កិច្ចព្រមព្រៀងនុយក្លេអ៊ែរ៖អ៊ីរ៉ង់ចាត់ទុកកិច្ចខិតខំប្រឹងប្រែងរបស់អឺរ៉ុបនៅមិនទាន់គ្រប់គ្រាន់
នៅក្នុងប្រទេសអ៊ីរ៉ង់ លោកប្រមុខការទូតយ៉ាវ៉ាដ ហ្សារីហ្វបានយល់ឃើញថា កិច្ចខិតខំប្រឹងប្រែងរបស់សហភាពអឺរ៉ុបដើម្បីជួយស្រោចស្រង់កិច្ចព្រមព្រៀងនុយក្លេអ៊ែរអ៊ីរ៉ង់ឆ្នាំ ២០១៥ នៅមិនទាន់គ្រប់គ្រាន់នៅឡើយទេ។ កិច្ចព្រមព្រៀងដែលអាមេរិកទើបបានដកខ្លួនចេញកាលពីថ្ងៃទី៨ ឧសភា។ តាមលោកហ្សារីហ្វ អឺរ៉ុបគួរតែប្រឹងប្រែងឲ្យបានច្រើនជាងនេះ។ ការថ្លែងរបស់លោកហ្សារីហ្វបានធ្វើឡើង ក្រោយពីទស្សនកិច្ចរយៈពេល ២ថ្ងៃរបស់ស្នងការអឺរ៉ុបទទួលបន្ទុកថាមពលលោកមីហ្គែល អារីយ៉ា កានែតក្នុងប្រទេសអ៊ីរ៉ង់។
ចុះផ្សាយនៅថ្ងៃ៖
ស្តាប់ - ០២:១៧
« ក្រោយពីអាមេរិកបានដកខ្លួនចេញពីកិច្ចព្រមព្រៀង ក្តីទន្ទឹងរង់ចាំរបស់មតិសាធារណៈនៅអ៊ីរ៉ង់មានការកើនឡើង ហើយការគាំទ្រនយោបាយពីសហភាពអឺរ៉ុបដើម្បីស្រោចស្រង់កិច្ចព្រមព្រៀងនៅមិនទាន់គ្រប់គ្រាន់នៅឡើយទេ » នេះជាការថ្លែងរបស់លោករដ្ឋមន្រ្តីការបរទេសអ៊ីរ៉ង់យ៉ាវ៉ាដ ហ្សារីហ្វនៅក្នុងជំនួបជាមួយលោកមីហ្គែល អារីយ៉ា កានែត ស្នងការអឺរ៉ុបទទួលបន្ទុកថាមពល។ លោកហ្សារីហ្វបានបន្ថែមថា អឺរ៉ុបត្រូវតែប្រឹងប្រែងឲ្យបានច្រើនជាងនេះដោយធ្វើយ៉ាងណាបង្កើនការវិនិយោគនៅក្នុងប្រទេសអ៊ីរ៉ង់។
ទន្ទឹមគ្នានេះ លោកប្រមុខការទូតអ៊ីរ៉ង់មិនញញើតនឹងធ្វើការរិះគន់ ទិតៀនត្រង់ៗលើសេចក្តីប្រកាសមួយចំនួនរបស់ក្រុមហ៊ុន សហគ្រាសអឺរ៉ុបពីការត្រៀមខ្លួនចាកចេញពីអ៊ីរ៉ង់ ក្រោយការប្រកាសព្រមានដាក់ទណ្ឌកម្មពីរដ្ឋបាលអាមេរិក។ តាមលោកហ្សារីហ្វ ការត្រៀមចាកចេញពីទឹកដីអ៊ីរ៉ង់របស់ក្រុមហ៊ុន សហគ្រាសអឺរ៉ុបទាំងអស់នោះមិនបានឆ្លើយតបនឹងកិច្ចសន្យារបស់អឺរ៉ុបក្នុងការស្រោចស្រង់កិច្ចព្រមព្រៀងនុយក្លេអ៊ែរទេ។ ចំណែកអ្នកនាំពាក្យរបស់ក្រសួងការបរទេសអ៊ីរ៉ង់បានច្រានចោលលើព័ត៌មានដែលថា អ៊ីរ៉ង់បានយល់ព្រមចរចាជាមួយអឺរ៉ុបលើសំណុំរឿងផ្សេងក្រៅពីកិច្ចព្រមព្រៀងនុយក្លេអ៊ែរ។
សូមជម្រាបជូនថា តាំងពីអាមេរិកបានដកខ្លួនចេញពីកិច្ចព្រមព្រៀងនុយក្លេអ៊ែរកាលពីថ្ងៃទី៨ ឧសភាមក នេះជាលើកទី១ ដែលមានថ្នាក់ដឹកនាំអឺរ៉ុបម្នាក់បានទៅធ្វើទស្សនកិច្ចក្នុងប្រទេសអ៊ីរ៉ង់។ កិច្ចព្រមព្រៀងនុយក្លេអ៊ែរអ៊ីរ៉ង់ចុះហត្ថលេខាឆ្នាំ ២០១៥ បានចែងពីការកម្រិតកម្មវិធីនុយក្លេអ៊ែរអ៊ីរ៉ង់ជាថ្នូរនឹងការលើកទណ្ឌកម្មសេដ្ឋកិច្ចចេញពីអ៊ីរ៉ង់។ តែអាមេរិករបស់លោកដូណាល់ ត្រាំបានសម្រេចដកខ្លួនចេញដោយយល់ថា កិច្ចព្រមព្រៀងនោះនៅមានលក្ខណៈធូររលង់ដោយនៅអនុញ្ញាតឲ្យអ៊ីរ៉ង់អាចបន្តកម្មវិធីគ្រាប់មីស៊ីលបាលីស្ទិក និងប្រើឥទ្ធិពលគ្របដណ្តប់លើតំបន់ដើមបូព៌ា។
ក្រៅពីប្រកាសដាក់ទណ្ឌកម្មជាថ្មីលើអ៊ីរ៉ង់ ទីក្រុងវ៉ាស៊ីនតោនក៏ព្រមានដាក់ទណ្ឌកម្មប្រឆាំងនឹងក្រុមហ៊ុន សហគ្រាសបរទេសដែលកំពុងបោះទុនរកស៊ីនៅអ៊ីរ៉ង់ដែរ។ រហូតមកដល់ពេលនេះ មានក្រុមហ៊ុន សហគ្រាសអឺរ៉ុបប្រមាណជា ១២ ពិសេសក្រុមហ៊ុនបារាំង Total បានប្រកាសឲ្យដឹងពីគម្រោងដកខ្លួនចេញពីទីផ្សារអ៊ីរ៉ង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ