រដ្ឋបាលអាមេរិកប្រើទណ្ឌកម្មលើកដំបូងប្រឆាំងនឹងតុលាការព្រហ្មទណ្ឌអន្តរជាតិក្រុងឡាអេ
នៅថ្ងៃសុក្រ ទី១៥ មីនា រដ្ឋបាលអាមេរិកតាមរយៈប្រមុខការទូតលោក Mike Pompeo បានប្រកាសចេញនូវទណ្ឌកម្មប្រឆាំងនឹងតុលាការព្រហ្មទណ្ឌអន្តរជាតិក្រុងឡាអេ។ គឺជាទណ្ឌកម្មមិនផ្តល់ទិដ្ឋាការដល់ក្រុមមន្រ្តីរបស់តុលាការព្រហ្មទណ្ឌអន្តរជាតិដែលកំពុង និងបានបើកការស៊ើបអង្កេតលើឧក្រិដ្ឋកម្មសង្រ្គាមជាយថាហេតុប្រព្រឹត្តដោយទាហានអាមេរិកាំងនៅក្នុងប្រទេសអាហ្វហ្កានីស្ថាន។ គួររម្លឹកថាក្នុងខែកញ្ញា ឆ្នាំ ២០១៨ សេតវិមានបានចេញមុខព្រមានដាក់ទណ្ឌកម្មប្រឆាំងនឹងក្រុមចៅក្រម ឬក្រុមរដ្ឋអាជ្ញានៃតុលាការព្រហ្មទណ្ឌអន្តរជាតិ បើពួកគេហ៊ានបើកការស៊ើបអង្កេតលើអាមេរិក ឬប្រទេសអ៊ីស្រាអែល។
ចុះផ្សាយនៅថ្ងៃ៖
ស្តាប់ - ០២:១០
កម្មវត្ថុរបស់រដ្ឋបាលអាមេរិកគឺច្បាស់ណាស់ រារាំង និងទប់ស្កាត់លើគ្រប់ការស៊ើបអង្កេតរបស់តុលាការព្រហ្មទណ្ឌអន្តរជាតិស្តីពីឧក្រិដ្ឋកម្មសង្រ្គាមជាយថាហេតុប្រព្រឹត្តដោយទាហានអាមេរិក។ មធ្យោបាយទប់ស្កាត់ដែលអាមេរិកបានប្រើ គឺមិនផ្តល់ទិដ្ឋាការចូលក្នុងទឹកដីអាមេរិកាំងឲ្យក្រុមចៅក្រម ឬក្រុមរដ្ឋអាជ្ញានៃតុលាការព្រហ្មទណ្ឌអន្តរជាតិដែលជាប់ពាក់ព័ន្ធនៅក្នុងការស៊ើបអង្កេត។ ទិដ្ឋាការដែលបានប្រគល់រួចហើយនឹងត្រូវដកហូតវិញ ហើយការដាក់ពាក្យសុំទិដ្ឋាការថ្មីនឹងត្រូវបដិសេធ។ ប្រមុខការទូតអាមេរិកលោក Mike Pompeo បានប្រកាសឲ្យដឹងថា វិធានការនេះបានដាក់ឲ្យអនុវត្តជាផ្លូវការហើយ និងបញ្ជាក់ថា វិធានការដូចគ្នានេះក៏ត្រូវបានអនុវត្តដោយក្រុមប្រទេសសម្ព័ន្ធមិត្តអាមេរិក ដូចយ៉ាងប្រទេសអ៊ីស្រាអែល។
លោក Mike Pompeo បានព្រមានបន្ថែមថា អាមេរិកនឹងដាក់ទណ្ឌកម្មថ្មីទៀត មានទាំងទណ្ឌកម្មសេដ្ឋកិច្ចផង ប្រសិនបើតុលាការព្រហ្មទណ្ឌអន្តរជាតិមិនព្រមប្តូរជំហររបស់ខ្លួនទេ។ គួររម្លឹកថា ចំណាត់ការរបស់រដ្ឋបាលក្រុងវ៉ាស៊ីនតោនពេលនេះបានធ្វើឡើង ក្រោយពីរដ្ឋអាជ្ញាតុលាការព្រហ្មទណ្ឌអន្តរជាតិលោកស្រី Fatou Bensouda បានសម្រេចក្នុងខែវិច្ឆិកា ឆ្នាំ ២០១៧ បើកការស៊ើបអង្កេតលើឧក្រិដ្ឋកម្មសង្រ្គាមជាយថាហេតុប្រព្រឹត្តដោយទាហានអាមេរិកនៅក្នុងប្រទេសអាហ្វហ្កានីស្ថាន។ តាំងពីការសម្រេចរបស់លោកស្រី Fatou មក ស្ថាប័នអន្តរជាតិទទួលបន្ទុកកាត់ទោសក្នុងរឿងឧក្រិដ្ឋកម្មសង្រ្គាម និងឧក្រិដ្ឋកម្មប្រឆាំងមនុស្សជាតិមួយនេះបានក្លាយជាផ្ទាំងស៊ីបនៃការវាយប្រហារពីសំណាក់រដ្ឋបាលអាមេរិក។
កាលពីខែកញ្ញា ឆ្នាំ ២០១៨ លោកចន បុលតុន ទីប្រឹក្សាសន្តិសុខជាតិរបស់ប្រធានាធិបតីអាមេរិកធ្លាប់បានព្រមានចាស់ដៃប្រឆាំងនឹងតុលាការព្រហ្មទណ្ឌអន្តរជាតិដោយចាត់ទុកជាស្ថាប័នអសមត្ថភាព គ្មានការទទួលខុសត្រូវ និងប្រកបដោយគ្រោះថ្នាក់។ ជាប្រតិកម្មតបវិញតាមរយៈសេចក្តីប្រកាសព័ត៌មានចេញផ្សាយក្នុងថ្ងៃសុក្រ ទី១៥ មីនា តុលាការព្រហ្មទណ្ឌអន្តរជាតិបានបញ្ជាក់ពីការបន្តការងារឯករាជ្យរបស់ខ្លួនដោយមិនបាក់ទឹកចិត្ត ឬខ្លាចការគំរាមរបស់អ្នកណាម្នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ