អង្គការហាមឃាត់អាវុធគីមីបើកកិច្ចប្រជុំដើម្បីនិយាយពីរឿងបំពុលលោក Skripal និងកូនស្រី
នៅថ្ងៃពុធ ទី៤ មេសា អង្គការហាមឃាត់អាវុធគីមីបើកកិច្ចប្រជុំវិសាមញ្ញមួយក្នុងក្រុងឡាអេ ប្រទេសហូឡង់។ កម្មវត្ថុនៃកិច្ចប្រជុំ គឺដើម្បីនិយាយពីសំណុំរឿងបំពុលអតីតភ្នាក់ងារចារកិច្ចរុស្ស៊ីលោក Skripal និងកូនស្រីក្នុងប្រទេសអង់គ្លេសកាលពីថ្ងៃទី៤ មីនា។ ការបំពុលដែលទីក្រុងឡុងដ៏បានចង្អុលមុខរុស្ស៊ី តែក្រុងមូស្គូបានបន្តបដិសេធ ព្រមទាំងចោទអង់គ្លេសវិញថាជាអ្នកដែលនៅពីក្រោយរឿងរ៉ាវមួយនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៤
បើយោងតាមឯកសារមួយផ្សព្វផ្សាយដោយអង្គការហាមឃាត់អាវុធគីមីក្នុងថ្ងៃអង្គារ ទី៣ មេសា កិច្ចប្រជុំវិសាមញ្ញរបស់ខ្លួនធ្វើឡើងតាមការស្នើសុំរបស់លោក Alexander Shulgin អ្នកតំណាងអចិន្រ្តៃយ៍រុស្ស៊ីប្រចាំនៅស្ថាប័នអន្តរជាតិមួយនេះ។ អ្វីដែលភាគីរុស្ស៊ីចង់ឲ្យអង្គការហាមឃាត់អាវុធគីមីជជែក គឺទឡ្ហីករណ៍គ្មានការគោរពសន្ធិសញ្ញាដែលរដ្ឋមួយបានប្រឆាំងរដ្ឋមួយទៀតទាក់ទងនឹងរឿងបំពុលអតីតចារកិច្ចរុស្ស៊ីលោក Skripal និងកូនស្រីក្នុងប្រទេសអង់គ្លេសកាលពីថ្ងៃទី៤ មីនា។ ការបំពុលដែលទីក្រុងឡុងដ៏បានទម្លាក់កំហុសទាំងស្រុងដាក់ទីក្រុងមូស្គូ។
ទោះបីជាមូស្គូតែងតែឆ្លើយបដិសេធម្តងជាពីរក៏ដោយក៏អង់គ្លេសនៅតែយល់ឃើញថា មានតែប្រទេសរស្ស៊ីមួយគត់ដែលអាចឆ្លើយបំភ្លឺនឹងរឿងរ៉ាវមួយនេះបាន។ នៅថ្ងៃចន្ទ ទី២ មេសា លោកប្រមុខការទូតរុស្ស៊ី Sergueï Lavrov បាននិយាយដោយមិនបញ្ឆិតបញ្ឆៀងថា ក្រុងឡុងដ៍អាចស្ថិតនៅពីក្រោយរឿងរ៉ាវមួយនេះ ព្រោះវាបានហុចប្រយោជន៍ឲ្យអង់គ្លេសដែលកំពុងត្រៀមខ្លួនចាកចេញពីអឺរ៉ុប។ កាលពីថ្ងៃទី២២ មីនា តុលាការអង់គ្លេសបានអនុញ្ញាតឲ្យមានការបូមឈាមពីលោក Skripal និងកូនស្រីរបស់គាត់យកទៅវិភាគដើម្បីចង់ដឹងច្បាស់ពីប្រភេទសារធាតុគីមីដែលបានប្រើបំពុលឳពុក និងកូន ហើយអង្គការហាមឃាត់អាវុធគីមីក៏នឹងធ្វើការវិភាគលើឈាមនោះដាច់ដោយឡែករបស់ខ្លួនដែរ។
គួររម្លឹកជូនថា រឿងរ៉ាវបំពុលលោក Skripal និងកូនស្រីនេះកំពុងបន្តធ្វើឲ្យមានវិបត្តិការទូតយ៉ាងធ្ងន់ធ្ងររវាងអង់គ្លេស និងរុស្ស៊ី រួមទាំងរវាងរុស្ស៊ីជាមួយប្រទេសលោកខាងលិចជាច្រើន ពិសេសអាមេរិក និងប្រទេសអឺរ៉ុបមួយចំនួន។ គិតត្រឹមថ្ងៃពុធ ទី៤ មេសា មានមន្រ្តីការទូតរុស្ស៊ីសរុបចំនួន ១៥០នាក់ត្រូវបានប្រទេសអង់គ្លេស សម្ព័ន្ធមិត្តអង់គ្លេស និងអង្គការអូតង់បណ្តេញចេញពីប្រទេសរបស់គេ។ ជាការឆ្លើយតបវិញ រុស្ស៊ីក៏បានបណ្តេញមន្រ្តីការទូតចំនួនដូចគ្នាពីបណ្តាប្រទេសទាំងនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ