យន្ដហោះរុស្ស៊ី បាញ់ធ្លាក់ដោយកងទ័ពស៊ីរីប៉ុន្តែ ម៉ូស្គូចោទ អ៊ីស្រាអែល
នាយទាហានរុស្ស៊ី ១៥ នាក់ ធ្លាក់ខ្លួនស្លាប់ ក្នុងគ្រោះថ្នាក់យន្ដហោះឈ្លបការណ៍រុស្ស៊ី ដែល បាញ់កំទេចដោយ ប្រព័ន្ធការពារដែនអាកាសស៊ីរី ។ ពេលនោះឯង ខេត្តស៊ីរី Lattaquié រងការវាយប្រហារ ពីខាង យន្ដហោះចម្បាំងអ៊ីស្រាអែល។ ម៉ូស្គូ ទម្លាក់រាល់ការទទួលខុសត្រូវ ចំពោះឧប្បត្តិហេតុនេះ ទៅលើ កងទ័ពអ៊ីស្រាអែល។ ក្រសួងការបរទេសរុស្ស៊ី បានកោះហៅទូតអ៊ីស្រាអែល។ រដ្ឋមន្ត្រីការពារជាតិរុស្ស៊ី ថ្លែងថា នឹង មានចម្លើយសមស្រប បកទៅអ៊ីស្រាអែលវិញ។ ប៉ុន្តែ លោកប្រធានាធិបតីពូទីនផ្ទាល់ បន្ទន់សំដី ថា សោកនាដកម្មបណ្តាលមកពី”កាលៈទេសៈគ្រោះថ្នាក់មួយចំនួនប្រទាក់គ្នា”។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៥
យន្ដហោះរុស្ស៊ីនោះ ដែលបាញ់ធ្លាក់ដោយមីស៊ីលកងទ័ពស៊ីរី តាមពិត គឺត្រូវចុះចតនៅមូលដ្ឋានរុស្ស៊ី ដែលស្ថិតក្នុងខេត្តស៊ីរី Lattaquié ខណៈដែលនៅពេលនោះឯង តាមព័ត៌មានកងទ័ពរុស្ស៊ី ក្រុមយន្ដហោះ អ៊ីស្រាអែល ធ្វើប្រតិបត្តិការនៅតំបន់ផ្ទាល់។ គឺ មីស៊ីលស៊ីរី ដែលបានបង្កឲ្យមានគ្រោះថ្នាក់ធ្លាក់យន្ដហោះ រុស្ស៊ី ប៉ុន្តែតាមទស្សនៈអាជ្ញាធររុស្ស៊ី ពិតជាអ៊ីស្រាអែល ដែលជាប់ទោស ក្នុងមរណភាពយោធារុស្ស៊ី ១៥ នាក់។ សម្រាប់ក្រសួងការពារជាតិរុស្ស៊ី គឺពួកពីឡុតអ៊ីស្រាអែល ដែលវាយប្រហារពេលយប់ទៅលើខេត្តស៊ីរី Lattaquié បានដាក់” ដោយចេតនា” ឲ្យយន្ដហោះឈ្លបការណ៍រុស្ស៊ី ស្ថិតក្នុងគ្រោះថ្នាក់ពេលវាហោះត្រឡប់ ទៅមូលដ្ឋានវិញ។
តបនឹងសំនួរទូរទស្សន៍ជាតិ អ្នកនាំពាក្យកងទ័ពរុស្ស៊ី លោក Igor Konashenkov ទំលាក់យ៉ាងជាក់ច្បាស់ រាល់ការទទួលខុសត្រូវ ចំពោះឧប្បត្តិហេតុនេះ ទៅលើកងទ័ពអ៊ីស្រាអែល។ តាមសំដីគាត់ ៖ កងកម្លាំង អ៊ីស្រាអែល បានដៅចំណាំយន្ដហោះរុស្ស៊ី ពេលវាហោះនៅកំពស់ ៥ គម។ ប៉ុន្តែ កងកម្លាំងនោះ នៅតែ បំពេញដោយចេតនា ទង្វើបង្កហេតុនេះ ។ អ៊ីស្រាអែល បានព្រមានទីបញ្ជាការកងទ័ពរុស្ស៊ី អំពី ការចាប់ផ្តើម ប្រតិបត្តិការ ពេលដែលនៅសល់តែ១ នាទីប៉ុណ្ណោះ ហេតុដែលមិនគ្រប់គ្រាន់ទេ សម្រាប់ភាគីរុស្ស៊ី បញ្ចៀស យន្ដហោះខ្លួន ទៅកាន់ ទីសុវត្ថិភាព។
ពេលសន្ទនាតាមទូរសព្ទជាមួយសមភាគីអ៊ីស្រាអែល លោករដ្ឋមន្ត្រីការពារជាតិរុស្ស៊ី Serguei Shoigou បានអះអាងថា ប្រទេសគាត់ រក្សាសិទ្ធិ” ឆ្លើយតបវិញ” ក្រោយពី យន្ដហោះរុស្ស៊ី ត្រូវបានបាញ់ធ្លាក់ដោយ មកពី ទង្វើបង្កហេតុ ពីខាងអ៊ីស្រាអែល។ គាត់ថា “កំហុស” ចំពោះការស្លាប់ទៅនៃយោធារុស្ស៊ី ១៥ នាក់ គឺ “ ធ្លាក់ទាំងស្រុងទៅលើអ៊ីស្រាអែល”។
ជាសញ្ញានៃកំហឹងម៉ូស្គូ ទល់នឹងក្រុង Tel Aviv ក្រសួងការបរទេសរុស្ស៊ី ថ្លែងឲ្យដឹងថា ខ្លួនបានកោះហៅ ទូត អ៊ីស្រាអែល ដែលប្រចាំនៅក្រុងម៉ូស្គូ។
អ្នកនាំពាក្យយក្រេមឡាំងលោក ឌ្មីទ្រី ពេស្កូវ ប្រកែកមិនធ្វើអត្ថាធិប្បាយអ្វីណាទេ អំពី អនាគតនៃទំនាក់ទំនង រុស្ស៊ី-អ៊ីស្រាអែល ។ គាត់គ្រាន់តែថ្លែងថា ៖ ស្ថានការណ៍កំពុងស្ថិតក្នុងដំណាក់ធ្វើវិភាគ”។
ក្នុងសន្និសីទកាសែត លោកប្រធានាធិបតី វ៉្លាឌីមៀរ ពូទីន ប្រកែកមិនព្រមធ្វើការប្រៀបធៀប ការបាញ់ធ្លាក់ យន្ដហោះរុស្ស៊ីលើកនេះ ទៅនឹង ការបាញ់ធ្លាក់យន្ដហោះរុស្ស៊ី ដោយយន្ដហោះប្រដេញតួកគី កាលពីខែ វិច្ឆិកា ឆ្នាំ២០១៥ ដែលបន្ទាប់មកហែរហមដោយវិបត្តិការទូតយ៉ាងធ្ងន់ធ្ងររវាងប្រទេសទាំងពីរ។ គាត់គ្រាន់តែ ថ្លែងថា ៖ តាមមើលទៅ សោកនាដកម្មនេះ បណ្តាលមកពី”កាលៈទេសៈគ្រោះថ្នាក់មួយចំនួនប្រទាក់គ្នា”៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ