តួកគី៖ការបោះឆ្នោតសភា និងប្រធានាធិបតីដែលស្ថិតក្រោមការត្រួតពិនិត្យកម្រិតខ្ពស់
នៅក្នុងប្រទេសតួកគី ការរៀបចំបោះឆ្នោតសភា និងប្រធានាធិបតីមុនអាណត្តិបានចាប់ផ្តើមក្នុងថ្ងៃអាទិត្យ ទី២៤ មិថុនានេះ។ ការិយាល័យបោះឆ្នោតបានបើកទ្វារដើម្បីដើម្បីទទួលអ្នកបោះឆ្នោតប្រមាណជា ៥៦លាននាក់ ក្នុងនោះពាក់កណ្តាលមានអាយុក្រោម ៣០ឆ្នាំ។ សម្រាប់ការបោះឆ្នោតសភាត្រូវរៀបចំតែមួយលើក តែសម្រាប់ការបោះឆ្នោតជ្រើសរើសប្រធានាធិបតីថ្មីអាចមានពីរលើក ប្រសិនបើគ្មានបេក្ខជនណាមួយទទួលបានសម្លេងគាំទ្រលើសពី ៥០% ទេនោះ។ មានបេក្ខជនឈរឈ្មោះចំនួន ៦រូបសម្រាប់តំណែងប្រធានាធបតី តែមានបេក្ខជនចំនួនពីរនាក់ដែលកំពុងប្រជែងគ្នាខ្លាំង គឺលោកប្រធានាធិបតីផុតអាណត្តិអ៊ែរដូហ្កាន និងលោកអ៊ីនហ្សេមកពីបក្សប្រឆាំង គឺបក្សសាធារណរដ្ឋនៃប្រជាជន។ អ្វីជាក្តីបារម្ភរបស់ក្រុមបក្សប្រឆាំង គឺការលួចបន្លំសន្លឹកឆ្នោត។ លោកអាម៉េត អ៊ីនសែល អ្នកជំនាញផ្នែកវិទ្យាសាស្រ្តនយោបាយ និងសេដ្ឋវិទូតួកគីបានរៀបរាប់ពីវិធានការរបស់បក្សប្រឆាំងក្នុងការកែនប្រមូលអ្នកបោះឆ្នោតឲ្យខ្លួន និងការទប់ស្កាត់ការលួចបន្លំសន្លឹកឆ្នោត។
ចុះផ្សាយនៅថ្ងៃ៖
ស្តាប់ - ០១:៤៩
« អស់ លោកដឹងទេថានៅក្នុងការបោះឆ្នោត ជំហានទី១ សម្រាប់ក្រុមគណបក្សប្រឆាំង គឺត្រូវធ្វើយ៉ាងណាកែនប្រមូលអ្នកបោះឆ្នោតខ្លួនឲ្យបានច្រើន និងឲ្យមានការទម្លាក់សន្លឹកឆ្នោតច្រើនបំផុតនៅក្នុងហិបឆ្នោត។ នេះជារឿងចំាបាច់ដែលត្រូវធ្វើមុនគេ ហើយពួកគេបានធ្វើការងារនេះយ៉ាងលំបាកលំបិននៅក្នុងយុទ្ធនាការឃោសនាបោះឆ្នោតនា ៤សប្តាហ៍ចុងក្រោយនេះ។
បន្ទាប់មកនៅក្នុងជំហានទី២ សន្លឹកឆ្នោតទាំងអស់ដែលមាននៅក្នុងហិបឆ្នោតនឹងត្រូវយកចេញទៅរាប់ដោយមានការត្រួតពិនិត្យយ៉ាងម៉ត់ចត់ និងត្រឹមត្រូវជាទីបំផុតនៅយប់ក្រោយការបិទការិយាល័យបោះឆ្នោត។ នៅក្នុងន័យនេះ បក្សប្រឆាំងទាំង ៥គណបក្ស ក្នុងនោះមានទាំងគណបក្សសាធារណរដ្ឋនៃប្រជាជនរបស់លោកអ៊ីនហ្សេផងបានបង្កើតឲ្យមានវេទិកានៃការតាមដានការបោះឆ្នោត។
ចាប់ពីពេលចាក់សោរបិទហិបឆ្នោតភ្លាម វេទិកានៃការតាមដានការបោះឆ្នោតនឹងតាមឃ្លាំមើល និងប្រមែប្រមូលគ្រប់ព័ត៌មានទាក់ទងនឹងហិបឆ្នោតទាំង ១៦៣ ០០០ហិបឆ្នោតនៅទូទាំងប្រទេសតួកគី។ ក្រុមសកម្មជន និងក្រុមអ្នកតំណាងបក្សប្រឆាំងដែលមានវត្តមាននៅតាមការិយាល័យបោះឆ្នោតនីមួយៗនឹងបញ្ជូនព័ត៌មានរបស់ពួកគេទៅឲ្យវេទិកានៃការតាមដានការបោះឆ្នោត។
ការធ្វើយ៉ាងនេះ គឺដើម្បីទប់សា្កត់ការលួចបន្លំសន្លឹកឆ្នោត ពោលកុំឲ្យមានការចម្លងក្លែងក្លាយ ចម្លងខុស ឬការក្លែងបន្លំដោយមានការរៀបចំទុកមុន។ គឺជាវិធានការលើកទី១ នៅតួកគី »
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ