អង់គ្លេស៖ប៉ូលិសលើកឡើងពីទង្វើភេរវនិយមក្នុងព្រឹត្តិការណ៍រថយន្តបើកសំដៅរដ្ឋសភាក្នុងទីក្រុងឡុងដ៍
នៅក្នុងទីក្រុងឡុងដ៏ ប្រទេសអង់គ្លេស មានរថយន្តមួយគ្រឿងបានបើកសំដៅបុករនាំងសន្តិសុខដែលដាក់នៅពីមុខអាគាររដ្ឋសភានាព្រលឹមស្រាងៗព្រឹកថ្ងៃអង្គារ ទី១៤ សីហា។ ឧប្បត្តិហេតុនេះបានបណ្តាលឲ្យរបួសមនុស្សដើរតាមផ្លូវជាច្រើននាក់ តែគ្មានអ្នករងរបួសធ្ងន់ដល់ស្លាប់។ ចំណែកអ្នកបើករថយន្តត្រូវបានប៉ូលិសដែលមានវត្តមាននៅកន្លែងកើតហេតុចាប់ខ្លួនភ្លាមៗ។ ប៉ូលិសបានលើកឡើងពីទង្វើភេរវកម្ម ហើយការស៊ើបអង្កេតត្រូវបានប្រគល់ទៅឲ្យប៉ូលិសប្រឆាំងភេរវនិយម។
ចុះផ្សាយនៅថ្ងៃ៖
ស្តាប់ - ០១:២៣
ឧប្បត្តិហេតុរថយន្តមួយគ្រឿងបរសំដៅបុករនាំងការពារស្ថិតនៅពីមុខរដ្ឋសភាក្នុងទីក្រុងឡុងដ៏បានកើតមានឡើងនៅវេលាម៉ោង ៧ និង ៣៧នាទីព្រឹកម៉ោងក្នុងប្រទេសអង់គ្លេស។ យោងតាមប៉ូលិស មានអ្នកដើរតាមផ្លូវជាច្រើននាក់បានរងរបួស តែអ្នករងរបួសធ្ងន់ដល់ស្លាប់ទេ។ សាក្សីជាច្រើនដែលបានឃើញហេតុការណ៍ផ្ទាល់ភ្នែកបានរៀបរាប់ថា រថយន្តនោះបានបរក្នុងល្បឿនលឿន ហើយអ្នកបើកបរហាក់មានឆន្ទៈធ្វើដូចនេះ។ អ្នកបើកបររថយន្តរូបនោះក៏ត្រូវបានប៉ូលិសដែលមានវត្តមាននៅកន្លែងកើតហេតុក្របួច ក ភ្លាមៗ។
តាមប៉ូលិសអង់គ្លេស អ្នកបើកបររថយន្តរូបនោះមានវ័យប្រមាណជា ២០ឆ្នាំ ហើយគ្មានមនុស្សណាផ្សេងក្រៅពីរូបគេនោះទេ។ យ៉ាងណាក៏ដោយ គេនៅមិនទាន់ស្គាល់អត្តសញ្ញាណពិតរបស់អ្នកបើកបរ និងហេតុផលនៃទង្វើរបស់រូបជនដៃដល់។ ការស៊ើបអង្កេតមួយត្រូវបានប្រគល់ទៅឲ្យប៉ូលិសប្រឆាំងភេរវនិយម និងបានចាត់ទុកទង្វើមួយនេះជាទង្វើភេរវនិយម។ ខណៈនេះ ទីតាំង និងច្រកផ្លូវស្ថិតក្បែរទីកន្លែងកើតហេតុនៅជុំវិញរដ្ឋសភាត្រូវបានបិទដោយមានការដាក់ពង្រាយវត្តមានកម្លាំងប៉ូលិសជាច្រើននាក់។
ចំណែកលោកស្រីនាយករដ្ឋមន្រ្តីអង់គ្លេស Theresa May បានសរសេរនៅក្នុងបណ្តាញសង្គម Twitter ដោយផ្ញើសារគិតដល់អ្នករងរបួស និងអរគុណដល់សេវាសង្រ្គោះបន្ទាន់ដែលបានចុះជួយសង្រ្គោះយ៉ាងឆាប់រហ័ស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ