៥ឆ្នាំក្រោយមក គេនៅមិនទាន់អាចវែកមុខឃាតករដែលសម្លាប់អ្នកកាសែត RFI ២នាក់ក្នុងប្រទេសម៉ាលី
ចុះផ្សាយនៅថ្ងៃ៖
ស្តាប់ - ០៦:១៩
ថ្ងៃទី២ វិច្ឆិកានេះជាខួបគម្រប់ ៥ឆ្នាំនៃឃាតកម្មសម្លាប់អ្នកកាសែតវិទ្យុបារាំងអន្តរជាតិចំនួន ២នាក់ គឺលោកស្រី Ghislaine Dupont និងលោក Claude Verlon។ ដោយឡែក ក្រោយឃាតកម្មសម្លាប់អ្នកកាសែតបារាំងទាំងពីររូប អង្គការសហប្រជាជាតិក៏បានកំណត់យកថ្ងៃទី២ វិច្ឆិកាជាទិវាអន្តរជាតិប្រយុទ្ធប្រឆាំងនឹងនិទណ្ឌភាពនៃឧក្រិដ្ឋកម្មលើអ្នកកាសែតដែរ។ គួររម្លឹកថា លោកស្រី Ghislaine Dupont និងលោក Claude Verlon ត្រូវបានគេចាប់ជាចំណាប់ខ្មាំង រួចសម្លាប់ចោលកាលពីថ្ងៃទី២ វិច្ឆិកា ឆ្នាំ ២០១៣ ក្នុងពេលដែលអ្នកទាំងពីរកំពុងបំពេញបេសកកម្មនៅតំបន់គីដាល់ស្ថិតប៉ែកខាងជើងប្រទេសម៉ាលី។ ៥ឆ្នាំក្រោយមក ពន្លឺនៃការស៊ើបអង្កេតជុំវិញឃាតកម្មសម្លាប់លោកស្រី Ghislaine Dupont និងលោក Claude Verlon នៅតែបន្តស្រពិចស្រពិល។
៥ឆ្នាំក្រោយឃាតកម្មសម្លាប់លោកស្រី Ghislaine Dupont និងលោក Claude Verlon នីតិវិធីនៃការស៊ើបអង្កេតត្រូវបានបើកធ្វើចំនួនពីរដាច់ពីគ្នា មួយនៅក្នុងប្រទេសម៉ាលីដែលជាកន្លែងកើតហេតុផ្ទាល់ និងមួយទៀតនៅក្នុងប្រទេសបារាំងដែលដឹកនាំដោយលោក Jean-Marc Herbaut ចៅក្រមប្រឆាំងនឹងភេរវនិយម។ ចៅក្រមបារាំងរូបនេះបានធ្វើដំណើរទៅកាន់ប្រទេសម៉ាលីនាដើមខែកុម្ភៈកន្លងទៅដោយបានជួបសន្ទនា និងធ្វើការងារទាំងយប់ ទាំងថ្ងៃជាមួយសមភាគីម៉ាលី។ វត្តមានលោក Herbaut នៅក្នុងទឹកដីម៉ាលីបានអនុញ្ញាតឲ្យលោកទទួលបានព័ត៌មានមួយចំនួននៅកន្លែងកើតហេតុដែលលោកចង់ដឹង និងបានទាមទារជាយូរមកហើយ។
តែព័ត៌មានដែលលោក Herbaut ទទួលបានហាក់មិនបានផ្តល់អ្វីបន្ថែមដូចដែលលោកកំពុងមានក្នុងដៃស្រាប់ហើយនោះទេ។ មួយវិញទៀត ការវិភាគទៅលើម៉ាស៊ីនកុំព្យូទ័រ ពិសេសខ្លឹមសារនៃបទយកការណ៍របស់លោកស្រី Ghislaine Dupont ដែលបានចាក់ផ្សាយតាមកញ្ចក់ទូរទស្សន៍បារាំង France 2 កាលពី១ឆ្នាំកន្លះមុនក៏មិនបានផ្តល់ព័ត៌មានអ្វីបន្ថែមដែរ។ ចំណែកការស៊ើបអង្កេតនៅខាងប្រទេសម៉ាលីឯណោះវិញក៏ហាក់គ្មានការចម្រើនទៅមុខដូចក្តីសង្ឃឹមទុកទេ នោះបើទោះបីជាមានការតែងតាំងចៅក្រមស៊ើបអង្កេតនាដំណាច់ឆ្នាំ ២០១៧ ក៏ដោយ។
៥ឆ្នាំក្រោយឃាតកម្មសម្លាប់អ្នកកាសែតវិទ្យុបារាំងអន្តរជាតិទាំងពីររូបមក យុត្តិធម៌សម្រាប់អ្នកទាំងពីរហាក់នៅឆ្ងាយ ហើយការស៊ើបអង្កេតហាក់នៅមិនទាន់អាចឈានទៅក្របួច ក ជនដៃដល់ទៅផ្ទន្ទាទោសនៅតុលាការបាននៅឡើយទេ។ ទោះជាយ៉ាងនេះក្តី បារាំង និងម៉ាលីបានប្តេជ្ញាចិត្តបន្តការស៊ើបអង្កេតជាបន្តទៀតដោយមិនហ៊ានសន្យាថា តើនឹងអាចរកឃើញការពិតនៅពេលណាទេ។
ភាពក្តុកក្តួល និងការឈឺចាប់កំពុងបន្តកើតមានចំពោះគ្រួសារជងរងគ្រោះ
ក្រុមគ្រួសាររបស់សពលោកស្រី Ghislaine Dupont និងលោក Claude Verlon ហាក់គ្មានជម្រើសអ្វីក្រៅពីរង់ចំាលទ្ធផលនៃការស៊ើបអង្កេតពីខាងភាគីបារាំងក៏ដូចពីខាងភាគីម៉ាលី។ តែក្នុងពេលរង់ចាំការពិត ពិធីរម្លឹកខួបនៃឃាតកម្មអ្នកកាសែតបារាំងទាំងពីរនាក់មិនត្រូវបានគេបំភ្លេចចោលទេ។ នៅយប់ថ្ងៃព្រហស្បតិ៍ ទី១ វិច្ឆិកា ភ្លើងដែលគេដាក់លំអលើ Tour Eiffel ក្នុងពេលរាត្រីត្រូវបានគេបិទរយៈពេល ៣នាទីដើម្បីចូលរួមគោរពវិញ្ញាក្ខន្ធលោកស្រី Ghislaine Dupont និងលោក Claude Verlon។ ចំណែកម្តាយរបស់សពលោកស្រី Ghislaine Dupont គឺលោកស្រី Marie Solange Poinsot បានបញ្ជាក់ថា ៥ឆ្នាំនៃការរង់ចាំលទ្ធផលស៊ើបអង្កេតមិនសូវសំខាន់ប៉ុន្មានទេសម្រាប់លោកស្រី អ្វីដែលសំខាន់ ដំណើរជីវិតរបស់លោកស្រីមួយភាគធំត្រូវបានជាប់គាំងតាំងពីថ្ងៃទី២ វិច្ឆិកា ឆ្នាំ ២០១៣ មកដល់សព្វថ្ងៃ។
លោកស្រី Marie Solange Poinsot បានបន្ថែមថា ៥ឆ្នាំក្រោយមក នៅតែគ្មាននរណាម្នាក់អាចប្រាប់លោកស្រីពីមូលហេតុនៃការស្លាប់កូនស្រី Ghislaine Dupont និងស្លាប់ដោយរបៀបណា។ ភាពក្តុកក្តួល និងឈឺចាប់ក៏កំពុងបន្តមានចំពោះអ្នកស្រី Apolline Verlon ដែលជាកូនស្រីរបស់សពលោក Claude Verlon។ ក្រៅពីក្រុមគ្រួសាររបស់លោកស្រី Ghislaine Dupont និងលោក Claude Verlon ពិធីចូលរួមរម្លឹកវិញ្ញាក្ខន្ធក៏បានធ្វើឡើងដោយក្រុមបុគ្គលិករបស់វិទ្យុបារាំងអន្តរជាតិទាំងអស់ដែរ។
ក្នុងរយៈពេល ១០ឆ្នាំ មានអ្នកកាសែតជាង ១ ០០០នាក់ត្រូវបានគេសម្លាប់
ក្រោយឃាតកម្មសម្លាប់អ្នកកាសែតវិទ្យុបារាំងអន្តរជាតិទាំងពីររូប គឺលោកស្រី Ghislaine Dupont និងលោក Claude Verlon អង្គការសហប្រជាជាតិបានកំណត់ថ្ងៃទី២ វិច្ឆិកាជាទិវាអន្តរជាតិប្រយុទ្ធប្រឆាំងនឹងនិទណ្ឌភាពនៃឧក្រិដ្ឋកម្មលើអ្នកកាសែត។ វាជារឿងគួរឲ្យស្តាយដែលអ្នកសារព័ត៌មានព្យាយាមយកព័ត៌មាន និងសរសេរការពិតតែងតែត្រូវបានគេតាមធ្វើទុក្ខបុកម្នេញ រួចពេលខ្លះត្រូវបានគេសម្លាប់ចោលទៅវិញ។ របាយការណ៍របស់អង្គការ Unesco ចេញផ្សាយក្នុងថ្ងៃព្រហស្បតិ៍ ទី១ វិច្ឆិកាឲ្យដឹងថា ក្នុងរយៈពេល ១០ឆ្នាំកន្លងទៅពោលចន្លោះពីឆ្នាំ ២០០៦ ដល់ឆ្នាំ ២០១៧ មានអ្នកកាសែតចំនួន ១០១០នាក់ត្រូវបានគេសម្លាប់។ គ្រាន់តែពីថ្ងៃទី១ មករាដល់ដំណាច់ខែតុលា ឆ្នាំ ២០១៨ កន្លងទៅថ្មីៗនេះ មានស្លាប់អ្នកកាសែតចំនួន ៨៦នាក់ដោយសារការបំពេញអាជីពរបស់ខ្លួន។
របាយការណ៍របស់ Unesco ដដែលបានបន្ថែមថា អ្នកកាសែតដែលត្រូវបានគេសម្លាប់ច្រើនជាងគេមិនមែនអ្នកកាសែតដែលបានចុះទៅយកការណ៍នៅលើសមរភូមិទេ តែគឺអ្នកកាសែតដែលអង្គុយក្នុងការិយាល័យដើម្បីស៊ើបព័ត៌មានរឿងនយោបាយ រឿងឧក្រិដ្ឋកម្ម និងរឿងអំពើពុករលួយ។ គឺពួកអ្នកកាសែតប្រភេទនេះឯងដែលបានទទួលរងគ្រោះខ្លាំងជាងគេដោយត្រូវបានគេសម្លាប់ក្នុងប្រទេសដែលខ្លួនកំពុងធ្វើការតែម្តង។ អ្វីដែលធ្ងន់ធ្ងរជាងនេះ ជនល្មើស ៩នាក់ក្នុងចំណោម ១០នាក់មិនត្រូវបានគេអូស ក ទៅកាត់ទោសទេ។ កំណត់សម្គាល់មួយទៀត មានស្រ្តីកាន់តែច្រើនដែលកំពុងប្រកបអាជីពជាអ្នកកាសែតបានក្លាយជាផ្ទាំងស៊ីបនៃការវាយប្រហារកាន់តែខ្លាំង ពិសេសការយាយីផ្លូវភេទ។
នាយិកាអង្គការ Unesco លោកស្រី Audrez Azoulay បានថ្លែងថា យុទ្ធនាការប្រយុទ្ធប្រឆាំងនឹងនិទណ្ឌភាពនៃឧក្រិដ្ឋកម្មលើអ្នកកាសែតជាការរួមចំណែកមួយនៃសេរីភាពក្នុងការបញ្ចេញមតិ សេរីភាពនៃសារព័ត៌មាន និងសេរីភាពនៃការចូលយកព័ត៌មាន។ នៅក្នុងន័យនេះ និងដើម្បីជួយលើកតម្កើងអាជីពអ្នកកាសែត អង្គការ Unesco បានផ្តើមយុទ្ធនាការនាឱកាសទិវាអន្តរជាតិប្រយុទ្ធប្រឆាំងនឹងនិទណ្ឌភាពនៃឧក្រិដ្ឋកម្មលើអ្នកកាសែតក្រោមចំណងជើងថា « ការពិតមិនស្លាប់ទេ »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ