ក្រិកបដិសេធមិនព្រមដោះដូរទាហានតាមការទាមទាររបស់តួកគី
ក្រិក និងតួកគី បានដំឡើងសំឡេងដាក់គ្នា មួយកម្រិតទៀត នៅថ្ងៃអាទិត្យ នៅ ពេល ប្រធានាធិបតីក្រិក លោកProkopis Pavlopoulos បានបដិសេធ មិនទទួលយកសំណើរបស់ប្រមុខរដ្ឋាភិបាលតួកគី ដែលចង់ឲ្យមានការដោះដូរ អ្នកទោសទាហានរវាងប្រទេសទាំងពីរ។ នៅថ្ងៃសៅរ៍ ប្រធានាធិបតីតួកគី លោកអ៊ែរដូហ្កាន បានទាមទារឲ្យក្រិកចាប់បញ្ជូនទាហានផ្សំគំនិតធ្វើរដ្ឋប្រហារមិនបានសម្រេចនៅតួកគី ទៅតួកគីវិញ បើសិន ក្រិកចង់ឲ្យតួកគី ដោះលែងទាហានក្រិក ដែលត្រូវបានចាប់ខ្លួន ក្នុងប្រទេសតួកគី តាំងពី ខែមីនាកន្លងទៅ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៩
សម្រាប់ប្រធានាធិបតីក្រិក សំណើរបស់ប្រធានាធិបតី តួកគីគឺជារឿងដែលមិនអាចទទួលយកបាន។ ប្រធានាធិបតីក្រិក នៅថ្ងៃអាទិត្យបានបដិសេធមិនធ្វើដោះដូរ ទាហានឈ្លើយសឹកតាមសំណើចង់បានរបស់ប្រធានាធិបតីតួកគីនោះទេ។ ប្រធានាធិបតីតួកគី នៅថ្ងៃសៅរ៍ បាននិយាយប្រាប់ទូរទស្សន៍ ឯកជនមួយនៅតួកគីថា បើសិន រដ្ឋាភិបាលក្រិកយល់ព្រមប្រគល់ខ្លួន ទាហានតួកគី ដែលបានរត់ទៅជ្រកកោន នៅក្រិក ទៅឲ្យរដ្ឋាភិបាលតួកគីវិញ នោះ រដ្ឋាភិបាលតួកគី នឹងពិចារណាដោះលែង ទាហានក្រិកទាំងពីររូប ដែលកំពុងជាប់ឃុំក្នុងពន្ធនាគារតួកគី។
តាមកាសែតក្នុងស្រុកតួកគី ទាហានក្រិកពីររូប ត្រូវបានអាជ្ញាធរតួកគីចាប់ឃុំខ្លួន តាំងពីខែមីនា ពីបទឆ្លងដែនខុសច្បាប់ ហើយនិងបទធ្វើចារកម្ម ក្នុងទឹកដីតួកគី។ រដ្ឋាភិបាលក្រិកវិញ បានអះអាងថា ទាហានក្រិកទាំងពីររូបឆ្លងព្រំដែន ដើរចូលដីតួកគី បន្ទាប់ពីពួកគេវង្វេងផ្លូវ ដោយសារអាកាសធាតុចុះអ័ព្ទខ្លាំងនៅតាមព្រំដែន។
ការចាប់ខ្លួនទាហានក្រិក ក្នុងពន្ធនាគារតួកគី បានធ្វើឲ្យភាពតានតឹងរវាងប្រទេសជិតខាងទាំងពីរកាន់តែធ្លាក់ចុះអាក្រក់ថែមទៀត។ ថ្មីៗនេះ តុលាការក្រិកបានសម្រេច មិនធ្វើបត្យាប័ន ទាហានតួកគី ៨នាក់ ទៅតាមការទាមទាររបស់រដ្ឋាភិបាលក្រុងអង់ការ៉ា។ រដ្ឋាភិបាលតួកគីបានទាមទាររហូតមក ឲ្យអាជ្ញាធរក្រិក ប្រគល់មកឲ្យខ្លួនវិញ ទាហានតួកគី ទាំង៨នាក់ ដែលបានរត់គេចខ្លួន ទៅប្រទេសក្រិក នៅក្រោយ រដ្ឋប្រហារមិនបានសម្រេច នៅឆ្នាំ ២០១៦។ រដ្ឋាភិបាលតួកគីបានចោទទាហានតួកគីទាំង៨នាក់ ថា ជាគ្នីគ្នារបស់មេគ្រូសាសនាអ៊ីស្លាម Gulen ដែលជាអ្នកនៅពីក្រោយការរៀបចំរដ្ឋប្រហារទម្លាក់រដ្ឋាភិបាលរបស់លោក។ នៅដើមខែមេសា លោកនាយករដ្ឋមន្រ្តីក្រិក Alexis Tsipras បានទាមទារឲ្យរដ្ឋាភិបាលតួកគី ពន្លឿននីតិវិធីច្បាប់ ដើម្បីដោះលែងទាហានក្រិកទាំងពីរនាក់ និងឈប់បង្កសង្រ្គាមពាក្យសំដីតទៅទៀត។ សម្រាប់រដ្ឋាភិបាលក្រុងអាថែន គេមិនត្រូវយកជីវិត និងសេរីភាពរបស់មនុស្សទៅធ្វើជាឈ្នាន់ ជាទំនិញ ចរចាតម្លៃគ្នានោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ