អ៊ីស្រាអែល៖លោកនេតាន់យ៉ាហ៊ូផ្តើមទស្សនកិច្ចក្នុងប្រទេសហត្ថលេខីនៃកិច្ចព្រមព្រៀងនុយក្លេអ៊ែរអ៊ីរ៉ង់
នៅថ្ងៃចន្ទ ទី៤ មិថុនានេះ លោកនាយករដ្ឋមន្រ្តីអ៊ីស្រាអែលនេតាន់យ៉ាហ៊ូផ្តើមទស្សនកិច្ចមួយជុំទ្វីបអឺរ៉ុបក្នុង៣ប្រទេស គឺអាល្លឺម៉ង់ បារាំង និងប្រទេសអង់គ្លេស។ មានសំណុំរឿងសំខាន់ចំនួន ៣ ដែលលោកនេតាន់យ៉ាហ៊ូលើកទៅជជែកជាមួយថ្នាក់ដឹកនាំទាំង ៣ប្រទេស ទី១ កិច្ចព្រមព្រៀងនុយក្លេអ៊ែរអ៊ីរ៉ង់ ទី២ វិបត្តិក្នុងប្រទេសស៊ីរី និងទី៣ អំពើហិង្សាថ្មីៗនៅតាមព្រំដែនរវាងតំបន់ហ្កាហ្សាក្នុងទឹកដីប៉ាឡេស្ទីន និងប្រទេសអ៊ីស្រាអែល។
ចុះផ្សាយនៅថ្ងៃ៖
ស្តាប់ - ០១:៥៧
ជម្រើសទៅកាន់ប្រទេសអាល្លឺម៉ង់ បារាំង និងអង់គ្លេសរបស់លោកប្រមុខរដ្ឋាភិបាលអ៊ីស្រាអែលនេតាន់យ៉ាហ៊ូពេលនេះមិនមែនជាជម្រើសចៃដន្យទេ មិនចៃដន្យព្រោះជាក្រុមប្រទេសហត្ថលេខីនៃកិច្ចព្រមព្រៀងនុយក្លេអ៊ែរអ៊ីរ៉ង់ចុះហត្ថលេខាកាលពីពាក់កណ្តាលខែកក្កដា ឆ្នាំ ២០១៥។ គោលដៅរបស់លោកនេតាន់យ៉ាហ៊ូ គឺបញ្ចុះបញ្ចូលថ្នាក់ដឹកនាំអាល្លឺម៉ង់ បារាំង និងអង់គ្លេសឲ្យពិនិត្យមើលឡើងវិញលើជំហររបស់ពួកគេចំពោះកិច្ចព្រមព្រៀងនុយក្លេអ៊ែរអ៊ីរ៉ង់នោះ។ កិច្ចព្រមព្រៀងដែលអាមេរិកជំនាន់លោកដូណាល់ ត្រាំបានសម្រេចដកខ្លួនកាលពីថ្ងៃទី៨ ឧសភា និងដែលលោកនេតាន់យ៉ាហ៊ូចង់ឲ្យប្រទេសហត្ថលេខីផ្សេងធ្វើដូចគ្នា។
« ខ្ញុំនឹងបង្ហាញពីមធ្យោបាយដើម្បីទប់ស្កាត់មហិច្ឆតានុយក្លេអ៊ែរ និងការពង្រីកឥទ្ធិពលរបស់អ៊ីរ៉ង់នៅមជ្ឈិមបូព៌ា និងបន្ថែមថា រឿងទាំងអស់នេះពិតជាសំខាន់ខ្លាំងណាស់សម្រាប់សន្តិសុខអ៊ីស្រាអែល » នេះជាការបញ្ជាក់របស់លោកនេតាន់យ៉ាហ៊ូ។ សូមជម្រាបជូនថា ក្រោយពីអាមេរិកបានដកខ្លួនចេញពីកិច្ចព្រមព្រៀង ប្រទេសហត្ថលេខីផ្សេងទៀត មានបារាំង អាល្លឺម៉ង់ អង់គ្លេស រុស្ស៊ី និងចិនបានចេញមុខការពារ និងរក្សាទុកកិច្ចព្រមព្រៀងដែលមានស្រាប់ ព្រមទាំងបាននិយាយបញ្ចុះបញ្ចូលភាគីអ៊ីរ៉ង់ឲ្យរក្សាទុកកិច្ចព្រមព្រៀងនោះ។
ក្រុមប្រទេសហត្ថលេខីផ្សេង ពិសេសអឺរ៉ុបក៏បានយល់ឃើញដូចអាមេរិក និងអ៊ីស្រាអែលដែលថា អ៊ីរ៉ង់កំពុងបន្តអភិវឌ្ឍន៍កម្មវិធីគ្រាប់មីស៊ីលបាលីស្ទីក និងកំពុងបន្តពង្រីកឥទ្ធិពលរបស់ខ្លួននៅក្នុងតំបន់មជ្ឈិមបូព៌ា ដូចយ៉ាងលូកដៃទៅក្នុងវិបត្តិស៊ីរី លីបង់ ឬយេម៉ែនជាដើម។ តែទីក្រុងប៉ារីស ប៊ែរឡាំង និងឡុងដ៏បានស្នើឲ្យលើកយកបញ្ហាទាំងនេះទៅជជែកដាច់ដោយឡែកពីគ្នា ពោលមិនគួរឡូកឡំនឹងកិច្ចព្រមព្រៀងដែលមានស្រាប់នោះឡើយ។ ក្រៅពីបញ្ហាអ៊ីរ៉ង់ ក៏នៅមានជម្លោះប៉ាឡេស្ទីន អ៊ីស្រាអែល ពិសេសអំពើហិង្សានាប៉ុន្មានសប្តាហ៍កន្លងទៅនៅតាមព្រំដែនរវាងតំបន់ហ្កាហ្សាក្នុងទឹកដីប៉ាឡេស្ទីន និងប្រទេសអ៊ីស្រាអែល។
ទាក់ទងនឹងកិច្ចព្រមព្រៀងនុយក្លេអ៊ែរអ៊ីរ៉ង់ចុះហត្ថលេខាឆ្នាំ ២០១៥ ដដែល ក្រុមប្រឹក្សារដ្ឋបាលនៃទីភ្នាក់ងារថាមពលបរមាណូអន្តរជាតិ AIEA បើកកិច្ចប្រជុំរយៈពេល ៤ថ្ងៃដោយចាប់ផ្តើមក្នុងថ្ងៃចន្ទ ទី៤ មិថុនាក្នុងទីក្រុងវីយែន ប្រទេសអូទ្រីស។ កម្មវត្ថុនៃកិច្ចប្រជុំ គឺសិក្សាលើរបាយការណ៍ចុងក្រោយរបស់ AIEA ស្តីពីការអនុវត្តលើកិច្ចព្រមព្រៀងពីសំណាក់អ៊ីរ៉ង់។ តាមព័ត៌មានដែលទទួលបាន AIEA បញ្ជាក់ពីការដែលទីក្រុងតេហេរ៉ង់បានគោរពត្រឹមត្រូវតាមពាក្យសន្យារបស់ខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ