មេដឹកនាំតំបន់កាតាឡូញ៉ា ស្នើសុំជួបចចារជាមួយនាយករដ្ឋមន្ត្រីថ្មីអេស្ប៉ាញ
នៅថ្ងៃសៅរ៍ ទី២ មិថុនា មេដឹកនាំតំបន់កាតាឡូញ៉ា គឺលោកគីម តូរ៉ា បានធ្វើការស្នើសុំជួបជាមួយនឹងនាយករដ្ឋមន្ត្រីអេស្ប៉ាញ ដែលទើបតែបានឡើងកាន់ដំណែងបានមួយថ្ងៃ។ ការសុំជួបនេះ គឺដើម្បីជជែកពិភាក្សាជាមួយលោក ប៉េដ្រូ សង់ឆេរ ទាក់ទងនឹងឯករាជ្យភាពរបស់តំបន់កាតាឡូញ៉ា ក្រោមការគ្រប់គ្រងរបស់រដ្ឋាភិបាលអេស្ប៉ាញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៨
ត្រឹមតែរយៈពេល មួយថ្ងៃ ប៉ុណ្ណោះបន្ទាប់ពីលោកប៉េដ្រូសង់ឆេរបានស្បថចូលកាន់មុខដំណែងជានាយករដ្ឋមន្ត្រីថ្មីអេស្ប៉ាញរួមមកមេដឹកនាំតំបន់កាតាឡូញ៉ាបានសុំជួបពិភាក្សាជាមួយលោកភ្លាមៗតែម្តង។មេដឹកនាំតំបន់កាតាឡូញ៉ាបានសង្កត់ធ្ងន់ថាលោកនាយករដ្ឋមន្ត្រីប៉េដ្រូនិងរូបលោកផ្ទាល់ត្រូវនិយាយគ្នាដើម្បីដោះស្រាយបញ្ហា។
គួរបញ្ជាក់ថាកាលពីសប្តាហ៍ទី២នៃខែឧសភាឆ្នាំ២០១៨ លោក គីម តូរ៉ា ត្រូវបានសភានៃតំបន់ស្វយ័តកាតាឡូញ៉ាបោះឆ្នោតឲ្យកាន់ដំណែងជាមេដឹកនាំតំបន់ជំនួសលោក Carles Puigdemont ដែលបានលាលែង និងកំពុងភៀសខ្លួនក្នុងប្រទេសអាល្លឺម៉ង់។ ក្រោយក្លាយជាមេដឹកនាំតំបន់លោកគីម តូរ៉ា បានសន្យាកសាងសាធារណរដ្ឋកាតាឡូញ៉ាមួយ ប្រកបដោយសន្តិវិធីជាមួយរដ្ឋាភិបាលទីក្រុងម៉ាឌ្រីដ។
ដោយឡែក នាយករដ្ឋមន្ត្រីថ្មីអេស្ប៉ាញលោកប៉េដ្រូ សង់ឆេរ ជាសេដ្ឋវិទូមានវ័យ៤៦ឆ្នាំក៏ជាមេដឹកនាំម្នាក់ ដែលប្រឆាំងចំពោះការទាមទារផ្តាច់ខ្លួនរបស់តំបន់កាតាឡូញ៉ាដែរ។ តែទោះជាយ៉ាងណាក្តី លោក សង់ឆេរ បានសន្យាថានឹងព្យាយាមដោះស្រាយវិបត្តិនេះជាមួយរដ្ឋាភិបាលកាតាឡូញ៉ាឲ្យខានតែបានដោយការចចារ។
បច្ចុប្បន្ននេះ វិបិត្តិនៃការទាមទារផ្តាច់ខ្លួនតំបន់កាតាឡូញ៉ា ក្នុងប្រទេសអេស្ប៉ាញ បានវិលមករកភាពធូរស្រាលវិញហើយ បន្ទាប់ពីមេដឹកនាំថ្មីរបស់តំបន់កាតាឡូញ៉ា ក៏ដូចនាយករដ្ឋមន្ត្រីថ្មីអេស្ប៉ាញសុទ្ឋសឹងតែបានបង្ហាញជំហរចង់ចូលតុចចារដើម្បីដោះស្រាយវិបត្តិដ៏ធំមួយនេះ។
សូមជម្រាបថា ទោះជាស្ថានការណ៍ក្នុងប្រទេសបានវិលមករកភាពល្អប្រសើរវិញក្តី ក៏លោកCarles Puigdemont អតីតមេដឹកនាំចលនាទាមទារឯករាជ្យកាតាឡូញ៉ា ដែលកំពុងភៀសខ្លួនរស់ក្នុងប្រទេសអាល្លឺម៉ង់ នៅតែប្រឈមមុខនឹងការជាប់ពន្ធនាគារ ដោយសារការចោទប្រកាន់ពីសំណាក់រដ្ឋាភិបាលទីក្រុងម៉ាឌ្រីដពីបទ បះបោរផ្តាច់ទឹកដី និងប្រើប្រាស់ថវិការសាធារណៈ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ