នាយករដ្ឋមន្ត្រីអង់គ្លេសបង្ហាញផែនការBrexit ថ្មី និងភាពសម្របសម្រួលជាមួយសភា
កិច្ចព្រមព្រៀងBrexit ដែលលោកស្រីនាយករដ្ឋមន្ត្រីអង់គ្លេសបានសម្រេចជាមួយអឺរ៉ុប ត្រូវបានសភាច្រានចោលក្នុងសំឡេងដ៏ច្រើនលើសលុបកាលពីសប្តាហ៍មុនហើយ តើលោកស្រីប្រមុខរដ្ឋាភិបាលមានផែនការអ្វីបម្រុងទុក សម្រាប់មកជំនួសទេ ? នៅថ្ងៃរសៀលចន្ទនេះជាវេលាកំណត់ចុងក្រោយ ដែលលោកស្រី តេរ៉េហ្សា ម៉េ ត្រូវដាក់បង្ហាញជូនសភានូវផែនការថ្មី ស្តីពីការចាកចេញពីអឺរ៉ុប។ លោកស្រីបានសន្យាវិលត្រលប់ទៅចរចាជាមួយសហភាពអឺរ៉ុបឡើងវិញ និងសួរយោបល់សភារាល់គ្រប់ចំណុចចរចាទាក់ទងនឹងទំនាក់ទំនងអនាគតរវាងអង់គ្លេសនិងអឺរ៉ុប។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៣
នៅ១០សប្តាហ៍មុនបែកចេញពីសហភាពអឺរ៉ុបជាផ្លូវការ លោកស្រីនាយករដ្ឋមន្ត្រីអង់គ្លេស ត្រូវរកឱ្យឃើញនូវផែនការថ្មីសម្រាប់នាំប្រទេសឱ្យដើរចេញពីអឺរ៉ុប ដោយសម្រួល ព្រោះការបែកបាក់ដោយគ្មានកិច្ចព្រមព្រៀងអាចនឹងធ្វើឱ្យអង់គ្លេសមានហានិភ័យជួបគ្រោះខ្វះខាត កកស្ទះនៅកំពង់ផែ និងរូបិយបណ្ណធ្លាក់ចុះ។
ប៉ុន្តែផែនការថ្មីរបស់លោកស្រី ទំនងជានឹងធ្វើឱ្យសហភាពអឺរ៉ុប និងអង់គ្លេសផ្ទាល់ ខកចិត្តដដែល ព្រោះសំណើថ្មីនេះមានលក្ខណៈដូចគ្នាបេះដាក់ទៅនឹងកិច្ចព្រមព្រៀងដំបូង ដែលសភាអង់គ្លេសបានច្រានចោល កាលពីសប្តាហ៍មុន។ លោកស្រីនាយករដ្ឋមន្ត្រីបានប្រកាសសន្យាបីខ ៖ ពិគ្រោះពិភាក្សាជាមួយសភាឱ្យបានច្រើនជាងមុនលើរាល់ចំណុចស្តីពីទំនាក់ទំនងរវាងអឺរ៉ុបនិងអង់គ្លេសនាពេលអនាគត - ធ្វើគ្រប់យ៉ាងដើម្បីបក្សកាន់អំណាចធានាអំពីសិទ្ធរបស់ពលករ - និងស្វែងរកឱ្យឃើញមធ្យោបាយបន្ធូរបន្ថយសម្ពាធជុំវិញបញ្ហាព្រំដែនអៀរឡង់ខាងជើង ដែលជាខេត្តរបស់អង់គ្លេសជាអៀរឡង់ប្រទេសជាសមាជិកសហភាពអឺរ៉ុប។
ក្នុងន័យនេះ លោកស្រីប្រមុខរដ្ឋាភិបាល នឹងធ្វើដំណើរទៅព្រុចសែលជាថ្មី ដើម្បីចរចាជាមួយអឺរ៉ុបឡើងវិញ ស្តីអំពីបញ្ហាសន្តិសុខ ដែលជាបញ្ហាមួយត្រូវដោះស្រាយដើម្បីបញ្ចៀសកុំឱ្យមានការពុះចែកខណ្ឌព្រំដែនរវាងអៀរឡង់ខាងជើងពីប្រទេសអៀរឡង់ ក្រោយអង់គ្លេសចាកចេញពីអឺរ៉ុប។
“ខ្ញុំនឹងបន្តពិភាក្សាជាមួយតំណាងអៀរឡង់ខាងជើង នៅសប្តាហ៍នេះ ដើម្បីដឹងថាតើមានលក្ខខណ្ឌអ្វីខ្លះត្រូវបំពេញ បើយើងចង់បញ្ចៀសមិនឱ្យមានរនាំងព្រំដែននៅតាមព្រំប្រទល់រវាងអៀរឡង់ទាំងពីរ” នៅពេលអង់គ្លេសចាកចេញពីអឺរ៉ុប។ គ្មានព្រំដែន ជាអ្វីដែលសភាអង់គ្លេសភាគច្រើនចង់បាននិងគាំទ្រ។ នេះបើតាមប្រសាសន៍របស់លោកស្រី ម៉េ ទៅកាន់អង្គសភា ដោយអះអាងទៀតថា បន្ទាប់មកលោកស្រីនឹងយកសេចក្តីសន្និដ្ឋាននៃកិច្ចពិភាក្សាទៅបង្ហាញអឺរ៉ុប”៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ