ហេតុអ្វី បានជាកើតមានសោកនាដកម្មបាក់ស្ពាននៅអ៊ីតាលី?
ចុះផ្សាយនៅថ្ងៃ៖
ស្តាប់ - ០៥:២៨
ស្ពានថ្មបាក់នៅ អ៊ីតាលី កាលពីថ្ងៃអង្គារ បានសម្លាប់មនុស្សយ៉ាងតិច ៣៨នាក់ ដែលនៅក្នុងនោះ មាន៣នាក់ជាកុមារ និង៣នាក់ផ្សេងទៀត ជាជនជាតិបារាំង។ នៅក្រោយគ្រោះថ្នាក់ រំលំបាក់ស្ពានថ្ម គេនៅមិនទាន់មូលហេតុឃើញនៅឡើយទេ ប៉ុន្តែ សំណួរជាច្រើនបានចោទសួរទាក់ទងនឹងបញ្ហាបច្ចេកទេស ចំណែកអ្នកនយោបាយអ៊ីតាលីវិញ ស្វែងរកមុខអ្នកដែលគេត្រូវបន្ទោស ទម្លាក់កំហុស។
តើគេត្រូវបន្ទោសអ្នកណា? តើអ្នកណាជាអ្នកទទួលខុសត្រូវ លើ ស្ពានថ្ម បាក់ ដែលបានសង្កត់ សម្លាប់មនុស្ស ៣៨នាក់ នៅអ៊ីតាលី? ហេតុការណ៍បាក់ស្ពាន កាលពីថ្ងៃអង្គារ នៅភាគខាងជើងអ៊ីតាលី ក្បែរព្រំដែនបារាំង គឺជាសោកនាដកម្មដែលគេមិននឹកស្មាន ដល់ថា អាចកើតមាន នៅក្នុងប្រទេសអឺរ៉ុប ដ៏រីកចម្រើនមួយ ដូចជាអ៊ីតាលីនោះទេ។
សាងសង់ឡើងនៅឆ្នាំ ១៩៦៣ និងសម្ពោធដាក់ឲ្យប្រើប្រាស់ នៅឆ្នាំ ១៩៦៧ ស្ពានMorandi ដែលយកតាមឈ្មោះរបស់វិស្វករអ៊ីតាលី លោកRiccardo Morandi ធ្លាប់ត្រូវបានគេចាត់ទុកជាសមិទ្ធិផល ដ៏ជោគជ័យនៃបច្ចេកវិទ្យា ឈានមុខ របស់អ៊ីតាលី នៅសម័យនោះ ក្នុងទសវត្សរ៍ឆ្នាំ ៦០។ វិស្វករ អ៊ីតាលី លោក Riccardo Morandi ផ្ទាល់ល្បីឈ្មោះ ត្រូវគេទទួលស្គាល់ សម្រាប់ស្នាដៃសំណង់ដែលធ្វើថ្ម បេតុង។ ក្រៅពីស្ពានថ្ម Morandi លោកRiccardo Morandi ជាអ្នកគូរ សាងសង់ ស្ពានថ្មបេតុង ដ៏វែង ប្រវែង៨គីឡូម៉ែត្រ មួយទៀត នៅប្រទេសវ៉េណេស៊ុយអេឡា( Général Rafael Urdaneta)។
ស្ពានMorandi មានលក្ខណៈពិសេសរបស់វា គឺ ធ្វើពីថ្មបេតុងសុទ្ធ សូម្បីតែខ្សែយោងរបស់ស្ពានក៏ធ្វើពីថ្ម បេតុងដែរ គឺមិនមែនធ្វើពីខ្សែពួរដែកដូចស្ពាន ដទៃនោះទេ។ មានរហស្សនាមថា ស្ពានBrooklyn ដោយសារវាមានរូបរាងដូច ស្ពានដែក Brooklyn នៅទីក្រុងញូវយ៉ក សំណង់ស្ពានថ្ម Morandiត្រូវបានគេសាងសង់ឡើងសម្រាប់ការប្រើប្រាស់រយៈពេល ១០០ឆ្នាំ។
ប៉ុន្តែ នៅក្រោយសម្ពោធ ដាក់ឲ្យប្រើប្រាស់បានតែប៉ុន្មានឆ្នាំ ស្ពានថ្ម Morandi ស្រាប់តែបញ្ចេញឲ្យឃើញ បញ្ហាខុសបច្ចេកទេសជាច្រើនរបស់ស្ពាន។ អតីតប្រធានក្រុមវិស្វករអ៊ីតាលី នៅទីក្រុងGênes បាននិយាយប្រាប់អ្នកកាសែតក្នុងស្រុកថា កាលពី៥០ឆ្នាំមុន គេធ្លាប់មានជំនឿទុកចិត្ត ១០០ភាគរយលើសំណង់ថ្មបេតុង។ គេធ្លាប់គិតថា សំណង់ថ្មបេតុង អាចថិតថេរ មានអាយុកាលមិនកំណត់។ ប៉ុន្តែ ប៉ុន្មានឆ្នាំក្រោយ គេស្រាប់តែយល់ភ្លាមថា តាមពិតសំណង់ថ្មបេតុង អាចរឹងមាំ មានអាយុតែប៉ុន្មានទសវត្សរ៍តែប៉ុណ្ណោះ។ នៅក្នុងករណីរបស់ស្ពានថ្ម Morandiផ្ទាល់ ការដ្ឋានជួសជុល ត្រូវបានបើកធ្វើ ជាហូរហែរ និងជាប្រចាំ ដោយសារតែភាពប្រេះស្រាំ ស្ទើគ្រប់កន្លែងរបស់ស្ពាន។ តាមអ្នកជំនាញ នៅពេលថ្មបេតុងដែលធ្វើពីស៊ីម៉ង់ចាប់ប្រេះស្រាំ ខ្យល់បានចូលប្រតិកម្ម ធ្វើឲ្យសរសៃដែកក្នុងនោះចាប់ច្រែះ។
តាមអ្នកជំនាញវិស្វកម្មដដែល នៅពេលនោះ គេមិនបានគិតគូរ ដល់ភាពរញ្ជួយខ្លាំង ដែលបង្កឡើងដោយចរាចរណ៍ឆ្លងកាត់របស់រថយន្ត នោះទេ។ ក្នុងមួយឆ្នាំៗ មានរថយន្តប្រមាណ ២៥លានគ្រឿងបើកឆ្លងកាត់ស្ពាន Morandi ដែលជាផ្លូវធ្វើដំណើរសំខាន់ ពីភាគខាងត្បូងបារាំង ទៅប្រទេសអ៊ីតាលី។
នៅពេលរដ្ឋាភិបាលអ៊ីតាលីកំពុងបើកការស៊ើបអង្កេត រកដើមហេតុ ធ្វើឲ្យស្ពានថ្មបាក់សង្កត់សម្លាប់មនុស្សកាលពីថ្ងៃអង្គារ វិស្វករជំនាញមួយចំនួនវាយតម្លៃថា ស្ពានថ្ម Morandi ដែលទើបទទួលបានការជួសជុល នៅឆ្នាំ ២០១៦ អាចបាក់ស្រុត ចុះ ដោយសារតែខ្សែយោងស្ពាន ដែលធ្វើពីថ្ម រាប់ពាន់តោន ប្រេះ បាក់ លែងអាច យឹតយោងស្ពានតទៅទៀត។
នៅក្រោយស្ពានថ្មបាក់ ដល់ពេលត្រូវរកមុខអ្នកទទួលខុសត្រូវ
នៅពេលអ្នកជំនាញវិស្វកម្មលើកឡើងពីកំហុសឆ្គងផ្នែកបច្ចេកទេសរបស់ស្ពាន តាំងពីដំបូងទី អាជ្ញាធរអ៊ីតាលី ស្វែងរកមុខអ្នកទទួលខុសត្រូវលើគ្រោះថ្នាក់បាក់ស្ពានដែលបានសម្លាប់មនុស្សយ៉ាងហោច៣៨នាក់។ រដ្ឋាភិបាលអ៊ីតាលី បានផ្តើមនិតិវិធី ដើម្បីដកហូតសិទ្ធិសម្បទានគ្រប់គ្រងស្ពាន ពីក្រុមហ៊ុនឯកជនAutostrade Per Italia នៅក្រោយពេលមានការចុះផ្សាយព័ត៌មានជាច្រើនដែលបង្ហាញថា កន្លងមក គេធ្លាប់បានជូនដំណឹងជាច្រើនដងទៅក្រុមហ៊ុន Autostrade Per Italia ពីភាពប្រេះស្រាំ និងពុកផុយដោយកន្លែងរបស់ស្ពាន នៅមុនថ្ងៃធ្លាក់បាក់រលំគ្រេង នៅថ្ងៃអង្គារ។
មន្រ្តីរដ្ឋាភិបាលអ៊ីតាលីខ្លះវិញបានទម្លាក់កំហុសទៅលើរថយន្តដឹកទំនិញ ធុនធ្ងន់របស់ប៉ូឡូញ ដែលឧស្សាហ៍បើកឆ្លងកាត់ស្ពាន Morandi។ រដ្ឋមន្រ្តីក្រសួងមហាផ្ទៃអ៊ីតាលីវិញ ដែលមិនសូវចូលចិត្តអឺរ៉ុបប៉ុន្មានផង បានលេស យករឿងស្ពានបាក់លើកនេះទៅបន្ទោស ទម្លាក់កំហុសលើសហភាពអឺរ៉ុប។ បើតាមលោករដ្ឋមន្រ្តីមកពីគណបក្សស្តាំនិយមជ្រុលអ៊ីតាលី បើសិនសហភាពអឺរ៉ុបមិនដាក់គំនាប បញ្ជាឲ្យរដ្ឋាភិបាលអ៊ីតាលី រឹតបន្តឹង ការចាយវាយថវិកាសាធារណៈទេ រដ្ឋាភិបាលអ៊ីតាលី ប្រាកដជាអាចចំណាយថវិកាសម្រាប់កែលម្អ ហេដ្ឋារចនាសម្ព័ន្ធផ្លូវថ្នល់ និងស្ពានដែលមួយចំនួន សុទ្ធតែមានវ័យចំណាស់ និងត្រូវគេបោះបង់ចោល មិនជួសជុល ដោយសារតែរដ្ឋគ្មានថវិកា។
សម្រាប់អ្នកកាសែតអ៊ីតាលី វិញ អ្នកដែលទទួលខុសត្រូវខ្លាំងជាងគេ គឺអ្នកនយោបាយអ៊ីតាលីទៅវិញទេ ព្រោះថា នៅពេលគេរកឃើញថា ស្ពាន Morandi សង់ខុសបច្ចេកទេស អ្នកនយោបាយ អ៊ីតាលី បែរជាឈ្លោះ ប៉ែងជើងគ្នា មិនព្រមបោះឆ្នោត គាំទ្រ គម្រោង សាងសង់ផ្លូវ ឬស្ពានថ្មី ជំនួស ស្ពានMorandi។ ជាក់ស្តែង នៅឆ្នាំ ១៩៩០ គេបានរកឃើញគម្រោង សង់ផ្លូវថ្មី ឈ្មោះ La Gronda ដើម្បីជំនួស ស្ពាន Morandi ប៉ុន្តែ ដោយសារការប្រឆាំងគ្នា រវាងអ្នកនយោបាយ ដែលគិតតែប្រយោជន៍របស់បក្ស និងសំឡេងឆ្នោត ការពិភាក្សា ធ្វើឡើងអស់រាប់សិបឆ្នាំ ទម្រាំដល់មានការបោះឆ្នោត អនុម័ត នៅបំផុត។ ការដ្ឋានសង់ផ្លូវ ថ្មីនឹងចាប់ផ្តើម នៅចុងឆ្នាំនេះ ដើម្បី ដាក់ឲ្យប្រើប្រាស់ ស្នងតំណែងបន្តពីស្ពាន Morandi ប៉ុន្តែ នៅពេលដែលផ្លូវថ្មីមិនទាន់កើតចេញរូបរាងផងនោះ ស្ពាន Morandiបានបាក់រលំគ្រេង ក្ស័យជីវិត មុនបាត់ទៅហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ