បារាំង-អាហ្រ្វិក៖លោកម៉ាក្រុងបញ្ជាក់ជាថ្មីពីជំហររបស់បារាំងក្នុងការប្រឆាំងពួកជីហាតនៅតំបន់សាហ៊ែល
នៅក្នុងឱកាសជំនួបកំពូលសហភាពអាហ្រ្វិកលើកទី៣១ រៀបចំក្នុងទីក្រុងណួកសុត ប្រទេសម៉ូរីតានីនាថ្ងៃចន្ទ ទី២ មិថុនា លោកប្រធានាធិបតីបារាំងអេម៉ានុយអែល ម៉ាក្រុងបានរួមប្រជុំជាមួយសមភាគីទាំង ៥ប្រទេសអាហ្រ្វិកក្នុងតំបន់សាហ៊ែល គឺម៉ូរីតានី ម៉ាលី នីហ្សេ ឆាដ និងប្រទេសបួគីណាហ្វាសូ។ នៅក្នុងជំនួបរយៈពេល ២ម៉ោង ប្រមុខរដ្ឋទាំង ៦ប្រទេសបានពិភាក្សាលើយុទ្ធសាស្រ្តថ្មីដើម្បីឆ្លើយតបនឹងការគំរាមកំហែងភេរវកម្មពីពួកជីហាតនៅក្នុងតំបន់។ ជំនួបនេះបានធ្វើឡើង ក្រោយពីមានភេរវកម្មចំនួនពីរក្នុងប្រទេសម៉ាលីកាលពីថ្ងៃសុក្រ ទី២៩ មិថុនា និងថ្ងៃអាទិត្យ ទី១ កក្កដាដែលបណ្តាលឲ្យស្លាប់ជនស៊ីវិលម៉ាលីចំនួន ៧នាក់ និងរបួសទាហានបារាំងចំនួន ៣នាក់។ នាឱកាសទស្សនាវិទ្យាល័យយោធាមួយរបស់ក្រុម ៥ប្រទេសសាហ៊ែលក្នុងទីក្រុងណួកសុត លោកម៉ាក្រុងបានឆ្លៀតបញ្ជាក់ជាថ្មីពីការប្តេជ្ញាចិត្តរបស់បារាំងនៅក្នុងយុទ្ធនាការប្រឆាំងភេរវនិយមនៅក្នុងតំបន់សាហ៊ែល។
ចុះផ្សាយនៅថ្ងៃ៖
« នៅទីនេះ ខ្ញុំចង់និយាយបញ្ជាក់ឡើងវិញពីការសន្យាយ៉ាងពេញលេញរបស់បារាំងនៅក្នុងយុទ្ធនាការប្រយុទ្ធប្រឆាំងនឹងភេរវនិយម ពិសេសពីកម្លាំងទាហានរបស់យើងដែលកំពុងបំពេញបេសកកម្ម និងកិច្ចសហប្រតិបត្តិនៅក្នុងក្របខ័ណ្ឌបាកាន។ ខណៈនេះ ទាហានបារាំងដែលបានរងរបួសថ្មីៗនៅក្នុងការវាយប្រហារពីពួកជីហាតក្នុងប្រទេសម៉ាលីត្រូវបានដឹកទៅព្យាបាលនៅក្នុងប្រទេសបារាំងហើយ។
យើងមិនចុះញ៉មជាដាច់ខាត យើងបន្តពួតដៃគ្នាក្នុងការប្រឆាំងទប់នឹងពួកជីហាត ហើយយើងនឹងទទួលបានជោគជ័យទាំងអស់គ្នានៅក្នុងយុទ្ធនាការមួយនេះ។ យើងនឹងទទួលជោគជ័យតាមរយៈឆន្ទៈ និងការប្តេជ្ញាចិត្តផ្លូវយោធា រួមទាំងតាមរយៈការសម្របសម្រួលផ្នែកសន្តិសុខ។ បន្ទាប់មក យើងក៏នឹងទទួលជោគជ័យផងដែរតាមរយៈការងារផ្លូវទូត។
ក្រៅពីនោះ ក៏មានការរៀបចំឲ្យបានប្រសើរ និងស៊ីសង្វាក់នៃកិច្ចសហប្រតិបត្តិការយោធាដែលស្ថិតក្រោមរដ្ឋអំណាចអាហ្រ្វិក និងកិច្ចសហប្រតិបត្តិការរក្សាសន្តិភាព។ បន្ទាប់មកទៀត ជោគជ័យក៏នឹងទទួលបានតាមរយៈការធ្វើវិនិយោគក្នុងផ្នែកអភិវឌ្ឍន៍ ក្នុងផ្នែកអប់រំមានន័យថា ធ្វើឲ្យចុះទន់ខ្សោយនូវលក្ខខណ្ឌនៃការអភិវឌ្ឍរចនាសម្ព័ន្ធរបស់ពួកជីហាត និងគ្រប់ទម្រង់ភេរវនិយមទាំងអស់ »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ