រដ្ឋាភិបាលបារាំងចាប់សិក្សាពីផលប៉ះពាល់របស់បាតុកម្មអាវកាក់លឿង ទៅលើសេដ្ឋកិច្ច
ក្រសួងសេដ្ឋកិច្ចបារាំង នឹងកោះប្រជុំ នៅថ្ងៃចន្ទនេះ ជាមួយភាគីអ្នកតំណាងក្រុមហ៊ុន សភាពាណិជ្ជកម្ម ដើម្បី ធ្វើតុល្យការមួយ ស្តីពីផលប៉ះពាល់នៃបាតុកម្មរបស់ចលនាអាវលឿង ទៅលើការលក់ដូរទំនិញ ហើយនិងសកម្មភាពសេដ្ឋកិច្ចរបស់បារាំង។ នេះជាបញ្ជាក់របស់រដ្ឋមន្រ្តីសេដ្ឋកិច្ចបារាំង លោកBruno Le Maire នៅមួយថ្ងៃក្រោយ ការផ្ទុះបាតុកម្មនៅទូទាំងប្រទេសបារាំង ដែលរៀបចំឡើងដោយក្រុមអាវកាក់លឿង។ ក្រុមអាវកាក់លឿង ដែលបានប៉ះទង្គិចដ៏ហិង្សា ជាមួយ ប៉ូលិស កាលពីថ្ងៃសៅរ៍ បានអំពាវនាវសាជាថ្មី នៅថ្ងៃអាទិត្យ ឲ្យមានបាតុកម្ម តវ៉ា នៅថ្ងៃសៅរ៍សប្តាហ៍ក្រោយ ដើម្បី ប្រឆាំងការដំឡើងតម្លៃប្រេង ពន្ធ ហើយទំនិញគ្រប់មុខ ក្នុងប្រទេសបារាំង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៦
ចាប់តាំងពីការកកើតមានមហាបាតុកម្ម ដើម្បីប្រឆាំងនឹងប្រេងឡើងថ្លៃ ការដំឡើងពន្ធ ចលនាអាវកាក់លឿង បានបិទខ្ទប់ ផ្លូវមិនឲ្យមានចរាចរណ៍ដឹកទំនិញ រារាំង មិនឲ្យបើកទ្វារ ហាងលក់ទំនិញ ឬអគារពាណិជ្ជកម្ម។ សម្រាប់រដ្ឋមន្រ្តីក្រសួងសេដ្ឋកិច្ចបារាំង ការជួបប្រជុំនៅថ្ងៃចន្ទ នឹងអនុញ្ញាតឲ្យគេដឹងពីទំហំខូចខាត ផ្នែកសេដ្ឋកិច្ច ដោយសារបាតុកម្មរបស់ចលនាអាវកាក់លឿង។ ជាមួយគ្នានេះ ក្រសួងនឹងសុំឲ្យក្រុមហ៊ុនធានារ៉ាប់រ៉ង ឬធនាគារវិនិយោគរដ្ឋ ជួយ ពាណិជ្ជករ ដែលអាចខាតបង់ មិនអាចលក់ទំនិញ ដោយសារតែបាតុកម្ម រំខានរបស់ក្រុមអាវកាក់លឿង ជាពិសេស នៅក្នុងរដូវបុណ្យចុងឆ្នាំនេះ។
នៅថ្ងៃអាទិត្យ នៅលើបណ្តាញសង្គមហ្វេសប៊ុក ចលនាអាវកាក់លឿង បានអំពាវនាវឲ្យមានបាតុកម្មប្រឆាំង សាជាថ្មី នៅថ្ងៃសៅរ៍ ទី ១ធ្នូ សប្តាហ៍ក្រោយ ដើម្បីដាក់សម្ពាធលើរដ្ឋាភិបាល ឲ្យដំឡើងប្រាក់ខែ ហើយនិងបញ្ឈប់ ដំឡើងពន្ធលើប្រេង។ “បើរដ្ឋាភិបាលមិនព្រមធ្វើតាម នោះ បាតុកម្មតវ៉ានឹងកើតមាន រហូតធ្វើឲ្យប្រធានាធិបតីម៉ាក្រុងចុះចេញពីតំណែង” នេះជាពាក្យព្រមានរបស់ចលនាអាវកាក់លឿង នៅលើគណនីហ្វេសប៊ុករបស់ខ្លួន។ នៅក្នុងបាតុកម្មរបស់ក្រុមអាវកាក់លឿងនៅទូទាំងប្រទេសដែលមានមនុស្សចូលរួម ១០៦ ៣០១នាក់ ប៉ូលិសបានចាប់ខ្លួនមនុស្ស ១០៣នាក់ នៅក្រោយការប៉ះទង្គិចដ៏ហិង្សា ដែលបានធ្វើមនុស្សរបួស ២៤នាក់។
នៅថ្ងៃសៅរ៍ ប្រធានាធិបតី បារាំង លោកអេម៉ានុយអែលម៉ាក្រុង បានសរសេរចាត់ទុក អំពើហិង្សាទៅលើប៉ូលិស នៅក្នុងពេលប៉ះទង្គិចជាមួយក្រុមអាវកាក់លឿងថា ជារឿងដ៏អាម៉ាស់។ តាមវិមានប្រធានាធិបតី លោកម៉ាក្រុង គ្រោងនឹងថ្លែងសុន្ទរកថា ពន្យល់ពីខ្សែបន្ទាត់នយោបាយរបស់លោក ទាក់ទងនឹងការប្រើប្រាស់ថាមពលមិនចេះរីងស្ងួត ដើម្បី ទប់ទល់ការប្រែប្រួលអាកាសធាតុ។ បញ្ហាដំឡើងថ្លៃពន្ធលើប្រេងឥន្ធនៈ ដែលជាហេតុធ្វើឲ្យប្រេងឡើងថ្លៃខ្លាំងនៅបារាំង ជាពិសេសប្រេងម៉ាសូត គឺជាផ្នែកមួយ នៃគោលនយោបាយរបស់ក្រុងប៉ារីស ដើម្បីប្រយុទ្ធប្រឆាំងនឹងការបញ្ចេញឧស្ម័នផ្ទះកញ្ចក់។ នៅថ្ងៃអង្គារ លោកម៉ាក្រុងនឹងប្រកាសឲ្យដំណើរការផងដែរ ក្រុមប្រឹក្សាជាតិដើម្បីអាកាសធាតុ។
អតីតរដ្ឋមន្រ្តីបរិស្ថានបារាំង លោកស្រី Ségolène Royale នៅថ្ងៃអាទិត្យបានអំពាវនាវឲ្យរដ្ឋាភិបាលបារាំង ស្តាប់កំហឹងតវ៉ារបស់ប្រជាជន និងត្រូវធ្វើកំណែទម្រង់ លុបចោលទៅវិញ គោលនយោបាយការដំឡើងតម្លៃពន្ធលើប្រេង។ សម្រាប់លោកស្រីRoyale គេមិនអាចទាមទារឲ្យប្រជាជនបារាំងគិតគូរ ពីបញ្ហាឡើងកំដៅផែនដី បានទេ នៅពេលដែលពួកគេកំពុងភ័យ រកលុយ ទិញអង្ករច្រកឆ្នាំងមិនបាន នៅពេលដាច់ខែម្តងៗផងនោះ។
សម្រាប់រដ្ឋមន្រ្តីសេដ្ឋកិច្ចបារាំង រដ្ឋាភិបាលនឹងមិនលះបង់ចោល នយោបាយដំឡើងពន្ធ ប្រេង ដែលត្រូវចាប់ផ្តើម នៅខែ មករា ឆ្នាំក្រោយនេះទេ។ ប៉ុន្តែ ផ្ទុយទៅវិញ រដ្ឋាភិបាលនឹងអាចពិនិត្យមើលគោលនយោបាយ អម លើកទឹកចិត្ត ជួយហិរញ្ញវត្ថុ ដល់អ្នកណាដែលលែងប្រើរថយន្តប្រើប្រេងម៉ាស៊ូត ដែលបញ្ចេញផ្សែងពុលបំផ្លាញខ្លាំងបរិស្ថាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ