រឿងអាស្រូវបេណាឡា ៖ ប្រធានាធិបតីបារាំងក្លាយជាផ្ទាំងស្ទីបនៃការរិះគន់
ចុះផ្សាយនៅថ្ងៃ៖
ស្តាប់ - ០៦:៤៧
សំណុំរឿងអតីតអង្គរក្សប្រធានាធិបតីបារាំង មានចរិតមិនល្អ កំពុងបន្តពុះកញ្ជ្រោលយ៉ាងខ្លាំង ! អាឡិចសង់ បេណាឡា អង្គរក្សដើមហេតុ ព្រមទាំងមនុស្ស៤នាក់ផ្សេងទៀត ត្រូវបានតុលាការធ្វើការចោទប្រកាន់ជាផ្លូវការនៅល្ងាចមិញ។ រដ្ឋមន្ត្រីក្រសួងមហាផ្ទៃបារាំង លោក ហ្សេរ៉ា កូឡុំ Gérard Collomb ព្រមទាំងមេប៉ូលិសក្រុងប៉ារីស ត្រូវចូលឆ្លើយបំភ្លឺនៅចំពោះមុខគណៈកម្មការសភា នៅថ្ងៃចន្ទនេះ។ ប៉ុន្តែផ្ទាំងស៊ីបនៃការរិះគន់ កំពុងតម្រង់ទិសស្រួចខ្លាំងជាងគេ ទៅរកលោកប្រធានាធិបតីបារាំង បើទោះបីជាលោកម៉ាក្រុង បានធានាអះអាង ដោយប្រយោលថាគ្មានទេ និទណ្ឌភាព ក៏ដោយ។
បេណាឡា ជាប់ចោទជាផ្លូវការ
ដំណើរការអង្កេតជុំវិញរឿងអាស្រូវរបស់លោក បេណាឡា បានស្គាល់ការជឿនលឿនទៅមុខច្រើន ដោយនៅល្ងាចថ្ងៃអាទិត្យម្សិលមិញ តុលាការបានប្រកាសធ្វើចោទប្រកាន់មនុស្ស៥នាក់ ៖ ដំបូងគេគឺ រូបអតីតអង្គរក្សប្រធានាធិបតី បេណាឡា ជនទីពីរ គឺលោក វាំងសង់ ក្រាស បុគ្គលិករបស់គណបក្សLa République en Marche (បក្សកាន់អំណាច) ដែលបង្ហាញវត្តមានក្បែរលោកបេណាឡា ពេលកំពុងប្រព្រឹត្តអំពើហិង្សាវាយបាតុករ។ បេណាឡា និងក្រាស ត្រូវជាប់ចោទពីបទប្រព្រឹត្តអំពើហិង្សា ជ្រៀតជ្រែកការងាររដ្ឋ បិទបាំងបង្វិលរូបភាពខ្សែវីដេអូប្រព័ន្ធកាមេរ៉ាសុវត្ថិភាព កាន់អាវុធ។ លោក បេណាឡា អាចនឹងត្រូវទទួលទោសជាប់ពន្ធនាគារដល់ទៅបីឆ្នាំ និងពិន័យជាប្រាក់ ៤ម៉ឺន៥ពាន់អឺរ៉ូ។
ចំណែកជនបីនាក់ផ្សេងទៀត គឺជាមន្ត្រីជាន់ខ្ពស់ នៃនាយកដ្ឋានសណ្តាប់ធ្នាប់សាធារណៈនិងចរាចរណ៍ របស់ប៉ូលិសក្រុងប៉ារីស ដែលជាប់សង្ស័យបានលួចបញ្ជូនទិន្នន័យវីដេអូ ថតដោយកាមេរ៉ាសុវត្ថិភាព មានជាប់រូបលោក បេណាឡា ទៅឱ្យលោកបេណាឡា។ ទង្វើបែបនេះជាការបំពានលើកិច្ចការសម្ងាត់រដ្ឋ។ ជនទាំងបីនាក់នេះ ត្រូវជាប់ចោទពីបទ លួចបន្លំរូបថត និងរំលោភការសម្ងាត់វិជ្ជាជីវៈ។
រដ្ឋមន្ត្រីក្រសួងមហាផ្ទៃទម្លាក់ទំនួលខុសត្រូវលើភ្នាក់ងារសន្តិសុខប្រធានាធិបតី
នៅថ្ងៃចន្ទនេះ គណៈកម្មការច្បាប់របស់សភា បានប្រែខ្លួនជាគណៈកម្មការអង្កេត សាកសួរចម្លើយរដ្ឋមន្ត្រីក្រសួងមហាផ្ទៃ និងមេប៉ូលិសក្រុងប៉ារីស។
ការសាកសួរ បានប្រព្រឹត្តទៅជាសាធារណៈ នៅវេលាម៉ោង១០ព្រឹក ម៉ោងនៅក្នុងប្រទេសបារាំង។ តំណាងសភាមកពីគ្រប់និន្នការនយោបាយ ដែលជាសមាជិកគណៈកម្មការច្បាប់របស់សភា បានចោទសួររដ្ឋមន្ត្រីក្រសួងមហាផ្ទៃម្នាក់ម្តងៗ។ គណៈកម្មការចង់ដឹងថាតើក្នុងនាមជាមនុស្សសំខាន់ទីពីររបស់រដ្ឋាភិបាល ដឹងអំពីគ្រប់ហេតុការណ៍សន្តិសុខ ចុះហេតុអ្វីបានជាមិនបញ្ចេញប្រតិកម្មឱ្យបានសមស្រប ប្តឹងប៉ូលិស ឬតុលាការ នៅពេលអង្គរក្សប្រធានាធិបតីប្រែកាយជាប៉ូលិសប្រើអំពើហិង្សាលើបាតុករ?!
លោករដ្ឋមន្ត្រី បានទទួលស្គាល់ទង្វើមិនត្រឹមត្រូវ របស់បេណាឡា ប៉ុន្តែ គឺមេប៉ូលិសក្រុងប៉ារីស និងប្រធានខុទ្ទកាល័យប្រធានាធិបតីទេ ដែលជាអ្នកចាត់វិធានការ ក្រោយការធ្លាយវីដេអូ បង្ហាញអំពីអំពើហិង្សារបស់លោកបេណាឡា លើបាតុករ។
មេប៉ូលិសក្រុងប៉ារីស ត្រូវចូលឆ្លើយបំភ្លឺសភា នៅវេលាម៉ោង ២រសៀលនេះ។ បន្ទាប់មកអ្នកទាំងពីរនឹងត្រូវ ព្រឹទ្ធសភា សាកសួរ ទៀត នៅថ្ងៃស្អែក។
ប្រធានខុទ្ទកាល័យប្រធានាធិបតី និងឥស្សរជនជាច្រើននាក់ផ្សេងទៀត ក៏មានជាប់ឈ្មោះក្នុងបញ្ជីដែលគណៈកម្មការសភានឹងកោះហៅមកសាកសួរជាបន្តបន្ទាប់។
ប្រធានាធិបតីបារាំង ជាផ្ទាំងស្ទីបនេះការរិះគន់
តាំងពីផ្ទុះរឿងអាស្រូវបេណាឡាមក លោកប្រធានាធិបតីបារាំងសំងំស្ងាត់មាត់ឈឹង និង មិនបានចេញមុខធ្វើសេចក្តីថ្លែងការណ៍អ្វីជាសាធារណៈ ទេ ! ប៉ុន្តែនៅល្ងាចមិញ លោកបានបញ្ចេញទស្សនៈរបស់លោក នៅក្នុងជំនួបប្រជុំដោះស្រាយវិបត្តិដោយបិទទ្វារ ជាមួយនាយករដ្ឋមន្ត្រី អ្នកនាំពាក្យប្រធានាធិបតី រដ្ឋមន្ត្រីក្រសួងមហាផ្ទៃ រដ្ឋមន្ត្រីទទួលទំនាក់ទំនងជាមួយសភា នៅវិមានអេលីហ្សេ។ ប្រសាសន៍របស់លោកប្រធានាធិបតី ត្រូវព្រលយឱ្យដឹងជាសាធារណៈ តាមរយៈការពាំពាក្យរបស់សមាជិកនៃក្រុមការងារនោះ។ មានន័យថាជាការទម្លាយឱ្យដឹងដោយចេតនាដើម្បី និងក្នុងបំណងតែមួយ គឺធ្វើឱ្យរឿងអាស្រូវបេណាឡាបានស្ងប់ស្ងាត់ទៅវិញ។
តើលោកម៉ាក្រុងមានប្រសាសន៍យ៉ាងណា ? លោកបានចាត់ទុកឥរិយាបថរបស់ លោក បេណាឡា ដោយប្រើពាក្យថា “មិនអាចទទួលយកបាន” “គួរឱ្យរន្ធត់”។ លោកម៉ាក្រុង បានបន្តទៀតថា គ្មានទេពាក្យថា និទណ្ឌភាព ! គ្មាននរណាម្នាក់នៅពីលើច្បាប់ឡើយ។ លោកប្រធានាធិបតីបានស្នើឱ្យអគ្គលេខាវិមានប្រធានាធិបតី រៀបចំសើរើខុទ្ទកាល័យទទួលបន្ទុកកិច្ចការសន្តិសុខប្រធានាធិបតីឡើងវិញ ដើម្បីកុំឱ្យមានករណីអាស្រូវអាចកើតឡើងបានទៀត។
ក្រោមសន្ទុះនៃការរិះគន់អស់មួយសប្តាហ៍ លោក អេម៉ាណុយអែល ម៉ាក្រុង ចង់បង្ហើរសារ ប្រាប់ថា មានការបើកអង្កេតបីជុំវិញរឿងអាស្រូវនេះ ជាការអង្កេតរបស់តុលាការ របស់សភា និងការអង្កេតរដ្ឋបាល។ លោកត្រៀមនឹងចាត់វិធានការ តាមច្បាប់ និងទទួលស្គាល់ថា ពិតជាមានភាពមិនប្រក្រតីធ្ងន់ធ្ងរមែន។
ប៉ុន្តែសារនេះមិនគ្រប់គ្រាន់នឹងបញ្ចប់រឿងអាស្រូវឡើយ។ តាំងពីមួយសប្តាហ៍នេះ សមាជិកសភានៃបក្សប្រឆាំងទាំងអស់នៅក្នុងសភា បាននាំគ្នាបន្ទោស និងទម្លាក់ការរិះគន់ ផ្តុំលើរូបលោកប្រធានាធិបតី។ បក្សប្រឆាំងបានបង្ខំឱ្យរដ្ឋាភិបាលផ្អាកការតស៊ូមតិស្តីពីការសើរើរដ្ឋធម្មនុញ្ញ ដោយហេតុតែរឿងអាស្រូវបេណាឡានេះ។ ហើយពួកគេទំនងជាមិនព្រលែងរឿងនេះដោយស្រួលៗឡើយ។
លោកប្រធានាធិបតីម៉ាក្រុង ពេលនេះ កំពុងស្ថិតក្រោមសម្ពាធខ្លាំងណាស់ ព្រោះលោកជាទិសដៅនៃការវាយប្រហារ។ ការដែលលោកព្រមបញ្ចេញទស្សនៈ ក្រោយការប្រកាសរបស់តុលាការធ្វើការចោទប្រកាន់ជាផ្លូវការលោក បេណាឡា និងមនុស្ស៤រូបផ្សេងទៀត និងមុនសភាចោទសួររដ្ឋមន្ត្រីក្រសួងមហាផ្ទៃ អាចបញ្ជាក់បានអំពីទម្ងន់នៃស្ថានការណ៍។
បញ្ហាសម្រាប់ពេលនេះ គឺត្រូវរកឱ្យឃើញអត្តសញ្ញាណ បណ្តាញអ្នកទទួលខុសត្រូវ។ តើ អាចស្រាវឡើងប៉ះពាល់ដល់រូបលោកប្រធានាធិបតីដែរឬយ៉ាងណា ? បើមែន លោកម៉ាក្រុង ពិតជាកំពុងស្វែងរកវិធីបញ្ចៀសឱ្យបានហើយ។ តើលោកម៉ាក្រុង កំពុងត្រៀម បូជា មនុស្សជំនិតមួយណា ដើម្បីការពារខ្លួនលោក ?!
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ