កងទ័ពតួកគី វាយប្រហារក្រុមកួដស៊ីរីដែលគាំទ្រដោយលោកខាងលិច
កងទ័ពតួកគី កាលពីថ្ងៃអាទិត្យទី២៨ តុលា បានបើកការវាយប្រហារដោយបាញ់គ្រាប់កាំភ្លើងធំ ទៅលើទីតាំងរបស់កងជីវពលកួដក្នុងប្រទេសស៊ីរី ស្ថិតនៅលើភ្នំមួយនៅជិតច្រាំងខាងកើតនៃទន្លេអឺប្រាត។ ក្រុមកួដស៊ីរីនេះ គេដឹងថាគាំទ្រដោយសហរដ្ឋអាមេរិក ប៉ុន្តែសម្រាប់រដ្ឋាភិបាលក្រុងអង់ការ៉ាវិញ ចាត់ទុកពួកកួដស៊ីរីថា ជាក្រុមភេរវកម្ម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៥
ការវាយប្រយុទ្ឋនេះ កើតឡើងតែមួយថ្ងៃប៉ុណ្ណោះ គឺបន្ទាប់ពីប្រធានាធិបតីតួកគីលោកអ៊ែរដូហ្កាន បានទទួលរៀបចំកិច្ចប្រជុំកំពូលមួយ នៅឯទីក្រុង អ៊ីស្តង់ប៊ុល ស្តីពីជម្លោះនៅស៊ីរី។ កិច្ចប្រជុំកំពូលនេះ ក៏មានការចូលរួមពីថ្នាក់ដឹកនាំកពូលផ្សេងទៀត ដែលរួមមានមេដឹកនាំនៃប្រទេសរុស្ស៊ី បារាំង និងអាឡឺម៉ង់ ក្នុងគោលបំណងសហការគ្នា ដើម្បីជួយឲ្យស៊ីរី មានសន្តិភាព និងស្ថិរភាពនៅក្នុងប្រទេសឡើងវិញ ក្រោយពីផុងខ្លួនធ្លាក់ក្នុងសង្គ្រាមអស់រយៈពេល៧ឆ្នាំ ពោលគឺចាប់តាំងពីឆាំ្ន២០១១មក។
ក្រោយការវាយប្រហាររបស់តួកគី មកលើសម្ព័ន្ឋមិត្តរបស់ខ្លួន មកដល់ពេលនេះ គេនៅមិនទាន់ឃើញសហរដ្ឋអាមេរិក បញ្ចេញប្រតិកម្មយ៉ាងណានៅឡើយទេ។
គួររឮកថា ក្រុមកួដស៊ីរី គឺជាសម្ព័ន្ធមិត្តរបស់សហរដ្ឋអាមេរិក នៅក្នុងការប្រយុទ្ធប្រឆាំងនឹងក្រុមរដ្ឋអ៊ីស្លាម។ បច្ចុប្បន្នេះ ពួកកួដស៊ីរីកំពុងតែរស់នៅតាមតំបន់ដាច់ស្រយាលភាគខាងជើង និងភាគឦសានប្រទេសស៊ីរី ដែលមានព្រំប្រទល់ជាប់នឹងប្រទេសតួកគី។
ក្រៅតែទទួលរងការវាយប្រហារ ពីសណាក់កងទ័ពតួកគី នៅថ្ងៃអាទិត្យទី២៨ តុលា ម្សិលមិញនេះ កងកម្លាំងកួដស៊ីរី ក៏ទទួលរងការវាយប្រហារពីក្រុមភេវរជនរដ្ឋអ៊ីស្លាមផងដែរ។ ហើយបើតាម អ្នកអង្កេតការណ៍ ឲ្យដឹងថា មានកងកម្លាំងកួដស៊ីរីចំនួន ៧២នាក់ត្រូវបានសម្លាប់ ដោយពួកក្រុមរដ្ឋអ៊ីស្លាម ដោយសារការបំផ្ទុះគ្រាប់បែកអត្តឃាត។
មួយវិញទៀត ក្រុមអ្នកអង្កេតការណ៍ បានឲ្យដឹងទៀតថា មានក្រុមកួដចំនួន ៣០០នាក់និងពួកជីហាដ ប្រមាណ៥០០នាក់ ត្រូវបានស្លាប់ ដោយសារវាយប្រយុទ្ធគ្នារយៈពេលប្រាំពីរសប្តាហ៍នៅក្នុងរដ្ឋហាជីន ភាគខាងកើតនៃប្រទេសស៊ីរី ដែលមានព្រំដែនជាប់នឹងប្រទេសអ៊ីរ៉ាក់។
គួររឮកផងដែរថា ដោយសារភ្លក់ភ្លើងសង្គ្រាមរយៈពេល៧ឆ្នាំកន្លងមកនេះ ដែលផ្ទុះឡើងដោយក្រុមប្រឆាំងនឹងរដ្ឋាភិបាលស៊ីរី ដឹកនាំដោយលោកបាស្ហាអាល់ អាសាធ មានប្រជាជនស៊ីរីច្រើនជាង៣៦០ ០០០នាក់ហើយបានស្លាប់បាត់បង់ជីវិត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ