លោកជីម ម៉ាត់ទីស៖អាមេរិកនឹងបង្ហាញពីការប្តេជ្ញាចិត្តរួមចំណែកឥតរាថយជាមួយអង្គការអូតង់
លោករដ្ឋមន្រ្តីការពារជាតិអាមេរិកជីម ម៉ាត់ទីសបានបំពេញទស្សនកិច្ចក្នុងប្រទេសបារាំងនាថ្ងៃអង្គារ ទី២ តុលា។ នៅក្នុងសន្និសីទកាសែតរួមគ្នាជាមួយសមភាគីបារាំងលោកស្រី Florence Parly លោកម៉ាត់ទីសបានធានាថា អាមេរិកនឹងបង្ហាញពីការប្តេជ្ញាចិត្តដោយឥតរាថយនៅក្នុងការរួមចំណែករបស់ខ្លួនជាមួយអង្គការអូតង់។ ទន្ទឹមគ្នានេះ ប្រមុខការពារជាតិអាមេរិកក៏បានប្រាប់ឲ្យដឹងថា អាមេរិកក៏នឹងបន្តរក្សាជំនួយដល់កម្លាំងទ័ពបារាំងនៅក្នុងយុទ្ធនាការប្រឆាំងនឹងក្រុមភេរវជននៅក្នុងប្រទេសម៉ាលី។
ចុះផ្សាយនៅថ្ងៃ៖
ស្តាប់ - ០២:១២
វត្តមានលោករដ្ឋមន្រ្តីការពារជាតិអាមេរិកជីម ម៉ាត់ទីសនៅក្នុងទឹកដីបារាំងពេលនេះបានធ្វើឡើង មួយថ្ងៃមុនកិច្ចប្រជុំថ្នាក់រដ្ឋមន្រ្តីការពារជាតិនៃអង្គការអូតង់រៀបចំក្នុងទីក្រុងព្រុចសែល ប្រទេសបែលហ្ស៊ិក។ ក្រៅពីមានជំនួបជាមួយសមភាគីបារាំងលោកស្រី Florence Parly ក្នុងទីក្រុងប៉ារីស លោកជីម ម៉ាត់ទីសក៏បានទទួលជួបដោយលោកប្រធានាធិបតីបារាំងអេម៉ានុយអែល ម៉ាក្រុងដែរ។ លោកម៉ាត់ទីសបាននិយាយប្រាប់លោកម៉ាក្រុងថា អាមេរិកនឹងបន្តសហការណ៍យ៉ាងពេញទំហឹងជាមួយអង្គការអូតង់ និងទទួលស្គាល់ថាពេលខ្លះ ការអនុវត្តជាក់ស្តែងមិនដូចនឹងការនិយាយនោះទេ។
អ្វីដែលលោកម៉ាត់ទីសចង់និយាយធានាបារាំងនោះគឺថា អាមេរិកក្នុងនាមជាសមាជិកអូតង់ដូចបារាំងដែរនោះនឹងមិនដកខ្លួនចេញពីអង្គការមួយនេះទេ។ គួររម្លឹកជូនថា លោកប្រធានាធិបតីដូណាល់ ត្រាំធ្លាប់បានរិះគន់ វាយប្រហារមិនសំចៃមាត់ជាច្រើនដងលើក្រុមប្រទេសសមាជិកអង្គការអូតង់ ពិសេសអាល្លឺម៉ង់ពីបទបានបង់វិភាគទានតិចតួចឲ្យអូតង់ ហើយបានពឹងលើអាមេរិកឲ្យជួយការពារសន្តិសុខចំពោះខ្លួន។ សូមជម្រាបជូនថាក្នុងឆ្នាំ ២០១៤ សមាជិកអូតង់ទាំង ២៩ប្រទេសបានព្រមព្រៀងគ្នាក្នុងការដំឡើងថវិកាយោធាឲ្យដល់ ២% នៃផលិផលសរុបក្នុងស្រុករបស់ខ្លួននៅរង្វង់ឆ្នាំ ២០២៤។
តែគិតត្រឹមឆ្នាំ ២០១៨ មានសមាជិកចំនួន ១៥ប្រទេស ក្នុងនោះមានទាំងប្រទេសអាល្លឺម៉ង់ផងបានសម្រេចដំឡើងតិចជាង ១,៤% នៃនៃផលិផលសរុបក្នុងស្រុក ហើយមានប្រទេសសមាជិកខ្លះបានសារភាពជាចំហថា គ្មានលទ្ធភាពសម្រេចគោលដៅដែលបានកំណត់នោះទេដោយត្រូវបង្វែរការចំណាយនៅក្នុងវិស័យផ្សេង។ លោកស្រី Florence Parly បានគូសបញ្ជាក់ថា « អូតង់ជាមូលដ្ឋានគ្រឹះនៃការ ការពារសមូហភាពរបស់យើង » និងថា « សហភាពអឺរ៉ុបមិនមែនជាផ្នែកមួយនៃបញ្ហាទេ តែជាផ្នែកមួយនៃដំណោះស្រាយ »។
បន្ទាប់មក ប្រមុខការពារជាតិបារាំងក៏បានកោតសរសើរចំពោះកិច្ចសហប្រតិបត្តិការរវាងទ័ពបារាំង និងអាមេរិកនៅក្នុងយុទ្ធនាការប្រឆាំងពួកជីហាតអង្គការរដ្ឋអ៊ីស្លាមក្នុងទឹកដីស៊ីរី ព្រមទាំងអរគុណអាមេរិកដែលបានគាំទ្រដល់កម្លាំងទ័ពបារាំងនៅក្នុងយុទ្ធនាការប្រឆាំងនឹងក្រុមភេរវជននៅក្នុងប្រទេសម៉ាលី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ