ថ្ងៃនេះ នៅ រដ្ឋអ៊ុយក្រែន ជា ការបោះឆ្នោតប្រធានាធិបតីជុំ ទី ២
ថ្ងៃអាទិត្យ ២១ មេសានេះ តាំងពីម៉ោង ៨ ព្រឹក លុះរហូតដល់ម៉ោង ៨ យប់ នៅ ប្រទេស អ៊ុយក្រែន អ្នកស្រុកម្ចាស់ឆ្នោត នាំគ្នាទៅកាន់ហិបឆ្នោត ចូលរួមក្នុងការបោះឆ្នោតជុំទី២ ដើម្បីជ្រើសរើស ប្រធានាធិបតី សម្រាប់ អាណត្តិ ៥ ឆ្នាំ ថ្មី ។ ស្របនឹងលទ្ធផលស្ទង់មតិ ត្រូវហក់ឡើងទៅដឹកនាំរដ្ឋនេះ គឺ តារាកំប្លែងអាយុ ៤១ ឆ្នាំ លោក Volodimir Zelenski ដែលគ្មានបទពិសោធន៍នយោបាយទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:២០
មូលហេតុដែលញ៉ាំងឲ្យមានការបោះឆ្នោតជុំទី២នេះ គឺមកពីក្នុងជុំទី១ កាលពី ៣ សប្តាហ៍មុន ពី ក្នុងចំណោមបេក្ខជន ៣៩ នាក់ គ្មានបេក្ខជនណា ចេះដណ្តើមបានសំឡេងគាំទ្រ លើសពី ៥០% ឡើយ។ ម៉្លោះហើយ បានជាចូលប្រឡូក ក្នុងជុំទី២ផ្តាច់ព្រ័ត្រនេះ គឺតែបេក្ខជន ពីរនាក់ ដែលកាលណោះ ដណ្តើម បាន សំឡេងគាំទ្រច្រើនជាងគេ ពោលគឺលោក Volodimir Zelenski អាយុ ៤១ ឆ្នាំ ដែលគាំទ្រដោយសម្លេង ៣០,២% ឬ សឹងពីរដង លើសគូប្រជែងខ្លួនលោក Petro Poroshenko អាយុ ៥៣ ឆ្នាំ ប្រធានាធិបតីចប់ អាណត្តិ ទី ១។
តារាកំប្លែង Zelenski មានប្រជាប្រិយភាពខ្អស់យ៉ាងនេះ ក៏ដោយសារគាត់បានសំដែងក្នុងឈុតរឿងបញ្ចាំង តាមទូរទស្សន៍ ក្រោមឈ្មោះថា “ អ្នកបម្រើប្រជាជន” ជាទីដែលគាត់បានដើរតួជា បណ្ឌិតសាស្ត្រាចារ្យ ប្រវត្តិសាស្ត្រ ក្លាយទៅជាប្រមុខរដ្ឋចំអកឲ្យ ពួកអ្នកនយោបាយពុករលួយ និង ពួកអ្នកជំនួញទុច្ចរិត។
តាមការស្ទង់មតិ ចេញ ៥ ថ្ងៃមុន ដោយវិទ្យាស្ថាន KIIS ក្នុងជុំទី២ លោក Zelenski អាចទទួលបានសំឡេង គាំ្រដល់ទៅ ៧២% រឹតតែលើសឆ្ងាយពី លោក Poroshenko ដែលអាចបានត្រឹមតែ ២៥%។
ក្នុងការតស៊ូមតិ ដែលបានប្រព្រឹត្តទៅ នៅកីឡាដ្ឋានក្រុងគៀវ យប់ថ្ងៃសុក្រម្សិលម៉្ងៃ នៅពីមុខទស្សនិកជន ២ម៉ឺន ២ពាន់នាក់ មុនដល់ជុំទី២ បេក្ខជនទាំងពីរ បាន តិះដៀល និង ចោទគ្នាទៅវិញទៅមក។
តបនឹងការជេរប្រមាថលើរូបគាត់ លោក Zelenski បានលាតត្រដាងអត្តសញ្ញាណគាត់ដូចតទៅ ៖ “គាត់ជា អ្នកដឹកនាំថ្មី។ គាត់មិនដែលធ្វើនយោបាយទេ។ គាត់មិនដែលធ្វើឲ្យនរណាខកចិត្តឡើយ។ គាត់ជា មនុស្សបើកចំហ អាចថ្លោះធ្លោយប្រព្រឹត្តខុស អាចមួម៉ៅ។ ខ្ញុំមិនលាក់បំបាំងឡើយ ទឹកចិត្តរំជួលរបស់ខ្ញុំ”។
តាមការស្ទង់មតិ ចេញផ្សាយខែមុន ដោយ អង្គការសង្គមសាស្ត្រ Gallup កម្រិតជឿទុកចិត្តរបស់បណ្តាជន អ៊ុយក្រែនលើ រដ្ឋាភិបាលខ្លួន សព្វថ្ងៃ គឺត្រឹមតែ ៩% ប៉ុណ្ណោះ ដែលទាបបំផុត ក្នុងលោក។ ដ្បិតជាទូទៅ នៅក្នុងលោក តួលេខបែបនេះ ជាមធ្យម គឺ ៥៦%។ ហើយមានតែអ្នកស្រុកអ៊ុយក្រែន ១២ % ប៉ុណ្ណោះ ដែលយល់ថា ការបោះឆ្នោតក្នុងប្រទេសខ្លួន ប្រព្រឹត្តទៅដោយ សមធម៌។ បើនិយាយពី អំពើពុករលួយ នោះ ពលរដ្ឋអ៊ុយក្រែន ដល់ទៅ ៩១% នាំគ្នានិយាយថា បាតុភាពនេះ នៅក្នុងប្រទេសខ្លួន ជារឿងធម្មតាសោះ។
តាមមតិពួកអ្នកនយោបាយវិទូនៅអ៊ុយក្រែន ក៏ដូចជានៅរុស្ស៊ី អ្នកស្រុកអ៊ុយក្រែន បោះឆ្នោតគាំទ្រលោក Zelenski មកពី ធុញទ្រាន់នឹង នយោបាយ”សង្គ្រាមនិយម” របស់លោក Poroshenko គិតតែទទូចបស្ចិមលោក ឲ្យប្រយុទ្ធទល់នឹងរុស្ស៊ីជាសត្រូវ មិនគិតអំពី ជីវភាពរស់នៅ របស់អ្នកស្រុកនៅ អ៊ុយក្រែន-ប្រទេសដែលក្រោមអំណាច ៥ ឆ្នាំ របស់លោក Poroshenko ក្លាយទៅស្ថិតនៅក្នុង ចំណោមប្រទេសដែល ក្រជាងគេ ក្នុងលោក ទាល់តែអ្នកស្រុកពី ៨ ទៅ ១០ លាននាក់ ចាកចេញពីប្រទេស ទៅស៊ីឈ្នួល លក់កម្លាំង ពលកម្មខ្លួន នៅបរទេស ចំណែកផលិតផលសរុបក្នុងស្រុក GDP ក្នុង ៥ ឆ្នាំ បានធ្លាក់ចុះអស់ពីរដង ពី ២០០.០០០ លាន ដុល្លារ មកនៅត្រឹម ៩៨.០០០ លាន ដុល្លារ។ មិនមែន ចៃដន្យទេ ដែលលោក Zelenski សន្យាថា នឹងកែប្រែប្រព័ន្ធអំណាចសព្វថ្ងៃក្នុងប្រទេស។
ទាំងលោក Zelenski ទាំងលោក Poroshenko សុទ្ធតែ ជាអ្នកបស្ចិមលោកនិយម ចង់ឲ្យអ៊ុយក្រែន បាន ចូល ជាសមាជិក សហភាពអឺរ៉ុប និង បក្សសម្ព័ន្ធអូតង់ គ្រាន់តែ សម្រាប់លោក Zelenski បញ្ហាចូលអូតង់ គឺត្រូវឆ្លងកាត់ តាមប្រជាមតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ