តើអង់គ្លេសកំពុងធ្វើដំណើរលើផ្លូវចេញពីសហភាពអឺរ៉ុបដោយគ្មានកិច្ចព្រមព្រៀងឬ?
សំណុំរឿង Brexit កំពុងបន្តធ្វើឲ្យប្រទេសអង់គ្លេស និងសហភាពអឺរ៉ុបឈឺក្បាលដូចគ្នា។ បន្ទាប់ពីត្រូវបានសភាអង់គ្លេសបោះឆ្នោតច្រានចោលជាលើកទី៣ នាថ្ងៃសុក្រ ទី២៩ មីនាមក លោកស្រីនាយករដ្ឋមន្រ្តីអង់គ្លេសតេរ៉េហ្សា មេបានសន្យានាថ្ងៃសៅរ៍ ទី៣០ មីនាថា លោកស្រីនឹងដាក់កិច្ចព្រមព្រៀងដែលលោកស្រីបានចុះហត្ថលេខាជាមួយអឺរ៉ុបកាលពីខែវិច្ឆិកា ឆ្នាំទៅមិញដដែលនេះឲ្យសភាបោះឆ្នោតជាលើកទី៤ ទៀត។ គួររម្លឹកថា បើយោងតាមកិច្ចព្រមព្រៀង ថ្ងៃទី២៩ មីនាជាថ្ងៃដែលអង់គ្លេសត្រូវចាកចេញពីអឺរ៉ុបជាផ្លូវការ។ តែនាថ្ងៃព្រហស្បតិ៍ ទី២១ មីនា និងតាមសំណើសុំលើកពេលរបស់អង់គ្លេស អឺរ៉ុបបានទុកថ្ងៃចំនួនពីរឲ្យអង់គ្លេសជ្រើសរើស គឺថ្ងៃទី១២ មេសា និងថ្ងៃទី២២ ឧសភា។ តែជម្រើសថ្ងៃទាំងពីរត្រូវអាស្រ័យលើការបោះឆ្នោតទទួលយក ឬមិនទទួលយកកិច្ចព្រមព្រៀងពីសភាអង់គ្លេស។ បើពីពេលនេះដល់ថ្ងៃទី១២ មេសា សភាអង់គ្លេសនៅតែបោះឆ្នោតមិនទទួលយកកិច្ចព្រមព្រៀង ហើយបើអង់គ្លេសគ្មានបង្ហាញសំណើអ្វីទេ នោះអង់គ្លេសត្រូវចេញពីអឺរ៉ុបដោយគ្មានកិច្ចព្រមព្រៀងក្នុងថ្ងៃទី១២ មេសា។ ដូច្នេះ លោកស្រីមេមានពេល ២សប្តាហ៍ក្នុងការរកដំណោះស្រាយមួយឲ្យអឺរ៉ុបពិនិត្យដើម្បីបញ្ចៀសពីការចាកចេញគ្មានកិច្ចព្រមព្រៀង។ តាមលោកហ្វីលីប ម៉ាលីយែរ សាស្រ្តាចារ្យវិទ្យាសាស្រ្តនយោបាយនៅ University College of London ក្រុមសេដ្ឋវិទូក៏ដូចជាអឺរ៉ុបហាក់យល់ឃើញដូចគ្នាពីការចាកចេញរបស់អង់គ្លេសដោយគ្មានកិច្ចព្រមព្រៀង។
ចុះផ្សាយនៅថ្ងៃ៖
ស្តាប់ - ០១:២៤
« ពិតណាស់ សហភាពអឺរ៉ុបបានសង្ឃឹមរហូតដល់នាទីចុងក្រោយថាកិច្ចព្រមព្រៀងដែលខ្លួនឯងបានចុះហត្ថលេខាជាមួយលោកស្រីតេរ៉េហ្សា មេនឹងទទួលបានការបោះឆ្នោតយល់ព្រមពីសភាអង់គ្លេស។ ទីបំផុត សភាអង់គ្លេសបានបោះឆ្នោតច្រានចោលជាថ្មី។ ឃើញថា ចង់ ឬមិនចង់ សហភាពអឺរ៉ុបបានក្លាយជាអ្នកទស្សនាម្នាក់ដែលបានតែមើល និងមិនអាចធ្វើអ្វីកើតនៅចំពោះមុខភាពអសត្ថភាពរបស់សភាអង់គ្លេសក្នុងការនិយាយសម្លេងតែមួយដើម្បីកំណត់ផ្លូវចេញពីសហភាពអឺរ៉ុប។
ខណៈនេះ សហភាពអឺរ៉ុបហាក់គ្មានជម្រើសអ្វីផ្សេងក្រៅពីបន្តរង់ចាំតទៅមុខទៀត ហើយខ្ញុំជឿជាក់ថា អឺរ៉ុបនឹងអាចរកឃើញជំហររួមមួយដើម្បីនិយាយប្រាប់អង់គ្លេសថា ដោយសារតែគ្រប់សេណារីយ៉ូកន្លងមកមិនមែនជាសេណារីយ៉ូល្អ អង់គ្លេសត្រូវស្នើឡើងនូវសេណារីយ៉ូថ្មីមួយដែលល្អ។ សម្រាប់អឺរ៉ុប សេណារីយ៉ូដ៏ល្អគឺមិនចង់ឲ្យ និងមិនចង់ឃើញសំណុំរឿង Brexit បន្តអូសបន្លាយ និងប្រទាញប្រទង់យូរទៅមុខទៀតទេ។
អឺរ៉ុបយល់ឃើញថា បើគ្មានក្តីសង្ឃឹមណាមួយដែលឈានទៅទម្លាយភាពទាល់ច្រកដោយផ្តល់ផលប្រយោជន៍សម្រាប់អឺរ៉ុបទេ នោះខ្ញុំគិតថា សហភាពអឺរ៉ុបនឹងងាករកផ្លូវចេញឆាប់រហ័សរបស់ប្រទេសអង់គ្លេស រួមទាំងច្រកចេញដោយគ្មានកិច្ចព្រមព្រៀងផង »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ