សហភាពអឺរ៉ុប រួបរួមគ្នាប្រយុទ្ធប្រឆាំងនឹងការតំឡើងពន្ឋរបស់អាមេរិក
គ្មានការលើកលែងឡើយចំពោះសហភាពអឺរ៉ុប ក្នុងការដំឡើងពន្ធនាំចូលលើដែកថែប និងអាលុយមីញ៉ូម ពីសំណាក់រដ្ឋាភិបាលអាមេរិក ដឹកនាំដោយលោកប្រធានាធិបតី ដូណាល់ត្រាំ។ ក្រោយពីក្រុងវ៉ាស៊ីនតោន ប្រកាសដំឡើងពន្ឋនេះភ្លាម ប្រទេសសហភាពអឺរ៉ុបបានក្រោកឈររួមគ្នាជាមួយកាណាដា និងម៉ិចស៊ីកូ ប្រឆាំងតវ៉ា និងរិះរកមធ្យោបាយដើម្បីតបតរ ប្រឆាំងទៅនឹងការសម្រចរបស់សហរដ្ឋអាមេរិក ដែលមាននយោបាយគិតពីប្រយោជន៍ខ្លួនជាអាទិភាពបែបនេះ។
ចុះផ្សាយនៅថ្ងៃ៖ កែប្រែថ្ងៃទី៖
កាលពីថ្ងៃសុក្រម្សិលមិញ បណ្តាប្រទេសសហភាពអឺរ៉ុប បានចាប់ផ្តើមការប្រជុំជាមួយគ្នាជាលើកដំបូង ដើម្បីស្វែងរកយុទ្ឋសាស្ត្រ ប្រឆាំងទៅនឹងសហរដ្ឋអាមេរិក ដែលទើបតែប្រកាសដំឡើងពន្ធ លើផលិតផលដែកថែបចំនួន ២៥% និង ១០% លើផលិតអាលុយមីញ៉ូម របស់អឺរ៉ុប កាណាដា ព្រមទាំងម៉ិចស៊ីកូដែលនាំចូលអាមេរិក។
មួយថ្ងៃបន្ទាប់ពីការប្រកាសដំឡើងពន្ឋរបស់អាមេរិក នាយករដ្ឋមន្ត្រីកាណាដា លោក Justin Trudeauបាននិយាយថាមិនគួរមានរឿងបែបនេះឡើយ រវាងប្រទេសទាំងពីរដែលធ្លាប់តែជាសម្ព័ន្ឋមិត្តល្អនឹងគ្នា។ សម្រាប់លោក Justin Trudeau ទង្វើរបស់អាមេរិកគឺជាការប្រមាថមួយដែលមិនអាចទទួលយកបានឡើយ។
ស្រដៀងគ្នានេះដែរ នាយករដ្ឋមន្ត្រីអង់គ្លេសលោកស្រី Theresa May បានបង្ហាញការអាក់អន់ស្រពន់ចិត្តជាខ្លាំង ហើយលោកស្រីបានក្រើនរំឭកសហរដ្ឋអាមេរិក ឲ្យដកចេញវិញ នូវនយោបាយដំឡើងពន្ឋដ៏អយុត្តិធម៌នេះ។
ដើម្បីផ្តល់ជាមេរៀនក្តៅដល់លោកត្រាំ បច្ចុប្បន្ននេះ សហភាពអឺរ៉ុប កំពុងដុតដៃដុតជើង ដំឡើងពន្ឋលើផលិតផលអាមេរិកនាំចូលអឺរ៉ុបវិញដែលក្នុងនោះរួមមាន ផលិតផលស្រា ម៉ូតូនិងខខូវប៊យ ដែលមានតម្លៃរហូតដល់ទៅជាង ៣ ពាន់លានដុល្លារ។
ពាក់ព័ន្ឋបញ្ហានេះដែរ រដ្ឋមន្រ្តីជប៉ុនក៏បានលើកឡើងផងដែរថា គោលនយោបាយគិតពីខ្លួនឯងខ្លាំងរបស់លោកត្រាំ អាចបង្កជាហានិភ័យដែលបណ្តាលឱ្យការលក់ផលិតផលរបស់អាមេរិកធ្លាក់ចុះ ហើយឱនភាពពាណិជ្ជកម្មអាមេរិកក៏កាន់តែរីកធំឡើងដែរ។
គួររំឭកថា សហរដ្ឋអាមេរិក បានសម្រេចដំឡើងពន្ឋលើដែកថែប ២៥% និង ១០% លើផលិតអាលុយមីញ៉ូម កាលពីថ្ងៃទី ៣១ ខែ ឧសភា។ ហើយការប្រកាសរបស់អាមេរិកនេះ បានជំរុញឲ្យកិច្ចប្រជុំរវាងប្រទេសមហាអំណាចឧស្សាហកម្ម G7 ចំនួនប្រាំពីរ រួមមាន បារាំង អាមេរិក អាល្លឺម៉ង់ កាណាដា អ៊ីតាលី ជប៉ុន និងប្រទេសអង់គ្លេស ដែលរៀបចំនៅប្រទេសកាណាដា ចន្លោះថ្ងៃទី៣១ ឧសភា ដល់ថ្ងៃ ទី២មិថុនាប្រព្រឹត្តិទៅក្នុងបរិយាកាសអាប់អួរជាទីបំផុត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ