ភាពប្រេះឆាក្នុងចំណោមក្រុមប្រទេសមហាអំណាចឧស្សាហកម្ម G7
ចុះផ្សាយនៅថ្ងៃ៖
ស្តាប់ - ០៨:២៣
ជំនួបកំពូលក្រុមប្រទេសមហាអំណាចឧស្សាហកម្ម ហ្សេ ៧ បានបិទបញ្ចប់ ទៅនៅយប់ថ្ងៃសៅរ៍ម្សិលមិញ ជាមួយ នឹងភាពប្រេះឆា យ៉ាងច្បាស់ក្រឡែត រវាង អាមេរិក ហើយនិងក្រុមប្រទេសសម្ព័ន្ធមិត្តអឺរ៉ុប។ នៅប៉ុន្មានម៉ោងក្រោយការចេញផ្សាយសេចក្តីថ្លែងការណ៍រួមរបស់ក្រុមប្រទេសហ្សេ ៧ ដែលមានអាមេរិកផងដែរនោះ លោកដូណាល់ ត្រាំ តាំងពីក្នុងយន្តហោះ ដឹកលោកទៅប្រទេសសិង្ហបុរី ដើម្បី ជួបលោកគីម ជុងអ៊ុន បានសរសេរសារ Twitter បញ្ជាឲ្យដកអាមេរិក ឲ្យលែងគាំទ្រ សេចក្តីថ្លែងការណ៍រួម និងគំរាមដំឡើងពន្ធលើរថយន្តនាំចូលអាមេរិក។
ជំនួបកំពូលក្រុមប្រទេសមហាឧស្សាហកម្ម ដែលតំណាងឲ្យទ្រព្យធន ៦០ភាគរយនៃភពផែនដី បានបិទបញ្ចប់ទៅនៅថ្ងៃសៅរ៍ម្សិលមិញ ជាមួយ ភាពប្រេះឆា នៅទីបំផុត រវាងក្រុមប្រទេសសមាជិក។ លោកប្រធានាធិបតី អាមេរិក ដូណាល់ ត្រាំ ដើមឡើយ បានចុះហត្ថលេខាលើសេចក្តីថ្លែងការណ៍រួមរបស់ជំនួបកំពូលហ្សេ ៧ ដែលមាននិយាយពីការដោះដូរពាណិជ្ជកម្មសេរី ស្មើភាព និងផ្តល់ផលប្រយោជន៍ឲ្យគ្នាទៅវិញទៅមក។ ប៉ុន្តែ នៅប៉ុន្មានម៉ោងក្រោយ លោកដូណាល់ ត្រាំ តាំងពីក្នុងយន្តហោះ បានសរសេរសារ Twitter ដកអាមេរិកចេញ ពីសេចក្តីថ្លែងការណ៍វិញ និងទាំងគំរាមទៀតផង ថា នឹងដំឡើងពន្ធថ្មី លើរថយន្តនាំចូលអាមេរិក។
នយោបាយត្រជាក់ ក្តៅ របស់ប្រធានាធិបតី អាមេរិក ធ្វើឲ្យគេមិនអាចស្មានដឹងជាមុន។ លោកដូណាល់ ត្រាំ បានចាកចេញមុនទាំងជំនួបកំពូល ហ្សេ ៧ បិទបញ្ចប់ ទៅទៀត ពោលគឺលោកបានគេចមិនចូលរួម ក្នុងកិច្ចប្រជុំដែលបន្តផ្តោតទៅលើបញ្ហាអាកាសធាតុ និងការអប់រំ ភាពស្មើភាព រវាងបុរសនិងស្រ្តីនោះទេ។ នៅក្នុងសន្និសីទកាសែត នៅថ្ងៃសៅរ៍ នៅមុនពេលចាកចេញ ពីកាណាដា សំដៅ ប្រទេសសិង្ហបុរី ជាទីដែលលោកត្រូវបើកជំនួបកំពូលជាមួយមេដឹកនាំកូរ៉េខាងជើង លោកដូណាល់ ត្រាំ បាននិយាយថា ការពិភាក្សា ជាមួយមេដឹកនាំរបស់ក្រុមប្រទេសមហាអំណាចឧស្សាហកម្មផ្សេងទៀត បានប្រព្រឹត្តទៅដោយរលូន និងវិជ្ជមាន។ ប៉ុន្តែ នៅប៉ុន្មានម៉ោងក្រោយចេញសេចក្តីថ្លែងការណ៍រួម របស់ជំនួបកំពូល លោកដូណាល់ ត្រាំ បែរជាប្តូរចិត្ត និងប្រកាសដកអាមេរិកចេញពីសេចក្តីថ្លែងការណ៍រួមរបស់ហ្សេ ៧ ឆ្នាំនេះវិញ។ ប្រធានាធិបតី អាមេរិកនៅបានគំរាមថា រដ្ឋបាលរបស់លោកនឹងពិចារណាលើតម្លៃពន្ធលើរថយន្តដែលនាំចូលទៅក្នុងទឹកដីអាមេរិកបន្ថែមទៀត។
មូលហេតុគឺលោកខឹង មិនពេញចិត្តនឹងការថ្លែងរបស់នាយករដ្ឋមន្រ្តីកាណាដា Justine Trudeau។ នៅក្នុងសន្និសីទកាសែត នៅពេលបិទបញ្ចប់ជំនួបកំពូល នៅថ្ងៃម្សិលមិញ លោកនាយករដ្ឋមន្រ្តីកាណាដា បានលើកឡើងថា ការយកលេសរបស់អាមេរិកដែលថា ដំឡើងពន្ធ លើដែកថែប និងអាលុយមីញ៉ូម នាំចូលទៅអាមេរិក គឺធ្វើឡើងដើម្បីហេតុផលសន្តិសុខជាតិ នោះ គឺប្រៀបដូចជា ការជេរប្រមាថដល់ទាហានកាណាដា ដែលធ្លាប់បានចូលរួមប្រយុទ្ធជួយ កងទ័ពអាមេរិករហូតមក។ កាណាដា ក៏ដូចជាប្រទេសនៅសហភាពអឺរ៉ុប ហើយនិងម៉ិចស៊ិក រងប៉ះពាល់ ខ្លាំង ជាងគេ ដោយសារតែនយោបាយដំឡើងពន្ធរបស់អាមេរិក លើដែកថែប និងអាលុយមីញ៉ូម ដែលចាប់អនុវត្តតាំងពីដើមខែមិថុនានេះ។ កាណាដាបានព្រមានចាត់វិធានការ ប្រឆាំងតបតនឹងអាមេរិក វិញ ចាប់ពីខែកក្កដាខាងមុខ។
នៅក្នុងសន្និសីទ កាសែត នៅកាណាដា លោកដូណាល់ ត្រាំធ្លាប់បាននិយាយព្រមានរួចហើយ មិនឲ្យក្រុមប្រទេសផ្សេង ចាត់វិធានការប្រឆាំងតបតនឹងការដំឡើងពន្ធរបស់អាមេរិកនោះទេ។ នៅក្នុងសារ Twitter លោកដូណាល់ ត្រាំ មិនត្រឹមតែនិយាយចំអកឲ្យនាយករដ្ឋមន្រ្តីកាណាដាតែប៉ុណ្ណោះទេ ប៉ុន្តែ នៅ បានជេរប្រមាថមេដឹកនាំរបស់សម្ព័ន្ធមិត្តអាមេរិកថា ជាមនុស្សមិនស្មោះត្រង់ និងទន់ជ្រាយទៀតផង។
នយោបាយសេដ្ឋកិច្ចពាណិជ្ជកម្មអាត្មានិយមរបស់លោកដូណាល់ ត្រាំ បានធ្វើឲ្យអាមេរិកនៅឯកា
ចាប់តាំងពីអាមេរិក មានលោកដូណាល់ ត្រាំ ធ្វើជាប្រធានាធិបតី ជំនួបកំពូលហ្សេ ៧ នៅកាណាដា ក៏ដូចជាជំនួបកំពូលហ្សេ ៧ នៅអ៊ីតាលី នៅឆ្នាំមុន ឬក៏ដូចជំនួបហ្សេ ២០ នៅប្រទេសអាល្លឺម៉ង់ គឺគ្មានសេចក្តីថ្លែងការណ៍រួម ដែលរឹងមាំបង្ហាញពីភាពចុះសម្រុងគ្នា រវាងក្រុមប្រទេសមហាអំណាចលោកខាងលិចនោះទេ។ ធ្លាប់ជាមហាសេដ្ឋី អចលទ្រព្យ លោកដូណាល់ ត្រាំ គិតដល់រឿងប្រយោជន៍សេដ្ឋកិច្ច មុន ហេតុផលនយោបាយការបរទេស។ បន្ទាប់ពីចិន លោកដូណាល់ ត្រាំ បានបែរមករករឿង សូម្បី កាណាដា ម៉ិចស៊ិក និងប្រទេសនៅសហភាពអឺរ៉ុប ដែលតាមពិតជាសម្ព័ន្ធមិត្តរបស់អាមេរិក ដូចបាននិយាយ។ លោកត្រាំ បានសម្រេចឲ្យគេដំឡើងពន្ធ២៥ភាគរយ លើដែកថែប ដែលនាំចូលពីអឺរ៉ុប កាណដា និងម៉ិចស៊ិក។ ជំនួបកំពូលហ្សេ ៧ លើកនេះ កត់សំគាល់ ដោយសារការខ្វែងគំនិតគ្នា លើការដំឡើងពន្ធគយនេះតែម្តង។
នៅក្នុងសន្និសីទកាសែតនៅថ្ងៃសៅរ៍ លោកដូណាល់ ត្រាំ បាននិយាយថា អាមេរិកធ្លាប់ចាញ់ប្រៀប ក្នុងការដោះដូរពាណិជ្ជកម្មជាមួយប្រទេសដទៃ (មិនថា សម្ព័ន្ធមិត្ត ឬគូប្រជែង)និងត្រូវបានគេចាត់ទុកជាកូនជ្រូក សន្សំលុយ ដែលគេ លួចកេងប្រយោជន៍រហូតមក។ ដោយនិយាយសំដៅដល់កាណាដា ប្រទេសជិតខាងរបស់អាមេរិកតែម្តង លោកដូណាល់ត្រាំ បាននិយាយថា ការដំឡើងពន្ធរបស់កាណាដា លើទឹកដោះគោអាមេរិក ដល់ទៅ២៥០ភាគរយ បានសម្លាប់ការងារ និងកសិដ្ឋានរបស់អាមេរិក រហូតមក។ លោកបាន គំរាមរួចហើយថា បើសិនជា ប្រទេសផ្សេង ដំឡើងពន្ធគយ ដាក់របាំងពន្ធបន្ថែមលើផលិតផលអាមេរិក នោះលោកក៏មិនអល់អែក ដើម្បីឈប់ធ្វើពាណិជ្ជកម្មជាមួយប្រទេសទាំងនោះទេដែរ។
ដោយសារលោកដូណាល់ ត្រាំ ជំនួបកំពូល ក្រុមប្រទេសមហាអំណាចឧស្សាហកម្ម បានបិទបញ្ចប់ទៅជាមួយនឹងការបែកបាក់គ្នា គឺផ្ទុយស្រឡះពីជំនួបកំពូលស្តីពីប្រតិបត្តិការសន្តិសុខសៀងហៃ ដែលប្រទេសចិន កំពុងរៀបចំ នៅចំពេលជាមួយគ្នានឹងហ្សេ ៧។ ប្រទេសចិន ដែលជាម្ចាស់ផ្ទះ បានប្រមូលផ្តុំ ក្រុមប្រទេស ដែលជាគូសត្រូវ ឬគូប្រជែងរបស់ក្រុមប្រទេសហ្សេ ៧ ដូចជា រុស្ស៊ី អ៊ីរ៉ង់ បានបង្ហាញពីការចុះសម្រុង ល្អូកល្អឺននឹងគ្នាខ្លាំងណាស់។ យ៉ាងណាក៏ដោយ ដូចមេដឹកនាំរបស់ក្រុមប្រទេសហ្សេ ៦ ប្រធានាធិបតីចិន យល់ស្របថា គេត្រូវគោរព ច្បាប់របស់អង្គការពាណិជ្ជកម្មពិភពលោក ដើម្បី បើកសេដ្ឋកិច្ចពិភពលោក គឺមិនត្រូវ អនុវត្តនយោបាយ បិទទ្វារ អត្មានិយមនោះទេ។
លោកដូណាល់ ត្រាំ ព្រមានដំឡើងពន្ធលើរថយន្តនាំចូលទៅទឹកដីអាមេរិក
នៅក្នុងសន្និសីទកាសែត នៅថ្ងៃសៅរ៍ លោកដូណាល់ ត្រាំ បានបញ្ជាក់សាជាថ្មីថា បើសិន ជាសង្រ្គាមពាណិជ្ជកម្មផ្ទុះឡើង នោះ អាមេរិកប្រាកដជាឈ្នះរាប់ពាន់ដង។ នៅថ្ងៃម្សិលមិញ នៅក្រោយលោកនាយករដ្ឋមន្រ្តីកាណាដា ព្រមានពីគម្រោងដំឡើងពន្ធ ដើម្បីប្រឆាំងតបនឹងអាមេរិក ចាប់ពីខែកក្កដា លោកដូណាល់ ត្រាំ បាននិយាយថា លោកនឹងពិចារណាលើតំលៃពន្ធលើរថយន្តនាំចូលទៅអាមេរិក។ គឺពន្ធលើតម្លៃរថយន្តនាំចូល ដែលជាសំណុំរឿងសំខាន់ រវាងលោកដូណាល់ ត្រាំ ដោយមេដឹកនាំរបស់ក្រុមប្រទេស ហ្សេ ៦ផ្សេងទៀត។ បើសិនរដ្ឋបាលលោកដូណាល់ ត្រាំ ដំឡើងពន្ធលើរថយន្តនាំចូលទៅអាមេរិក នោះ អ្នកដែលប៉ះពាល់ ខ្លាំងជាងគេ គឺ អាល្លឺម៉ង់ បន្ទាប់មក គឺជប៉ុន កាណាដា ម៉ិចស៊ិក និងចុងក្រោយ គឺកូរ៉េខាងត្បូង។ ត្រូវដឹងថា នៅឆ្នាំ ២០១៧ ក្នុងចំណោមរថយន្តប្រមាណ ១៧លានគ្រឿង លក់ដាច់ នៅទឹកដីអាមេរិក មានជាង ៨លានគ្រឿងទៅហើយ ជារថយន្តនាំចូល។ អាល្លឺម៉ង់ និងជប៉ុន ដែលនាំចូលរថយន្តច្រើនជាងគេទៅអាមេរិក អាចប៉ះពាល់ រងគ្រោះខ្លាំងជាងគេ បើសិនអាមេរិកដំឡើងពន្ធលើរថយន្តនាំចូលទៅអាមេរិក។ ប៉ុន្តែ ដោយសារតែ ក្រុមហ៊ុនផលិតរថយន្តអាល្លឺម៉ង់ Mercedes BMW ឬ Nissan Honda របស់ជប៉ុន គឺសុទ្ធតែមានរោងចក្រដំឡើង និងផលិតរថយន្ត នៅអាមេរិក ពោលគឺបានបង្កើតការងារធ្វើរាប់លានសម្រាប់ប្រជាជនអាមេរិក អាមេរិករបស់លោកដូណាល់ ត្រាំ ក៏អាចបាត់បង់អត្ថប្រយោជន៍ដែរ។ ជាការពិត របាំងពន្ធគយរបស់លោកដូណាល់ ត្រាំ ធ្វើឡើងដើម្បីជំរុញ ការផលិតក្នុងស្រុកអាមេរិក ប៉ុន្តែ ជាមួយគ្នានោះ ក៏អាចសម្លាប់ការងាររបស់ប្រជាជនអាមេរិក ដែរ ព្រោះថា ក្រុមហ៊ុនផលិតរថយន្តរបស់អាល្លឺម៉ង់ ឬជប៉ុន អាចនឹងប្តូរទីតាំង និងបិទរោងចក្រនៅក្នុងទឹកដីអាមេរិក បើសិនអាមេរិកធ្វើសង្រ្គាមពាណិជ្ជកម្មជាមួយប្រទេសដទៃនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ