បែលហ្ស៊ិក៖បុរសម្នាក់បានបាញ់សម្លាប់មនុស្ស ៣នាក់ មុននឹងត្រូវប៉ូលិសបាញ់ស្លាប់វិញ
នៅក្នុងប្រទេសបែលហ្ស៊ិក មានព្រឹត្តិការណ៍បាញ់ប្រហារមួយបានកើតឡើងនៅព្រឹកថ្ងៃអង្គារ ទី២៩ ឧសភាក្នុងទីក្រុង Liège។ បុរសម្នាក់បានសម្លាប់មនុស្ស ៣នាក់ ក្នុងនោះមានស្រ្តីប៉ូលិស ២នាក់ និងស្រ្តីស៊ីវិលម្នាក់ រួចបានចាប់មនុស្សម្នាក់ធ្វើជាចំណាប់ខ្មាំង។ ក្រុមប៉ូលិសបានចុះទៅអន្តរាគមន៍ភ្លាមៗ រួមក៏បានបាញ់សម្លាប់រូបបុរសនោះ។ សំណុំរឿងមួយនេះត្រូវបានប្រគល់ទៅឲ្យក្រុមចៅក្រមស៊ើបអង្កេតផ្នែកប្រឆាំងភេរវនិយម។ ព្រះរាជអាជ្ញាទីក្រុង Liège លោក Philippe Dulieu បានចាត់ទុកទង្វើរបស់ជនដៃថាជាទង្វើភេរវនិយម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៧
ព្រឹត្តិការណ៍មួយនេះបានមានឡើងនៅវេលាម៉ោងជិត ១០ និង ៣០នាទី ម៉ោងក្នុងប្រទេសបែលហ្ស៊ិកក្នុងថ្ងៃអង្គារ ទី២៩ ឧសភា។ មុនដំបូង បុរសជនដៃដល់បានប្រើកាំបិតដេញចាក់ប៉ូលិសស្រ្តីចំនួនពីរនាក់ពីក្រោយខ្នង។ បន្ទាប់មក រូបបុរសខ្មាន់កាំបិតនោះក៏បានហក់ទៅដណ្តើមអាវុធពីប៉ូលិសស្រ្តីទាំងពីរ រួចបាញ់សម្លាប់ចោលតែម្តង។ បន្ទាប់មកទៀត បុរសរូបនេះដដែលក៏បានដើរសំដៅទៅកាន់រថយន្តមួយដែលចតតាមផ្លូវ ហើយក៏លើកកាំភ្លើងបាញ់សម្លាប់មនុស្សម្នាក់ទៀតដែលជាបុរសវ័យក្មេងអាយុ ២២ឆ្នាំស្ថិតក្នុងរថយន្តនោះ។ ក្រោយមកទៀត បុរសខ្មាន់កាំភ្លើងរូបនេះដដែលក៏បានរត់គេចខ្លួនទៅពួនក្នុងវិទ្យាល័យមួយ ហើយបានចាប់ស្រ្តីអ្នកបោសសំអាតម្នាក់ធ្វើជាចំណាប់ខ្មាំង។
នៅពេលដែលកម្លាំងប៉ូលិសចុះអន្តរាគមន៍ក្បែរវិទ្យាល័យនោះ បុរសខ្មាន់កាំភ្លើងក៏បានចេញក្រៅដើម្បីធ្វើការបាញ់តទល់នឹងប៉ូលិសដោយបណ្តាលឲ្យរបួសប៉ូលិសជាច្រើននាក់ មុននឹងត្រូវបានប៉ូលិសបាញ់សម្លាប់នៅនឹងកន្លែង។ ចំណែកនៅក្នុងវិទ្យាល័យ សិស្សសាលាទាំងអស់ត្រូវបានដាក់នៅកន្លែងមានសុវត្ថិភាព ហើយគ្មានសិស្សសាលាណាម្នាក់រងរបួសទេ។ ការស៊ើបអង្កេតត្រូវបានប្រគល់ទៅឲ្យក្រុមចៅក្រមផ្នែកប្រឆាំងភេរវនិយម។ តាមព្រះរាជអាជ្ញាទីក្រុង Liège នេះជាទង្វើភេរវនិយម។ ចំណែកលោកនាយករដ្ឋមន្រ្តីបែលហ្ស៊ិក Charles Michel បានចាត់ទុកជាទង្វើដ៏កំសាក និងឆ្កួតលីលា។
ទាក់ទងនឹងបុរសជនដៃដល់ត្រូវបានរដ្ឋអំណាចប្រាប់ឲ្យដឹងពីអត្តសញ្ញាណដែលមានឈ្មោះ Benjamin Herman មានអាយុ ៣៦ឆ្នាំ កើតក្នុងប្រទេសបែលហ្ស៊ិក និងជាអ្នករស់នៅក្នុងទីក្រុង Liège នោះឯង។ តែអ្វីដែលកំពុងបង្កឲ្យមានរឿងអាស្រូវខ្លាំងពេលនេះគឺថា ជន Benjamin Herman ជាអ្នកទោសក្នុងបទល្មើសជាច្រើន រួមទាំងទោសរត់ពន្ធគ្រឿងញៀន ហើយទើបតែត្រូវបានដោះលែងឲ្យមានសេរីភាពស្ថិតក្រោមការតាមដានក្នុងថ្ងៃចន្ទ ទី២៨ ឧសភា ពោលមួយថ្ងៃមុនជនរូបនេះធ្វើសកម្មភាពភេរវនិយម។ តាមប្រភពជាច្រើនចុះផ្សាយដោយកាសែតនៅបែលហ្សិកឲ្យដឹងថា បុរសរូបនេះបានប្រែខ្លួនទៅជាអ្នកជ្រុលនិយមក្នុងពេលជាប់ឃុំនៅពន្ធនាគារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ