ប្រទេសរុស្សីប្រាប់ឲ្យ អង់គ្លេស ដកមន្រ្តីទូតរបស់ខ្លួន ៥០ នាក់ ចេញពីរុស្សី
មួយរយៈចុងក្រោយនេះ ទំនាក់ទំនងរបស់អង់គ្លេស ព្រមទាំងប្រទេសលោកខាងលិច ជាមួយនឹង រុស្សីកាន់តែល្អក់កករទ្វេឡើង ដោយសារតែរឿងប៉ុនប៉ងសម្លាប់ អតីតភ្នាក់ងារចារកិច្ចរុស្សី ដោយការប្រើសារធាតុពុល។ បញ្ហានេះ បានបង្កឲ្យមានវិបត្តិការទូត រវាងប្រទេសប្រទេសរុស្សីតែឯង ទល់ជាមួយនឹងអង់គ្លេស ព្រមទាំង បណ្តាប្រទេសស្និទ្ឋិនឹងអង់គ្លេសប្រមាណ ជា ២០ ប្រទេសទៀត។ ព្រមជាមួយគ្នានេះ រុស្សីបានប្រាប់ឲ្យអង់គ្លេស ដកចេញនូវមន្ត្រីទូតរបស់ខ្លួនចំនួនជាង ៥០ នាក់ ដែលកំពុងបម្រើការនៅរុស្សី ដើម្បីឲ្យចំនួនមន្ត្រីទូតកំពុងបំពេញបេសកកម្មក្នុងប្រទេសទាំងពីរ មានចំនួនស្មើគ្នា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៨
អង់គ្លេស និងក្រុមប្រទេសលោកខាងលិច បានបណ្តេញមន្ត្រីទូតរុស្សីជាង ១៥០ នាក់ ចេញពីប្រទេសរបស់ពួកគេ ចំនែករុស្សីបណ្តេញមន្ត្រីទូតអង់គ្លេស និង បណ្តាប្រទេសសម្ព័ន្ឋចេញពីប្រទេសខ្លួនវិញដែរ។ មិនត្រឹមតែប៉ុណ្ណោះ នៅថ្ងៃសៅរ៍ទី ៣១ មីនា រុស្សី បានប្រាប់ឲ្យ អង់គ្លេសកាត់បន្ថយមន្ត្រីទូតរបស់ខ្លួន ចំនួនជាង៥០ នាក់ទៀត ដែលកំពុងធ្វើការនៅក្នុងប្រទេសរុស្សី ដើម្បីឲ្យចំនួនមន្ត្រីទូតដែលកំពុងធ្វើការក្នុងប្រទេសទាំងពីរ មានចំនួនស្មើគ្នា។
បន្ថែមលើនេះ រុស្សីកាន់តែឆេះដុំ នៅពេលដែលចក្រភពអង់គ្លេស ធ្វើការត្រួតពិនិត្យលើយន្តហោះ ដែលហោះចេញពីទីក្រុង ម៉ូស្កូ មកកាន់អង់គ្លេស នាថ្ងៃទី៣១ មីនា។ អង់គ្លេសអះអាងថា ការត្រួតពិនិត្យធ្វើឡើង គឺដើម្បីការពារប្រទេសរបស់ខ្លួន ពីបទឧក្រិដ្ឋកម្មណាមួយ ដែលគេរៀបចំធ្វើដោយការប្រើសារធាតុពុល។ រុស្សី បានចាត់ទុកទង្វើរបស់ អង់គ្លេស ថា ជាការបញ្ឆេះ ជម្លោះការទូត ដែលមានស្រាប់ ឲ្យកាន់តែអាក្រក់ឡើងទៀត។
សូមជម្រាបថា លោក Skripal អតីតចារកិច្ចរុស្សី បានមករស់នៅប្រទេសអង់គ្លេស តាមរយៈការដោះដូរចារកម្ម រវាង អង់គ្លេស និង រុស្សី។ លោកនិង កូនស្រី បានស្នាក់នៅមន្ទីរពេទ្យចាប់តាំងពីថ្ងៃទី ៤ ខែមីនា បន្ទាប់ពីត្រូវថ្នាំបំពុល នៅភាគខាងលិច នៃទីក្រុង សាឡឺបៀ នៃប្រទេសអង់គ្លេស។ បន្ទាប់មក នាយករដ្ឋមន្ត្រីអង់គ្លេសលោកស្រី Theresa May និងសម្ព័ន្ធមិត្តលោកខាងលិច បានទំលាក់ការទទួលខុសត្រូវទាំងស្រុងទៅលើ រុស្សី។ ប៉ុន្តែ ក្រុងម៉ូស្កូ បានបដិសេធម្តងហើយម្តងទៀតថា ខ្លូនមិនបាននៅពីក្រោយការប៉ុនប៉ងសម្លាប់នោះទេ។
បច្ចុប្បន្ននេះ អង្គការហាមឃាត់អាវុធគីមី កំពុងផ្ទៀងផ្ទាត់ លទ្ឋផលដែលរកឃើញដោយអាជ្ញាអង់គ្លេស ដែលថា សារធាតុពុលគេបានប្រើនោះ ពិតជាមានប្រភពចេញពីរុស្សីមែនឫយ៉ាងណា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ