នាយករដ្ឋមន្ត្រីថ្លែងសារបង្រួបបង្រួមអង់គ្លេស មុនដើរចេញពីអឺរ៉ុប
អង់គ្លេសនឹងត្រូវចាកចេញពីសហភាពអឺរ៉ុបជាផ្លូវការនៅថ្ងៃទី ២៩ មីនា ២០១៩ ! ពោលគឺសល់តែមួយឆ្នាំទៀតគត់ប៉ុណ្ណោះ ! នៅថ្ងៃទី ២៩ មីនា ២០១៨នេះ លោកស្រីនាយករដ្ឋមន្ត្រីបានចេញសេចក្តីថ្លែងសារមួយ ទៅកាន់ប្រជាជាតិអង់គ្លេស ដើម្បីសាកល្បងបង្រួបបង្រួម និង លួងលោមពលរដ្ឋ ស្តីពីការដើរចេញពីអឺរ៉ុប Brexit ដែលជាប្រធានបទដ៏រសើបក្រៃ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៣
“ថ្ងៃនេះ មួយឆ្នាំគត់មុននឹងដើរចេញពីអឺរ៉ុប មុននឹងអង់គ្លេសផ្តើមផ្សងព្រេងលើផ្លូវថ្មី ខ្ញុំបានទៅបំពេញទស្សនកិច្ចជាតិទាំងបួនរបស់អង់គ្លេស ដើម្បីបានដឹងថាតើពលរដ្ឋអង់គ្លេស ទាំងអស់យល់យ៉ាងណា ចំពោះBrexit?!” នេះជាប្រសាសន៍របស់លោកស្រី តេរ៉េហ្សា មេ នៅក្នុងសេចក្តីថ្លែងការណ៍។
លោកស្រី មេ បានធ្វើដំណើរមួយជុំប្រទេស ដោយចាប់ផ្តើមពីតំបន់អេកូស ដើម្បីមើលរោងចក្រក្រណាត់។ បន្ទាប់មកលោកស្រីបានទៅជួបសួរសុខទុក្ខក្រុមឪពុកម្តាយនិងសិស្សនៅ Newcastleរដ្ឋអង់គ្លេស រួចចូលទៅទទួលទានអាហារថ្ងៃត្រង់ជាមួយកសិករនៅជិតរដ្ឋធានីរបស់រដ្ឋអៀរឡង់ខាងជើងរបស់អង់គ្លេស មុននឹងបន្តដំណើរទៅកាន់រដ្ឋ Pays de Galles ដើម្បីជជែកតុមូលជាមួយក្រុមសហគ្រិន។ ជាចុងក្រោយ ជាជំនួបជាមួយក្រុមពលរដ្ឋប៉ូឡូញមកស្នាក់នៅក្រុងឡុងដ៍។
សម្រាប់លោកស្រីនាយករដ្ឋមន្ត្រី រដ្ឋខេត្តនីមួយៗរបស់អង់គ្លេសនឹងមានអំណាចសម្រេចកាន់ខ្លាំង ព្រោះលែងស្ថិតនៅក្រោមបញ្ជាពីសហភាពអឺរ៉ុបទៀតហើយ ! អនាគតអង់គ្លេសនឹងភ្លឺស្វាង ! នៅថ្ងៃអនាគត អង់គ្លេសនឹងមានសេរីភាព ជាមួយមិត្ត ជាមួយដៃគូអឺរ៉ុប និងជាមួយប្រទេសផ្សេងទៀត ព្រោះអង់គ្លេសនឹងមានច្បាប់ជា ព្រំដែន រូបិយបណ្ណ ជារបស់ខ្លួន ! អង់គ្លេសនឹងខ្លាំង នឹងរុងរឿង និងផ្តល់ផលប្រយោជន៍ដល់គ្រប់ពលរដ្ឋមិនថាប្រឆាំងនិងគាំទ្រនឹងការដើរចេញពីអឺរ៉ុបឡើយ។ នេះជាការបញ្ជាក់លម្អិតបន្ថែមនៅក្នុងសេចក្តីថ្លែងការណ៍។
ប៉ុន្តែក្នុងខណៈដែលលោកស្រីមេ ប្រកាសសន្យាការពារបូរណភាពដែនដីអង់គ្លេស បញ្ហាព្រំដែនរវាងខេត្តអៀរឡង់ខាងជើងរបស់អង់គ្លេស និងប្រទេសអៀរឡង់ (សមាជិកសហភាពអឺរ៉ុប) នៅតែជាឧបសគ្គយ៉ាងចំបងបំផុតមួយនៃកិច្ចចរចាដើរចេញពីអឺរ៉ុប។ សូមបញ្ជាក់ថា អង់គ្លេសត្រូវបែកចេញពីអឺរ៉ុប នៅថ្ងៃ២៩មីនា ២០១៩ ពីរឆ្នាំគត់ក្រោយផ្តើមដំណើរការតាមនីតិវិធី និងជិតបីក្រោយការបោះឆ្នោតប្រជាមតិផ្តាច់ខ្លួនចេញពីអឺរ៉ុប។ តែពុំទាន់រកឃើញទេ កិច្ចព្រមព្រៀងស្តីអំពីទំនាក់ទំនងនាពេលអនាគតរវាងអង់គ្លេសនិងអតីតដៃគូអឺរ៉ុប។ លោកស្រី មេ ទើបបានទទួលការយល់ព្រមពីអឺរ៉ុប នូវការព្រមព្រៀងអន្តរកាល រហូតដល់ចុងឆ្នាំ២០២០ ដែលអនុញ្ញាតឱ្យអង់គ្លេសបន្តប្រើទីផ្សាររួម តែគ្មានសិទ្ធិចេញស្តីអ្វីទៀតឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ