្រឹក្សាបោះឆ្នោតតួកគី និងថា មានតែអ្នកបោះឆ្នោតតួកគីទេដែលជាអ្នកសម្រេចឲ្យឥស្សរជនណាធ្វើជាចៅហ្វាយក្រុងអ៊ីស្តង់ប៊ុល។ យ៉ាងណាក៏ដោយ លោក Ekrem Imamoglu នឹងត្រូវចុះចេញពីកៅអីចៅហ្វាយក្រុងអ៊ីស្តង់ប៊ុល ហើយពីពេលនេះដល់ថ្ងៃរៀបចំបោះឆ្នោតឡើងវិញនៅថ្ងៃទី២៣ មិថុនាខាងមុខ កៅអីចៅហ្វាយក្រុងអ៊ីស្តង់ប៊ុលនឹងអង្គុយបណ្តោះអាសន្នដោយឥស្សរជនម្នាក់ជ្រើសរើសដោយរដ្ឋាភិបាល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ