ហេតុអ្វីបានជាប្រទេសបារាំងខឹងសម្បារនឹងប្រទេសអ៊ីតាលីខ្លាំងម្ល៉េះ?
នៅថ្ងៃព្រហស្បតិ៍ ទី៧ កុម្ភៈ ក្រសួងការបរទេសបារាំងបានកោះហៅឯកអគ្គរដ្ឋទូតរបស់ខ្លួនប្រចាំប្រទេសអ៊ីតាលីឲ្យចូលស្រុកដើម្បីពិគ្រោះយោលបល់។ ការកោះហៅនេះបានធ្វើឡើង បន្ទាប់ពីថ្នាក់ដឹកនាំអ៊ីតាលីបានប្រើសម្តីវាយប្រហារ និងចោទប្រកាន់បារាំងមិនធ្លាប់មាននារយៈពេលប៉ុន្មានខែចុងក្រោយនេះ ពិសេសទាក់ទងនឹងវិបត្តិអាវកាក់លឿងក្នុងប្រទេសបារាំង។ ទីក្រុងប៉ារីសបានយល់ឃើញថា ការដែលថ្នាក់ដឹកនាំអ៊ីតាលីខ្លះមិនយល់ស្រប ឬយល់ឃើញយ៉ាងម៉េចលើបញ្ហាផ្ទៃក្នុងរបស់បារាំងជារឿងមួយ តែការឆ្លៀតយកវិបត្តិបារាំងធ្វើជាឧបករណ៍ដើម្បីទាញយកសន្លឹកឆ្នោតជារឿងមួយដែលបារាំងមិនអាចទទួលយកបានឡើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៦
កំហឹងរបស់បារាំងចំពោះអ៊ីតាលីពេលនេះបានធ្វើឡើងតាមរយៈសេចក្តីប្រកាសព័ត៌មានមួយរបស់ក្រសួងការបរទេស។ នៅក្នុងសេចក្តីប្រកាសពត៌មាននេះ លោកស្រីអាញែស វុនដឺមុលែដែលជាអ្នកនាំពាក្យបានលើកឡើងពីការចោទប្រកាន់ញយដង ការវាយប្រហារគ្មានមូលដ្ឋាន និងសេចក្តីថ្លែងការណ៍បំផ្លើសលើបារាំងពីសំណាក់អ៊ីតាលី។ « ការជ្រៀតជ្រែកចុងក្រោយរបស់អ៊ីតាលីជាការបង្ករឿងបន្ថែម និងមិនអាចទទួលយកបានទេ ព្រោះទី១ វាជាការបំពានលើការគោរពនៃជម្រើសប្រជាធិបតេយ្យរបស់ពលរដ្ឋជាមិត្ត និងជាសម្ព័ន្ធមិត្ត និងទី២ វាជាការបំពានលើការគោរពរវាងរដ្ឋាភិបាលទាំងពីរដែលបានជាប់ឆ្នោតតាមរយៈការបោះឆ្នោតដោយសេរី និងប្រជាធិបតេយ្យ » នេះជាការគូសបញ្ជាក់របស់លោកស្រីអាញែស។
អ្នកនាំពាក្យក្រសួងការបរទេសបារាំងរូបនេះដដែលបានបន្ថែមថា ទង្វើរបស់អ៊ីតាលីចំពោះបារាំងពេលនេះជាទង្វើមួយមិនធ្លាប់មាន គិតតាំងពីក្រោយការបញ្ចប់សង្រ្គាម។ អ៊ីតាលីតាមរយៈរដ្ឋមន្រ្តីក្រសួងមហាផ្ទៃលោកម៉ាត់តេអូ សាលវីនីបានឆ្លើយតបនឹងសេចក្តីប្រកាសព័ត៌មានរបស់ក្រសួងការបរទេសបារាំងដោយសុំជួបលោកប្រធានាធិបតីបារាំងម៉ាក្រុង និងពន្យល់ពីការមិនចង់មានជម្លោះជាមួយអ្នកណាម្នាក់។ តែទន្ទឹមគ្នានេះ លោកសាលវីនីក៏ឆ្លៀតស្នើបារាំងឲ្យបញ្ឈប់ចាប់បញ្ជូនជនអន្តោប្រវេសន៍ទៅកាន់ព្រំដែន និងឈប់ផ្តល់ទីជម្រកឲ្យក្រុមភេរវជនអ៊ីតាលី។ គួររម្លឹកថាក្នុងថ្ងៃពុធ ទី៦ កុម្ភៈ ក្រសួងការបរទេសបារាំងធ្លាប់បានបរិហារលើជំនួបរវាងឧបនាយករដ្ឋមន្រ្តីអ៊ីតាលីលោកល្វីហ្ស៊ី ឌីម៉ាយអូ និងក្រុមអ្នកតំណាងអាវកាក់លឿងបារាំង។
ជំនួបនេះត្រូវបានលោកល្វីហ្ស៊ីខ្លួនឯងប្រកាសលើបណ្តាញសង្គមរបស់លោកក្នុងថ្ងៃអង្គារ ទី៥ កុម្ភៈដោយបន្ថែមឃ្លាពីរដូចគ្នាថា ខ្យល់នៃការផ្លាស់ប្តូរនៅបារាំងបានឈានមកដល់ហើយ។ គួររម្លឹកថានៅមុនមានជំនួបជាមួយក្រុមអាវកាក់លឿងបារាំង លោកល្វីហ្ស៊ីក៏ដូចលោកសាលវីនីធ្លាប់បានប្រើសម្តីវាយប្រហារខ្លាំងលើអំណាចនីតិប្រតិបត្តិបារាំង។ លោកសាលវីនីហ៊ានទាំងនិយាយដោយសង្ឃឹមថា ប្រជាជនបារាំងនឹងត្រូវរួចផុតពីការគ្រប់គ្រងរបស់ប្រធានាធិបតីដ៏អសមត្ថភាពនាពេលឆាប់ៗខាងមុខ។ លោកស្រីអ្នកនាំពាក្យក្រសួងការបរទេសបារាំងបានចាត់ទុកសម្តីរបស់លោកសាលវីនីថាជាសម្តីមិនធ្លាប់ឮរវាងអ្នកទទួលខុសត្រូវប្រទេសស្ថាបនិកសហភាពអឺរ៉ុប។
តាមលោកស្រីអាញែស មានការយល់ឃើញមិនដូចគ្នាជារឿងមួយ តែការយកទំនាក់ទំនងធ្វើជាឧបករណ៍ដើម្បីកេងចំណេញសន្លឹកឆ្នោតជារឿងមួយផ្សេងទៀត។ គួរបញ្ជាក់ថា សង្រ្គាមពាក្យសម្តីរវាងបារាំង និងអ៊ីតាលីពេលនេះបានធ្វើឡើង ក្នុងពេលអឺរ៉ុបគ្រោងរៀបចំបោះឆ្នោតនៅថ្ងៃទី២៦ ឧសភាខាងមុខ។ ចំណែកលោកសាលវីនីកំពុងព្យាយាមប្រមូលកម្លាំងស្តាំនិយមជ្រុលអឺរ៉ុបដើម្បីប្រឆាំងនឹងក្រុមអ្នកនិយមអឺរ៉ុបដែលប្រធានាធិបតីបារាំងលោកម៉ាក្រុងកំពុងប្រមូលផ្តុំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ