អឺរ៉ុបរកឃើញកិច្ចព្រមព្រៀងដើម្បីដោះស្រាយវិបត្តិអន្តោប្រវេសន៍
ចុះផ្សាយនៅថ្ងៃ៖
ស្តាប់ - ០៨:០២
ថ្នាក់ដឹកនាំរបស់ប្រទេសទាំង២៨របស់សហភាពអឺរ៉ុប នៅទីបំផុតទៅបានរកឃើញកិច្ចព្រមព្រៀងរួម ដើម្បីបញ្ចប់វិបត្តិអន្តោប្រវេសន៍ ដែលជាប្រភពនៃការបែកបាក់គ្នា រវាងប្រទេសសមាជិកអឺរ៉ុប។ អ៊ីតាលីធ្លាប់គំរាមបន្ទុចបង្អាក់ មិនឲ្យជំនួបកំពូលចេញសេចក្តីថ្លែងការណ៍រួម បើសិនអឺរ៉ុបមិនជួយរកមធ្យោបាយ សម្រាលបន្ទុកអន្តោប្រវេសន៍របស់អ៊ីតាលី។ ប៉ុន្តែ នៅថ្ងៃព្រហស្បតិ៍ អ៊ីតាលីបានសម្រេចចូលរួម ជាមួយអឺរ៉ុប ក្នុងកិច្ចព្រមព្រៀងដោះស្រាយបញ្ហាជនអន្តោប្រវេសន៍។
បន្ទាប់ពីប្រជុំ អស់ពេញមួយយប់(៩ម៉ោង) នៅថ្ងៃព្រហស្បតិ៍ រហូត ដល់ម៉ោង ៥ទាបភ្លឺ ម៉ោងនៅស្រុកបារាំង ថ្នាក់ដឹកនាំ របស់ប្រទេសទាំង២៨ សមាជិករបស់សហភាពអឺរ៉ុបបានរកឃើញកិច្ចព្រមព្រៀងរួមគ្នាមួយ ដើម្បីដោះស្រាយវិបត្តិអន្តោប្រវេសន៍។ ប៉ុន្មានសប្តាហ៍មកហើយ ប្រទេសសមាជិកសហភាពអឺរ៉ុបបាន ខ្វែងគំនិតខ្លាំងណាស់ ក្នុងរឿងទទួលជនអន្តោប្រវេសន៍ ដែលធ្វើដំណើរចូលមកទឹកដីអឺរ៉ុប។
អ៊ីតាលី ដែលធ្លាប់គំរាមរារាំងមិនឲ្យអឺរ៉ុបចេញសេចក្តីថ្លែងការណ៍រួម នៅទីបំផុតបានចុះហត្ថលេខា លើសេចក្តីថ្លែងការណ៍ រួម នៅក្រោយកិច្ចព្រមព្រៀង ត្រូវបានរកឃើញ ក្នុងជំនួបកំពូល អឺរ៉ុប នៅថ្ងៃព្រហស្បតិ៍។ កិច្ចព្រមព្រៀង ស្តីពីជនអន្តោប្រវេសន៍ សំខាន់ណាស់ ព្រោះវាជាកត្តាកំណត់ អនាគតដ៏ផុយស្រួយរបស់រដ្ឋាភិបាលអាល្លឺម៉ង់ ផង និងជួយបិទបញ្ចប់ ការខ្វែងគំនិតគ្នា រវាងប្រទេសសមាជិកអឺរ៉ុប ក្នុងរឿងទទួលជនភៀសខ្លួនផង។
នៅក្រោយការចរចា ៩ម៉ោង នាយករដ្ឋមន្រ្តីអ៊ីតាលី ដែលដាក់សំពាធរហូតមកលើប្រទេសដៃគូអឺរ៉ុប បានប្រកាសប្រាប់អ្នកកាសែត ថា អ៊ីតាលីលែងនៅឯកោ តែម្នាក់ទៀតហើយ។ កិច្ចព្រមព្រៀង បានឆ្លើយតបនឹងការទាមទារ ចង់បាន របស់រដ្ឋាភិបាលអ៊ីតាលី ដែលចង់ឲ្យមានយន្តការអឺរ៉ុប ទៅជួយ សម្រាលបន្ទុករបស់អ៊ីតាលី ក្នុងរឿងទទួលលំហូរជនអន្តោប្រវេសន៍។
អ៊ីតាលីយល់ថា ខ្លួនបានរងគ្រោះដោយសារតែគេបានអនុវត្តច្បាប់Dublin។ តាមច្បាប់Dublin ប្រទេសណា ដែលបានទទួលជនអន្តោប្រវេសន៍ ជនភៀសខ្លួនមុនគេ គឺជាអ្នកទទួលបន្ទុក ចាត់ចែង រឿងផ្តល់ក្រដាសស្នាម ឬនិតិផ្តល់សិទ្ធិជ្រកកោន ដល់ជនអន្តោប្រវេសន៍។ អ៊ីតាលី និងក្រិក ដែលប្រឈមខ្លាំងជាងគេនឹងការមកដល់នៃជនអន្តោប្រវេសន៍តាមទូក នៅសមុទ្រ មេឌីទែរ៉ាណេ បានបរិហារិះគន់រហូតមក ប្រទេសនៅអឺរ៉ុបផ្សេងទៀត ថា អត្មានិយម មិនព្រមជួយរំលែកទទួលយកជនអន្តោប្រវេសន៍ពីខ្លួន។ អ៊ីតាលី ពេញចិត្តនឹងកិច្ចព្រមព្រៀង នៅថ្ងៃនេះ ពីព្រោះថា កិច្ចព្រមព្រៀងនេះដែលមិនបានកំណត់ ចាប់បង្ខំ ឲ្យប្រទេសសមាជិក អឺរ៉ុប ត្រូវតែទទួលជនភៀសខ្លួន នោះទេ នឹងជួយឲ្យអ៊ីតាលី លែងទទួលបន្ទុកតែម្នាក់ លើរឿងទទួលជនភៀសខ្លួន ជនអន្តោប្រវេសន៍។ ទៅតាម កិច្ចព្រមព្រៀង ប្រទេសនៅអឺរ៉ុប អាចទទួល ជនអន្តោប្រវេសន៍ ទៅតាមគោលការណ៍ស្ម័គ្រចិត្ត ហើយនិងការសាមគ្គីភាពគ្នារវាងប្រទេសសមាជិកអឺរ៉ុប។
កិច្ចព្រមព្រៀងអឺរ៉ុបលើកនេះ បានជួយរដ្ឋាភិបាលចម្រុះ របស់លោកស្រីម៊ែរកិល មិនឲ្យប្រេះឆា។ ជាមួយកិច្ចព្រមព្រៀង លោកស្រី នាយករដ្ឋមន្រ្តីអាល្លឺម៉ង់អាចត្រលប់ទៅក្រុងប៊ែឡាំង ដើម្បី បញ្ចុះបញ្ចូលកុំឲ្យរដ្ឋមន្រ្តីមហាផ្ទៃ មកពីគណបក្សដៃគូ ដើរចេញពីរដ្ឋាភិបាល។ រដ្ឋមន្រ្តីមហាផ្ទៃអាល្លឺម៉ង់ បានគំរាមរួចហើយថា នឹងចាប់បញ្ជូនចេញពីប្រទេសអាល្លឺម៉ង់វិញ នូវ ជនអន្តោប្រវេសន៍ ទាំងឡាយណា ដែលបានចុះឈ្មោះ នៅប្រទេសអឺរ៉ុបផ្សេង ប៉ុន្តែ បានធ្វើដំណើរមកតាំងទី នៅទឹកដីអាល្លឺម៉ង់។
តាមកិច្ចព្រមព្រៀង ថ្មី សមាជិកសហភាពអឺរ៉ុបបានយល់ព្រមព្រៀងគ្នា គ្រប់គ្រងឲ្យតឹងរ៉ឹងជាងមុន មិនឲ្យជនអន្តោប្រវេសន៍ដែលបានចុះឈ្មោះក្នុងទឹកដីខ្លួន អាចដើរចេញ ចូល ស្រេចចិត្ត ក្នុងលំហរអឺរ៉ុបដូចមុននោះទេ។
កិច្ចព្រមព្រៀង ដែលនិយាយច្រើនពីគោលការណ៍ស្ម័គ្រចិត្ត
កិច្ចព្រមព្រៀងរបស់សហភាពអឺរ៉ុបមានចែងពីចំណុចគោល សំខាន់ៗ ចំនួន ១២ ដូចជា ការសហការគ្នា ជាធ្លុងមួយ នៅក្នុងរង្វង់ប្រទេសសមាជិកអឺរ៉ុបដើម្បីទទួលជនអន្តោប្រវេសន៍ ការពង្រឹងការត្រួតពិនិត្យ នៅតាមព្រំដែនខាងត្បូង ហើយនិងខាងកើតអឺរ៉ុប វិធានការទប់ស្កាត់ការជួញដូររបស់ពួកមេខ្យល់ ហើយនិងការបង្កើតជំរំទទួលជនអន្តោប្រវេសន៍ មិនថា ក្នុងទឹកដីអឺរ៉ុប ឬនៅប្រទេសដើមរបស់ជនអន្តោប្រវេសន៍។
-ទៅតាមកិច្ចព្រមព្រៀង សហភាពអឺរ៉ុបត្រូវពង្រឹងការត្រួតពិនិត្យ នៅតាមព្រំដែន អឺរ៉ុប ហើយការត្រួតពិនិត្យ នេះត្រូវធ្វើរួមគ្នាដោយប្រទេសនៅអឺរ៉ុប ទាំងមូល គឺមិនមែនជាបន្ទុកតែម្នាក់ឯងរបស់ប្រទេសដែលនៅជាប់ព្រំដែនអឺរ៉ុបនោះទេ។
-សហភាពអឺរ៉ុបនឹងបង្កើនថវិកាបន្ថែមទៀត សម្រាប់យន្តការល្បាត និងប្រយុទ្ធប្រឆាំងការជួញដូរមនុស្សរបស់ពួកមេខ្យល់ នៅសមុទ្រមេឌីទែរ៉ាណេ ហើយនិងនៅក្នុងទឹកដីលីប៊ី ដែលកំពុងក្លាយជាកន្លែងឆ្លងកាត់ និងរត់ពន្ធមនុស្សខុសច្បាប់ របស់បណ្តាញឧក្រិដ្ឋជន។
-ក្នុងរឿងចែករំលែក ទទួលជនអន្តោប្រវេសន៍ គេបានតម្រូវឲ្យបង្កើតជំរំទទួលជនភៀសខ្លួន នៅក្នុងបណ្តាប្រទេសអឺរ៉ុប ទៅតាមការស្ម័គ្រចិត្ត គឺមិនមែនប្រមូលផ្តុំ តែនៅអ៊ីតាលី ឬក្រិកដូចមុនទៀតនោះទេ។ នៅក្នុងជំរំទទួលជនអន្តោប្រវេសន៍ ទៀតសោត គេត្រូវកំណត់ឲ្យបានឆាប់រវាង អ្នកដែលភៀសខ្លួន ដែលអាចសុំសិទ្ធិជ្រកកោន ហើយនិងជនអន្តោប្រវេសន៍ខុសច្បាប់។ សម្រាប់អ្នកដែលធ្វើដំណើរខុសច្បាប់ មិនមែនជាជនភៀសខ្លួន គេត្រូវប្រញាប់ចាប់បញ្ជូនទៅប្រទេសកំណើតវិញ។ ក្នុងរឿងបង្កើតមណ្ឌលទទួលជនអន្តោប្រវេសន៍ សហភាពអឺរ៉ុប ដែលទទួលបានគំនិតពី ឧត្តមស្នងការអង្គការសហប្រជាជាតិទទួលបន្ទុកជនភៀសខ្លួន គ្រោង ចង់បង្កើតឲ្យមានជំរំទទួលជនអន្តោប្រវេសន៍ នៅក្រៅទឹកដីអឺរ៉ុប ដូចជានៅបណ្តាប្រទេសអាហ្វ្រិក ខាងជើង ដែលជាប្រទេសដើម ឬប្រទេសឆ្លងកាត់ របស់ជនអន្តោប្រវេសន៍។ សហភាពអឺរ៉ុបគ្រោងផងដែរ នឹងបង្កើនការចរចាជាមួយ បណ្តាប្រទេសនៅអាហ្វ្រិកដើម្បីឲ្យទទួលយកជនអន្តោប្រវេសន៍ ដែលអឺរ៉ុបចាប់បញ្ជូនចេញ ទៅវិញ។
-សហភាពអឺរ៉ុបប្រកាសផងដែរ ចង់បង្កើនថវិកាជំនួយ ដល់តួកគី ដែលបានផ្តល់ដីសម្រាប់ជំរំទទួលជនអន្តោប្រវេសន៍ ជនភៀសខ្លួន ដែល គេចចេញពីសង្រ្គាម នៅស៊ីរី ឬនៅអាហ្វហ្កានីស្ថានជាដើម។ សម្រាប់អឺរ៉ុប ការសហការជាមួយ តួកគី បានជួយទប់ស្កាត់ ធ្វើឲ្យចំនួនជនអន្តោប្រវេសន៍ ហូរចូលមកអឺរ៉ុបធ្លាក់ចុះ ច្រើនណាស់ បើប្រៀបនឹងឆ្នាំ ២០១៥។
កិច្ចព្រមព្រៀង ដែលល្អមើល ប៉ុន្តែ ដែលគ្មានអ្នកណាចង់គោរពធ្វើតាម
កិច្ចព្រមព្រៀងគឺគ្រាន់តែល្អមើល ប៉ុន្តែ មិនប្រាកដទេ ថា នឹងជួយដោះស្រាយវិបត្តិអន្តោប្រវេសន៍ ឲ្យស៊ីជម្រៅនោះទេ។ នៅក្នុងកិច្ចព្រមព្រៀង គេបានសរសេរច្បាស់ណាស់ថា គ្រប់ប្រទេសនៅអឺរ៉ុបអាចបង្កើតជំរំ ទទួលជនអន្តោប្រវេសន៍ក្នុងទឹកដីខ្លួន ទៅតាមការស្ម័គ្រចិត្ត។ គឺពាក្យស្ម័គ្រចិត្តនេះហើយ ដែលធ្វើឲ្យគេដឹងភ្លាមថា វិបត្តិអន្តោប្រវេសន៍ នៅអឺរ៉ុប គឺគ្មានថ្ងៃដោះស្រាយចេញរួចនោះទេ។ បារាំង អាល្លឺម៉ង់ ជាដើម ដែលលើកនិយាយច្រើនពីគោលការណ៍ ចែករំលែក របស់សហភាពអឺរ៉ុប ដើម្បី សម្រាលបន្ទុករបស់បណ្តាប្រទេសនៅសមុទ្រ មេឌីទែរ៉ាណេដូចជាអ៊ីតាលី ក្រិក ឬអេស្ប៉ាញ គឺនឹងមិនចេញមុខ ស្ម័គ្រចិត្តទទួលជនអន្តោប្រវេសន៍នោះទេ។
ក្នុងរឿងបង្កើតជំរំដាក់ជនអន្តោប្រវេសន៍ បណ្តោះអាសន្ន នៅក្រៅទឹកដីអឺរ៉ុប ក្នុងពេលសិក្សាឯកសារផ្តល់សិទ្ធិជ្រកកោននយោបាយ គឺរឹតតែមិនអាចទៅរួចទៅទៀត។ ប្រទេសម៉ារ៉ុក ទុយនីស៊ី អាល់បាលី ដែលសហភាព អឺរ៉ុបគ្រោងចង់ចរចាបង្កើតជំរំ ទទួលជនអន្តោប្រវេសន៍ បានចេញមុខ រួចហើយប្រឆាំងនឹងគំនិតចង់បានរបស់សហភាពអឺរ៉ុប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ