ក្រុមអង្គការក្រៅរដ្ឋាភិបាលទាមទារឲ្យបារាំងបញ្ឈប់ការអភិវឌ្ឍន៍មនុស្សយន្តឃាតករ
នៅក្នុងប្រទេសបារាំង អង្គការក្រៅរដ្ឋាភិបាល Human Rights Watch បានផ្សព្វផ្សាយរបាយការណ៍មួយនាថ្ងៃពុធ ទី៧ វិច្ឆិកា។ នៅក្នុងរបាយការណ៍នោះ ក្រុមអង្គការក្រៅរដ្ឋាភិបាលបានអំពាវនាវដល់លោកប្រធានាធិបតីបារាំងម៉ាក្រុងឲ្យបញ្ឈប់ជាបន្ទាន់លើការអភិវឌ្ឍន៍គ្រឿងសព្វាវុធស្វយ័ត ដូចយ៉ាងការផលិតឃាតករជាមនុស្សយន្តជាដើម។ ទន្ទឹមគ្នានេះ របាយការណ៍បានទាមទារឲ្យបារាំងគាំទ្រលើសន្ធិសញ្ញាអន្តរជាតិស្តីពីការហាមផលិតមនុស្សយន្តឃាតករ។
ចុះផ្សាយនៅថ្ងៃ៖
ស្តាប់ - ០១:៥៥
របាយការណ៍របស់ក្រុមអង្គការក្រៅរដ្ឋាភិបាលបានធ្លាក់មក ជិត ២សប្តាហ៍មុនបើកកិច្ចប្រជុំនៃក្រុមប្រទេសសមាជិករបស់ស្ថាប័នអន្តរជាតិស្តីពីអាវុធទូទៅដែលគ្រោងរៀបចំធ្វើនៅអង្គការសហប្រជាជាតិពីថ្ងៃទី២១ ដល់ថ្ងៃទី២៣ វិច្ឆិកា។ នៅក្នុងរបាយការណ៍ Human Rights Watch បានកត់សម្គាល់ឃើញពីការដែលបារាំងបានធ្វើផ្ទុយនឹងអ្វីដែលខ្លួនបាននិយាយ។ នៅត្រង់ចំណុចនេះ Human Rights Watch បានស្រង់សម្តីលោកប្រធានាធិបតីបារាំងម៉ាក្រុងដែលធ្លាប់បានប្រឆាំងយ៉ាងដាច់អហង្ការលើការអភិវឌ្ឍន៍ឃាតករជាមនុស្សយន្ត។ តែការពិតជាក់ស្តែង ក្រសួងការពារជាតិកំពុងសហការណ៍ជាមួយក្រុមឧស្សាហកម្មផលិតអាវុធដើម្បីបង្កើតឲ្យមានការប្រណាំងប្រជែងសព្វាវុធស្វយ័ត។
តាម Human Rights Watch ដែលបានដកស្រង់ព័ត៌មានពីវិទ្យាស្ថានស្រាវជ្រាវសន្តិភាពអន្តរជាតិក្នុងទីក្រុងស្តុកខុល កងទ័ពបារាំងបានអភិវឌ្ឍរួចហើយនូវប្រព័ន្ធការពារសកម្មដែលអាចចាប់ផ្ទាំងស៊ីប និងសម្រេចចាត់វិធានការខ្លួនឯងដោយមិនចាំបាច់មានការបញ្ជាពីមនុស្សទេ។ បន្ទាប់មក និងបើតាម Human Rights Watch ដដែល បារាំងក៏កំពុងពិចារណាលើការផលិតដ្រូនស្វយ័តសម្រាប់បំពេញបេសកកម្មនៅបាតសមុទ្រដែរ។ អ្វីដែលជាក្តីបារម្ភរបស់ Human Rights Watch គឺប្រសិទ្ធភាព និងគុណភាពនៃស្វ័យភាពរបស់គ្រឿងសព្វាវុធ ទោះបីជាទាហានយន្ត ឃាតករយន្ត ឬដ្រូនចម្បាំងក្តី។
ក្រៅពីទាមទារឲ្យបារាំងហាមការអភិវឌ្ឍន៍ឃាតករជាមនុស្សយន្ត Human Rights Watch ក៏បានស្នើឲ្យបារាំងឲ្យគាំទ្រលើសន្ធិសញ្ញាអន្តរជាតិស្តីពីការហាមផលិតមនុស្សយន្តឃាតករដែរ។ ក្រៅពីប្រទេសបារាំង Human Rights Watch ក៏បានចង្អុលមុខប្រទេសរុស្ស៊ី និងអាមេរិកដែរ។ ទន្ទឹមគ្នានេះ និងដើម្បីដាស់ស្មារតីដល់ក្រុមប្រទេសមហាអំណាចយោធាក្នុងលោក អង្គការប្រមាណជា ៨៥អង្គការបានរួមកម្លាំងគ្នាធ្វើយុទ្ធនាការប្រឆាំងនឹងឃាតករជាមនុស្សយន្ត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ