ហេតុអ្វីបានជារុស្ស៊ីប្រឆាំង មិនទទួលស្គាល់អំណាចថ្មីរបស់អង្គការ ហាមឃាត់អាវុធគីមី?
ចុះផ្សាយនៅថ្ងៃ៖
ស្តាប់ - ០៧:៣៣
ប្រទេសសមាជិករបស់អង្គការហាមឃាត់អាវុធគីមី នៅថ្ងៃពុធម្សិលមិញ បានសម្រេច បោះឆ្នោត បន្ថែមអំណាច ដល់អង្គការអន្តរជាតិមួយ នេះ ដើម្បីចង្អុលមុខ រកអ្នកដែលទទួលខុសត្រូវប្រើអាវុធគីមី។ កន្លងមក អង្គការហាមឃាត់អាវុធគីមី មានតួនាទីត្រឹមស៊ើបអង្កេត ថា តើពិតជាមានការប្រើអាវុធគីមី តែប៉ុណ្ណោះ ប៉ុន្តែ គ្មានសមត្ថភាព ឬតួនាទី រកមុខអ្នកប្រើអាវុធគីមីនោះទេ។ នៅថ្ងៃព្រហស្បតិ៍ទី ២៨ មិថុនា រុស្ស៊ី ដែលជាសម្ព័ន្ធមិត្តរបស់ស៊ីរី ជាទីដែលមានការសង្ស័យ ប្រើអាវុធ គីមី នៅក្នុងសមរភូមិសង្រ្គាម បានចេញមុខ ប្រឆាំងមិនទទួលស្គាល់អំណាចថ្មីរបស់អង្គការ ហាមឃាត់អាវុធគីមី។
ប្រទេសសមាជិករបស់អង្គការហាមឃាត់អាវុធគីមី នៅថ្ងៃពុធម្សិលមិញ បានបោះឆ្នោត លើសេចក្តីសម្រេច មួយ ដែលស្នើឡើងដោយអង់គ្លេស ដើម្បី ផ្តល់អំណាច ថ្មីបន្ថែមដល់អង្គការអន្តរជាតិមួយនេះ ក្នុងការដៅឈ្មោះអ្នកដែលបានប្រើអាវុធគីមី សម្លាប់មនុស្ស។
អង់គ្លេស ដែលរងគ្រោះផ្ទាល់ដោយករណីប្រើអាវុធគីមី នៅក្នុងទឹកដី របស់ខ្លួន គឺជាអ្នកដែលបានស្នើសេចក្តីសម្រេច ដោយមានការគាំទ្រពីបារាំង ហើយនិងអាមេរិក។ អំណើះតទៅ ក្រៅតែពីអាចស៊ើបអង្កេត លើករណីប្រើប្រាស់អាវុធគីមី អង្គការហាមឃាត់អាវុធគីមីមានអំណាចផងដែរ ដៅ ចង្អុរឈ្មោះ អ្នកដែលបានប្រើប្រាស់ ឬទទួលខុសត្រូវឲ្យមានការប្រើអាវុធគីមីសម្លាប់មនុស្ស។
បង្កើតឡើងនៅឆ្នាំ ១៩៩៧ អង្គការហាមឃាត់អាវុធគីមី ដែលមានទីស្នាក់ការកណ្តាលនៅទីក្រុងឡាអេ ប្រទេសហូឡង់ មានទិសដៅ លុបបំបាត់ទាំងស្រុង អាវុធគីមី គ្រប់ប្រភេទ ក្នុងពិភពលោក។ អង្គការដែលមានប្រទេសសមាជិក ចំនួន ១៩៣ប្រទេស មានតួនាទី តាមដានមើលថា តើអនុសញ្ញាស្តីពីការហាមឃាត់អាវុធគីមី ត្រូវបានប្រទេសហត្ថលេខី គោរព បានយ៉ាងខ្ជាប់ខ្ជួនដែរឬទេ។ នៅឆ្នាំ ២០១៣ អង្គការហាមឃាត់អាវុធគីមី ដែលបានចូលរួម ក្នុងយុទ្ធនាការ បំផ្លាញ អាវុធគីមី របស់រដ្ឋាភិបាលស៊ីរី បានទទួលរង្វាន់ណូបែលសន្តិភាព សម្រាប់ការប្រឹងប្រែងរបស់ស្ថាប័ន ក្នុងការលុបបំបាត់អាវុធគីមី។
បច្ចុប្បន្ននេះ អង្គការហាមឃាត់អាវុធគីមី កំពុងស៊ើបអង្កេតទៅលើករណីសង្ស័យ ប្រើប្រាស់អាវុធគីមី សម្លាប់មនុស្ស នៅក្នុងប្រទេសស៊ីរី ហើយនិងនៅប្រទេសអង់គ្លេស។ បញ្ហាគឺនៅត្រង់ថា អង្គការ ហាមឃាត់អាវុធគីមី មាននាទី ត្រឹមតែ ស៊ើបអង្កេតថា តើពិតជាមានការវាយប្រហារដោយប្រើអាវុធគីមី ដែរឬទេ តែប៉ុណ្ណោះ គឺមិនគ្មានសមត្ថកិច្ច ដើម្បីបញ្ជាក់ថា អ្នកណាជាប្រព្រឹត្ត ប្រើអាវុធគីមីនោះទេ។
សូមអាន៖ បារាំងចង់ឲ្យអង្គការប្រឆាំងអាវុធគីមី អាចមានលទ្ធភាពកំណត់មុខ អ្នកទទួលខុសត្រូវ
នៅក្នុងកិច្ចប្រជុំពីរថ្ងៃ នៅទីស្នាក់ការរបស់អង្គការហាមឃាត់អាវុធគីមី នៅទីក្រុងឡាអេ គេបានលើកពីករណីប្រើប្រាស់អាវុធគីមី ដើម្បី ធ្វើឃាត គីម ជុងណាម បងប្រុសរបស់មេដឹកនាំកូរ៉េខាងជើង ករណីបំពុលសម្លាប់ ចារកិច្ចរុស្ស៊ី ក្នុងទឹកដី អង់គ្លេស ហើយនិងការប្រើប្រាស់ អាវុធគីមី សម្លាប់មនុស្សក្នុងទឹកដីស៊ីរី។ និទណ្ឌភាព ការរួចផុតពីការចោទប្រកាន់សម្រាប់ជនដៃដល់ ដែលប្រើប្រាស់អាវុធគីមី រហូតមកនេះ គឺជាហេតុផល ចំបង ដែលជំរុញ ឲ្យគេចាំបាច់ ត្រូវធ្វើកំណែទម្រង់ ពង្រឹងអំណាចបន្ថែម ដល់អង្គការហាមឃាត់អាវុធគីមី។ ការបន្ថែមអំណាច ដល់ស្ថាប័នហាមឃាត់អាវុធ គីមី ធ្វើឡើងនៅមុនពេលដែលអង្គការហាមឃាត់អាវុធគីមីត្រូវចេញរបាយការណ៍ស៊ើបអង្កេតទៅលើការវាយប្រហារ ដែលគេសង្ស័យថា ជាការវាយប្រហារសម្លាប់មនុស្សដោយអាវុធគីមី ទៅលើប្រជាជនស៊ីរី កាលពីខែ មេសា ឆ្នាំ ២០១៨។
រុស្ស៊ីប្រកាសមិនទទួលស្គាល់អំណាចបន្ថែមថ្មីរបស់អង្គការហាមឃាត់អាវុធគីមី
នៅក្នុងការបោះឆ្នោតបិទទ្វារ កាលពីថ្ងៃពុធម្សិលមិញ រុស្ស៊ី រួមជាមួយប្រទេសចំនួន ២៤ បានបោះឆ្នោតប្រឆាំង នឹងការបន្ថែមអំណាចថ្មី ឲ្យអង្គការហាមឃាត់អាវុធគីមី។
សេចក្តីសម្រេចផ្តល់អំណាចបន្ថែម ដល់អង្គការហាមឃាត់អាវុធ គីមី ត្រូវបានបោះឆ្នោតគាំទ្រតែ ពីប្រទេសចំនួន៨២ និងមានអ្នកប្រឆាំងដល់ទៅ ២៤ ដែលនៅក្នុងនោះ មានរុស្ស៊ី និងប្រទេសស៊ីរី ដែលទាំងពីរសុទ្ធតែជាសមាជិករបស់អង្គការហាមឃាត់អាវុធគីមី។ ប៉ុន្តែ សំឡេងគាំទ្រ ៨២ គឺគ្រប់គ្រាន់អាចធ្វើឲ្យសេចក្តីព្រាងរបស់អង់គ្លេស អនុម័តជាផ្លូវការ ព្រោះវាតំណាងឲ្យពីរភាគបី នៃសំឡេងអ្នកបោះឆ្នោតសរុប។
រុស្ស៊ី និងស៊ីរី សុទ្ធតែកំពុងជាប់សង្ស័យ ក្នុងរឿងប្រើប្រាស់អាវុធ គីមីសម្លាប់មនុស្ស បានបោះឆ្នោតប្រឆាំង។ មុននឹងត្រូវរំលាយចោល ទៅវិញ នៅខែធ្នូឆ្នាំមុន បេសកកម្មស៊ើបអង្កេតមួយ របស់អង្គការសហប្រជាជាតិ ដែលរួមគ្នាជាមួយ អង្គការហាមឃាត់អាវុធគីមី បានចេញសេចក្តីសន្និដ្ឋាន ថា របបស៊ីរីរបស់ប្រធានាធិបតីបាស្ហា អាល់អាសាដ ជាអ្នកប្រើប្រាស់អាវុធគីមី ដូចជាក្លរ ហើយនិងឧស្ម័ន សារ៉ាំង ដល់ទៅ ៤លើក ដើម្បីសម្លាប់ប្រជាជននៅក្នុងតំបន់គ្រប់គ្រុងដោយក្រុមប្រឆាំងស៊ីរី។
ចំណែករុស្ស៊ីវិញ កំពុងត្រូវអង់គ្លេស ចោទប្រកាន់ថា ជាអ្នកនៅពីក្រោយ ការប៉ុនប៉ង សម្លាប់ដោយប្រើអាវុធគីមី ទៅលើចារកិច្ចរុស្ស៊ី ក្នុងទឹកដីអង់គ្លេស។ ទីក្រុងម៉ូស្គូរហូតមកបានបដិសេធ ទាត់ចោលការចោទប្រកាន់របស់អង់គ្លេស។ អនុរដ្ឋមន្រ្តីការបរទេសរុស្ស៊ី នៅថ្ងៃនេះ នៅបានចេញមុខ បដិសេធមិនទទួលស្គាល់ ការបន្ថែមអំណាចដល់អង្គការហាមឃាត់អាវុធ គីមី ព្រោះបើតាមក្រុងម៉ូស្គូ រឿងទាំងអស់នេះផ្តួចផ្តើមឡើង ដោយក្រុងឡុងដ៍ ដើម្បីប្រឆាំង រុស្ស៊ី។ សម្រាប់រុស្ស៊ី ការដៅឈ្មោះអ្នកទទួលខុសត្រូវ ប្រើប្រាស់អាវុធគីមី គឺជាសមត្ថកិច្ចផ្តាច់មុខរបស់ក្រុមប្រឹក្សាសន្តិសុខអង្គការសហប្រជាជាតិ ប៉ុន្តែ មិនមែនរបស់អង្គការហាមឃាត់អាវុធគីមីនោះទេ។ រុស្ស៊ីវាយតម្លៃថា អង្គការហាមឃាត់អាវុធគីមី មាននាទីត្រឹមតែទប់ស្កាត់ ការមិនរីកសាយអាវុធគីមីតែប៉ុណ្ណោះ។
ប៉ុន្តែ បញ្ហានៅត្រង់ថា ក្រុមប្រឹក្សាសន្តិសុខ រហូតដល់ពេលនេះ គ្មានលទ្ធភាពចោទប្រកាន់ជនដៃដល់ដែលប្រើអាវុធគីមី ណាមួយនោះទេ ជាពិសេស នៅក្នុងករណីសង្ស័យ ប្រើអាវុធគីមី នៅប្រទេសស៊ីរី ដោយសារតែការបោះឆ្នោតវេតូរបស់រុស្ស៊ី ដែលជាសម្ព័ន្ធមិត្ត របស់រដ្ឋាភិបាលស៊ីរី និងជាសមាជិកអចិន្ត្រៃយ៍របស់ក្រុមប្រឹក្សាសន្តិសុខ។ ដោយសារតែការបោះឆ្នោតវេតូរបស់រុស្ស៊ី នេះហើយ ដែលបេសសកម្មរបស់អង្គការសហប្រជាជាតិរួមជាមួយអង្គការហាមឃាត់អាវុធគីមី នៅទីបំផុត ត្រូវរំលាយទៅវិញ បន្ទាប់ពីបានសន្និដ្ឋានថា គឺរដ្ឋាភិបាលស៊ីរី សម្ព័ន្ធមិត្តរបស់ក្រុងម៉ូស្គូ ដែលបានប្រើអាវុធគីមី សម្លាប់ប្រជាជនឯង នៅក្នុងសង្រ្គាមវាយប្រហារទៅលើក្រុមអ្នកប្រឆាំង នៅទឹកដីស៊ីរី។
អំណើះតទៅ គេនឹងបានស្គាល់ឈ្មោះអ្នកដែលទទួលខុសត្រូវលើប្រើប្រាស់អាវុធគីមីសម្លាប់មនុស្ស
អង្គការហាមឃាត់អាវុធគីមី រហូតមកដល់ពេលនេះ បានចូលរួមលុបបំបាត់ដល់ទៅ ៩៦ភាគរយ នៃអាវុធគីមី ក្នុងពិភពលោក។ ប្រទេសសមាជិក និងហត្ថលេខី របស់អនុសញ្ញាហាមឃាត់អាវុធគីមី ភាគច្រើន គឺបានចូលរួមសហការរហូតមក ជាមួយអង្គការមួយនេះ ដែលជាស្ថាប័ន ឯករាជ្យ អព្យាក្រិត្យ។ រហូតមក ដោយសារតែការបោះឆ្នោតវេតូរបស់រុស្ស៊ី នៅក្រុមប្រឹក្សាសន្តិសុខ គ្មានជនដៃដល់ណាមួយ ត្រូវបានដៅឈ្មោះចំៗ និងផ្លូវការថា ជាអ្នកប្រើប្រាស់អាវុធ គីមីនោះទេ។ ជាមួយនឹងអំណាចថ្មី អង្គការហាមឃាត់អាវុធគីមី ដែលមានជំនាញ គ្រប់គ្រាន់ និងភាពស្របច្បាប់ ដើម្បីស៊ើបអង្កេត គឺជាស្ថាប័នតែមួយគត់ដែលអាចដៅឈ្មោះជនដៃដល់ប្រើអាវុធគីមីសម្លាប់មនុស្ស ដោយគ្មានឧបសគ្គរារាំង ពីប្រទេសមហាអំណាចណាមួយ មិនថា ចិន បារាំង អាមេរិក រុស្ស៊ី ឬអង់គ្លេស ដែលជាទាំង ៥ប្រទេសជាសមាជិកអចិន្ត្រៃយ៍របស់ក្រុមប្រឹក្សាសន្តិសុខ និងដែលមានសិទ្ធិវេតូ មិនឲ្យគេដាក់ចេញសេចក្តីសម្រេចដាក់ទណ្ឌកម្មលើភាគីទទួលខុសត្រូវលើការប្រើអាវុធគីមី។
យ៉ាងណាក៏ដោយ គេក៏មិនអាចសង្ឃឹមច្រើនទេថា អំណាចបន្ថែមថ្មី របស់អង្គការហាមឃាត់អាវុធគីមី នឹងជួយឲ្យគេអាចនាំជនដៃដល់មកកាត់ទោសដែរ។ អង្គការហាមឃាត់អាវុធគីមី មានសិទ្ធិត្រឹមបញ្ជាក់ឈ្មោះ អ្នកទទួលខុសត្រូវលើការប្រើអាវុធគីមី តែប៉ុណ្ណោះ ប៉ុន្តែ គ្មានសមត្ថភាពចូលទៅចាប់ខ្លួននោះទេ។ គឺសហគមន៍អន្តរជាតិ ឬអង្គការសហប្រជាជាតិ ដែលជាអ្នកអាចសម្រេចចិត្តបន្ទាប់មកទៀត ថា តើ ត្រូវចាត់ការយ៉ាងណា ទៅលើឧក្រិដ្ឋជន ដែលដៅឈ្មោះ ដោយអង្គការហាមឃាត់អាវុធគីមី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ