អតីតប្រធានាធិបតីបារាំងចូលបំភ្លឺតុលាការរឿងឃាតកម្មលើអ្នកកាសែតRFI នៅម៉ាលី
ជាង៥ឆ្នាំក្រោយហេតុការណ៍ឃាតកម្មសម្លាប់អ្នកកាសែតរបស់វិទ្យុបារាំងអន្តរជាតិពីរនាក់ នៅប្រទេសម៉ាលី តុលាការបានកោះហៅអតីតប្រធានាធិបតីបារាំង លោក ហ្វ្រង់ស័រ ហូឡង់ ឱ្យមកចូលបំភ្លឺ ក្នុងនាមជាសាក្សី។ ការផ្តល់សក្ខីកម្ម បានប្រព្រឹត្តទៅនៅថ្ងៃទី ១១មករា ២០១៩ តែប្រភពស្និទ្ធនឹងលោកអតីតប្រធានាធិបតី ទើបបានបញ្ជាក់ដំណឹងនៅថ្ងៃចន្ទនេះ។
ចុះផ្សាយនៅថ្ងៃ៖
ស្តាប់ - ០២:១៨
នេះជាលើកទីមួយ តាំងសំណុំរឿងអង្កេតចាប់បើកមក ដែលមានឥស្សរជនកំពូលរបស់ប្រទេសចូលឆ្លើយបំភ្លឺនៅចំពោះមុខតុលាការ ក្នុងនាមជាសាក្សី ៖ ចៅក្រមបានកោះហៅអតីតប្រធានភ្នាក់ងារចារកិច្ចបារាំង កាលពីថ្ងៃទី ១០ធ្នូ ២០១៨ ឯលោកអតីតប្រធានាធិបតី ហ្វ្រង់ស័រ ហូឡង់ នៅថ្ងៃទី ១១មករា ២០១៩។
បើតាមភ្នាក់ងារសារព័ត៌មានបារាំង AFP តុលាការចង់ដឹងថាតើពិតជាមានសំឡេងសន្ទនារវាងអ្នកបញ្ជានិងឃាតករដៃដល់ដែលជាអ្នកសម្លាប់អ្នកកាសែតបារាំងទាំងពីររូបមែនដែរឬយ៉ាងណា ? នេះមិនមែនជាសំណួរចៃដន្យទេ ! នៅខែធ្នូឆ្នាំ២០១៣ ពោលគឺមួយខែក្រោយហេតុការណ៍ឃាតកម្ម ក្នុងកិច្ចសន្ទនាក្រៅផ្លូវការជាមួយអ្នកកាសែតម្នាក់ លោក ហ្វ្រង់ស័រហូឡង់ ដែលកាលណោះជាប្រធានាធិបតី បានបង្ហើបថាបារាំងចាប់បានកិច្ចសន្ទនាតាមទូរស័ព្ទ ឮអ្នកដែលទំនងជាមេកើយនិយាយបន្ទោសឃាតករ ដែល “ធ្វើការមិនល្អ នាំឱ្យខូចការ”។ ហើយកាលពីខែតុលាកន្លងទៅ លោកបានលើកនិយាយអំពីបញ្ហានេះម្តងទៀត ជាមួយអ្នកកាសែតរបស់វិទ្យុបារាំងអន្តរជាតិ និងអតីតប្រធានភ្នាក់ងារចារកិច្ច។
ប៉ុន្តែសម្រាប់ពេលនេះ គេរកមិនឃើញដានសំឡេងតម្កល់ក្នុងសំណុំឯកសារសោះ ! ហើយនៅចំពោះមុខចៅក្រម ទាំងអតីតប្រធានាធិបតី ក៏ដូចជាអតីតប្រធានចារកិច្ច សុទ្ធតែបដិសេធ។ បើតាមភ្នាក់ងារសារព័ត៌មានបារាំងAFP ដដែល លោក ហ្វ្រង់ស័រ ហូឡង់ បានសម្តែងការសោកស្តាយដែលគេនាំគ្នាព្រលាត់សំដីលោកមិនត្រឹមត្រូវ និងបានពន្យល់ប្រាប់តុលាការថាលោកមិនចងចាំកិច្ចសន្ទនានោះទេ ហើយមិនជឿថាមានការចាប់បានសំឡេងនោះឡើយ។
សូមបញ្ជាក់ថាអ្នកកាសែតរបស់វិទ្យុបារាំងទាំងពីរ គឺGhislaine Dupont និង Claude Verlon ត្រូវបានជនប្រដាប់អាវុធមួយក្រុមចាប់ខ្លួន រួចបាញ់សម្លាប់នៅថ្ងៃទី ២វិច្ឆិកា ឆ្នាំ២០១៣ នៅតំបន់គីដាល់ ភាគខាងជើងប្រទេសម៉ាលី ក្រោយពីបានជួបសម្ភាសន៍ជាមួយតំណាងពួកឧទ្ទាមនៃចលនារំដោះជាតិអាហ្សាវាដ។
សមាគមញាតិមិត្ត និងក្រុមគ្រួសារ Ghislaine Dupont និងClaude Verlon បានសម្តែងការពេញចិត្តដែលតុលាការបានកោះហៅថ្នាក់ដឹកនាំបារាំងមកបំភ្លឺ ប៉ុន្តែខកចិត្តនៅពេលបានឮដំណឹងថ្ងៃនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ