ប្រឈមនឹងអាមេរិក បារាំងនិងអាល្លឺម៉ង់ប្រឹងសម្តែងសាមគ្គីភាពដាក់គ្នា
ក្រោយការប្រារព្ធខួប១០០ឆ្នាំនៃការបិទបញ្ចប់សង្គ្រាមលោកលើកទីមួយ ថ្ងៃទី ១១ វិច្ឆិកា នៅប្រទេសបារាំង ថ្ងៃនេះដល់វេនប្រធានាធិបតីបារាំង ដែលត្រូវអញ្ជើញទៅអាល្លឺម៉ង់ ដើម្បីចូលរួមក្នុងពិធីគោរពវិញ្ញាណក្ខន្ធដល់ជនរងគ្រោះសង្គ្រាមវិញម្តង។ វត្តមានរបស់លោកម៉ាក្រុង នៅប៊ែរឡាំង ជាឱកាសសម្តែងអំពីសាមគ្គីភាពជាធ្លុងមួយ រវាងបារាំងនិងអាល្លឺម៉ង់ ទល់នឹងសន្ទុះជាតិនិយមអាមេរិករបស់លោកត្រាំផង និងដើម្បីនិយាយអំពីអឺរ៉ុបផង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥១
លោកប្រធានាធិបតីបារាំង ម៉ាក្រុង ត្រូវផ្តើមទស្សនកិច្ចនៅប៊ែរឡាំង ជាមួយនឹងការអញ្ជើញទៅដាក់កម្រងផ្កាឧទ្ទិសដល់វិញ្ញណក្ខន្ធជនរងគ្រោះសង្គ្រាមទាំងអស់ ជាមួយប្រធានាធិបតីអាល្លឺម៉ង់លោក Frank-Walter Steinmeier ។ បន្ទាប់មក ជាលើកទីមួយគិតចាប់តាំងពីឆ្នាំ២០០០មក ដែលប្រធានាធិបតីបារាំង ត្រូវឡើងថ្លែងសុន្ទរកថាកាន់សភាអាល្លឺម៉ង់ នៅវេលាម៉ោង១២កន្លះ ម៉ោងសាកល។
នៅចំពោះមុខសភាអាល្លឺម៉ង់ លោកប្រធានាធិបតីបារាំងទំនងជានឹងឆ្លៀតលើកឡើងជាថ្មីអំពីគម្រោងចង់បង្កើតកងយោធាអឺរ៉ុបរួម ដែលលោកស្រីមែរកិល បានសម្តែងការគាំទ្ររួចហើយ បើទោះបីជាលោកដូណាល់ ត្រាំ ប្រធានាធិបតីអាមេរិកស្រែកប្រឆាំងយ៉ាងខ្លាំងក៏ដោយ។
ក្នុងបរិបទនៃការស្ទុះឡើងខ្លាំងនូវចរន្តប្រជាភិថុត និងដើម្បីបង្ហាញឆន្ទៈរួម ជាមួយប្រមុខដឹកនាំអាល្លឺម៉ង់ ប្រឈមនឹងនយោបាយជាតិនិយមរបស់មហាយក្សអាមេរិក សុន្ទរកថារបស់លោកម៉ាក្រុង ទំនងជានឹងផ្តោតខ្លាំងទៅលើអឺរ៉ុប។ អឺរ៉ុបដែលកំពុងឆ្លងកាត់ការលំបាក ត្រូវការការរុញច្រានខ្លាំងពីប៉ារីស និងប៊ែរឡាំង។
លោក ម៉ាក្រុង និងលោកស្រី មែរកិល ត្រូវពិភាក្សាការងាររកមធ្យោបាយស្ថាបនាអឺរ៉ុបឱ្យមានសន្ទុះឡើងវិញ។ ទាំងពីរប្រទេស បានព្រមព្រៀងគ្នា និងផ្តល់សំណើទៅអឺរ៉ុប នៅថ្ងៃស្អែក គម្រោងថវិកាតំបន់អឺរ៉ូ ដែលលោកម៉ាក្រុងគាំទ្រយ៉ាងខ្លាំង។
ក្នុងរយៈពេលមួយសប្តាហ៍កន្លងមកនេះ ប្រធានាធិបតីបារាំង និងប្រមុខរដ្ឋាភិបាលអាល្លឺម៉ង់បានបង្ហាញកាយវិការងាកស្និទ្ធរកគ្នាជាច្រើន។ ប៉ុន្តែការរួបរួមនេះ ហាក់មានតែសម្រកក្រៅ និងមិនអាចលាក់បាំងការគំនិតខ្វែងគ្នាបានទេ។ អាល្លឺម៉ង់ មិនទាន់ឯកភាពជាមួយបារាំង លើខ្លឹមសារស៊ីជម្រៅនៃសំណុំរឿងជាច្រើន ដូចជា គម្រោងធ្វើកំណែទម្រង់សហភាពអឺរ៉ុប ការបង្កើតវិស័យយោធាអឺរ៉ុប កំណែទម្រង់តំបន់អឺរ៉ូ ឬការយកពន្ធលើក្រុមហ៊ុនព័ត៌មានវិទ្យាអាមេរិក (Google Apple Facebook Amazon)៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ