FMI ៖សង្គ្រាមពាណិជ្ជកម្មនឹងបញ្ចុះកំណើនសេដ្ឋកិច្ចពិភពលោក
នាឱកាសបើកជំនួបប្រជុំថ្នាក់រដ្ឋមន្ត្រីក្រសួងហិរញ្ញវត្ថុនិងអភិបាលធនាគារនៃក្រុមប្រទេសហ្សេ២០ រយៈពេលពីរថ្ងៃ (២១-២២ កក្កដា) នៅប្រទេសប្រេស៊ីល លោកស្រី នាយិកាអង្គការមូលនិធិរូបិយវត្ថុអន្តរជាតិ គ្រីស្ទីន ឡាហ្កាដ បានព្រមានជាថ្មី ថាសង្គ្រាមពាណិជ្ជកម្ម បង្កឡើងដោយសហរដ្ឋអាមេរិកមួយសហភាពអឺរ៉ុប ចិននិងរុស្ស៊ី ពេលនេះ នឹងប៉ះពាល់ដល់កំណើនសេដ្ឋកិច្ចពិភពលោកទាំងមូល។ ប៉ុន្តែវ៉ាស៊ីនតោន ហាក់គ្មានអើពើនឹងពាក្យព្រមាននោះអ្វីបន្តិចសោះ។
ចុះផ្សាយនៅថ្ងៃ៖ កែប្រែថ្ងៃទី៖
កំណើនសេដ្ឋកិច្ចពិភពលោកនឹងត្រូវធ្លាក់ចុះប្រមាណ០,៥% នៅឆ្នាំ២០២០ ! ចំណែកទីផ្សារការងារក៏នឹងត្រូវរងការបំផ្លាញ ! និងមានតែអ្នកខាតប៉ុណ្ណោះ ! នេះបើតាមប្រសាសន៍របស់លោកស្រីនាយិកាអង្គការមូលនិធិរូបិយវត្ថុអន្តរជាតិ ក្នុងសន្និសីទកាសែត។ ផលប៉ះពាល់ចំពោះកំណើនសេដ្ឋកិច្ចពិភពលោក និងចំពោះបណ្តាប្រទេសកំពុងលូតលាស់ បង្កឡើងសង្គ្រាមពាណិជ្ជកម្ម ទំនងត្រូវមានចែងនៅក្នុងសេចក្តីថ្លែងការបង្ហើយ ក្រោយការបិទជំនួបប្រជុំហ្សេ២០ នៅយប់នេះ។
នាឱកាសជំនួបប្រជុំហ្សេ២០នេះដែរ ភាគីបារាំង តាមរយៈប្រសាសន៍របស់រដ្ឋមន្ត្រីក្រសួងហិរញ្ញវត្ថុ បានអំពាវនាវឱ្យសហរដ្ឋអាមេរិកប្តូរចិត្តត្រលប់មកធ្វើជាប្រទេសមានហេតុផល និងដោះស្រាយវិបត្តិសេដ្ឋកិច្ចពិភពលោក តាមច្បាប់អន្តរជាតិបែបពហុជាតិ មិនមែនបែបព្រៃឡើយ។
ប៉ុន្តែសហរដ្ឋអាមេរិកមិនរង្គើសោះនៅលើកនេះ។ បន្ថែមពីសេចក្តីប្រកាសរបស់លោកដូណាល់ ត្រាំ ចាត់ទុកប៉េកាំង អឺរ៉ុបនិងម៉ូស្គូជាសត្រូវពាណិជ្ជកម្ម រដ្ឋមន្ត្រីក្រសួងហិរញ្ញវត្ថុអាមេរិក បានបញ្ជាក់ជំហរដ៏តឹងម៉ឺងរបស់ខ្លួន ថាសហភាពអឺរ៉ុប និងចិន ត្រូវធ្វើសម្បទាន ទើបទំនាក់ទំនងពាណិជ្ជកម្មរវាងគ្នាមានលំនឹង។
សូមបញ្ជាក់ថា ក្រោយពីអនុវត្តទណ្ឌកម្មដំឡើងពន្ធលើការនាំចូលដែកថែប និងអាលុយមីញ៉ូម មកពីចិន និងអឺរ៉ុប លោកត្រាំ បានគំរាមយកពន្ធបន្ថែមលើការនាំចូលរថយន្តអឺរ៉ុបទៅសហរដ្ឋអាមេរិក ព្រមទាំងដាក់ទណ្ឌកម្មប្រឆាំងនឹងប្រទេសណាដែលរកស៊ីជាមួយអ៊ីរ៉ង់ និងយកពន្ធនាំចូលលើគ្រប់ផលិតផលរបស់ចិន។
ប្រឈមនឹងភាពមានៈរបស់អាមេរិក ប្រធានគណៈកម្មការអឺរ៉ុប លោក ហ្សង់ក្លូត ចាំងគ័រ គ្រោងនឹងធ្វើដំណើរទៅកាន់ទីក្រុងវ៉ាស៊ីនតោន នៅថ្ងៃពុធ ដើម្បីពិភាក្សារកដំណោះស្រាយបន្ធូរសម្ពាធ ប៉ុន្តែអឺរ៉ុបបានតាំងចិត្តរួចជាស្រេចថានឹងមិនព្រមឱ្យអាមេរិកសម្រេចការណ៍ពិភពលោកអ្វីតែម្នាក់ឯងទៀតឡើយ។ លោកស្រីនាយករដ្ឋមន្ត្រីអាល្លឺម៉ង់ ក៏បានព្រលយហើយថាអឺរ៉ុបនឹងចាត់វិធានការតប។ អឺរ៉ុបបដិសេធមិនចរចាទេ គឺអាមេរិកជាអ្នកត្រូវដកថយ។ នេះជាជំហររបស់បារាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ